Saturday 29 March 2014
00:02 | 
Posted by
༄༅།། ཨེ་མ་ཧོའི་རིག་མཛོད་། |
བོད་ཀྱི་དགོན་སྡེའི་སློབ་གསོ་བཅོས་བསྒྱུར་གྱི་བསམ་ཚུལ།།
༄༅།།སློབ་གསོ་ལ་འཛམ་གླིང་དུ་ཁྱིམ་ཚང་སློབ་གསོ་དང་སྤྱི་ཚོགས་སློབ་གསོ། སློབ་གྲྭའི་སློབ་གསོ་བཅས་རིགས་གསུམ་དུ་བཀར་ཡོད་མོད། བདག་གིས་དགོན་སྡེ་སློབ་གསོ་སྟེ་བོད་ཀྱི་ཐུན་མོང་མ་ཡིན་པའི་སློབ་གསོ་སྤྲོད་སྟངས་བཅས་རིགས་བཞིར་དགར་འདོད།
དགོན་སྡེའི་རིག་གནས་སློབ་གསོ་དེ་ཡང་སྔར་སྲོལ་ལྟར་རང་བབས་སུ་བཞག་ན་ཉམས་དམས་སུ་འགྲོ་བ་ལས་འོས་མེད་པས། དུས་རབས་དང་མཐུན་པའི་བཅོས་བསྒྱུར་གྱིས་དཔེ་ཁྲིད་བྱེད་ཐབས་གསར་བ་བེད་སྤྱད་ནས་རྒྱུ་སྤུས་ཇེ་ལེགས་དང་ཆ་ལག་ཇེ་འཛོམས། སྤྱི་ཚོགས་སྟེང་ལག་ལེན་ཐུབ་པ་དང་བཀོལ་བདེའི་རིན་ཐང་ཡོད་པ། སྤྱི་ཚོགས་དང་བར་ཐག་ཇེ་ཉེར་གཏོང་རྒྱུ་ནི་དུས་རབས་གསར་བའི་བླ་མ་དང་དགེ་བཤེས། མཁན་པོ་རྣམས་ཀྱི་ཕྲག་ཏུ་བབས་པའི་འོས་འགན་རླབས་ཆེན་ཞིག་ཡིན་པར་འདོད།
གཅིག བསམ་བློའི་ལྟ་ཕྱོགས་བཅོས་སྒྱུར་བྱེད་པ།
དགེ་ལྡན་པའི་གྲྭ་ས་ཆེན་པོ་དག་ཏུ་གཞུང་བཀའ་པོད་ལྔ་སྦྱོང་བ་དང་། རྙིང་མ་བས་གཞུང་ཆེན་བཅུ་གསུམ་ལ་སྦྱོང་བ། ས་སྐྱ་བས་ཆོས་གྲྭ་དག་ཏུ་གཞུང་ཆེན་རྣམ་དྲུག་སྦྱོང་བ་སོགས་མཛོད་འདུལ་དབུ་མངོན་ལས། སྒྲ་སྙན་སྨན་རྩིས་དང་བཟོ་རིག་ལག་རྩལ་སོགས་སྦྱང་བྱའི་སྲོལ་མ་མཆིས་པ། གུང་ཐང་བསྟན་པའི་སྒྲོན་མེས། སྒྲ་སྙན་སྨན་རྩིས་སོགས་ལ་མགོ་འཁོར་བ།། གཞུང་ལུགས་ཐོས་བསམ་རྣལ་མའི་གེགས་ཡིན་པས།། རྩ་བ་བོར་ནས་ཡལ་ག་མ་འཛིན་ཨང་།།ཞེས་པ་ལྟར་རྩ་བ་བཟུང་ནས་ཡལ་ག་མི་འཛིན་ན། རྩ་བ་ལྗོན་ཤིང་གཅེར་བུ་ལ།། ཡལ་ག་མེད་ན་ག་ལ་མཛེས།། ཞེས་ཨ་མཚར་དུ། ཁ་དཔེར། གཏམ་ཀུ་རེ་མེད་ན་བཤད་སྲོལ་མེད།། ཟས་མཆོད་ཁ་མ་འཕངས་ཟ་སྲོལ་མེད།། ཅེས་པ་ལྟར་ཀུ་རེ་རྩེད་མོ་ཡིན། སྔོན་གྱི་དགོན་པའི་དགེ་བཤེས་ཁ་ཤས་ནས་རང་གི་མིང་འབྲི་མི་ཤེས་ཞེས་པ་བསྟོད་པ་མ་རེད་སྨད་པ་རེད། མི་ཚེ་གང་བོར་ཐོས་བསམ་ལ་བསྐྱལ་ནས་རང་གི་མིང་ཙམ་ཡང་འབྲི་མ་ཤེས་པ་ཡ་མཚན་མ་རེད་དམ། དཔེར་ན། ནུ་བོས་དབུས་གཙང་སློབ་གཉེར་གྱི་ཕུ་བོ་ལ（དགོས་རྒྱུ་བོད་སྤོས་དྲི་བཟང་ཡིན་དགོས་པ་ལ）དྲི་བསྐུར་ཞེས་པའི་འཕྲིན་ལྷ་སར་བཏང་བ། ཕུ་བོས་དོན་མ་གོ་བར་ཕྱིར་ཁམས་གྲི་ཞིག་བསྐུར་བའི་དཔེ་ལྟར་ངོ་མི་ཚའམ། དེ་མིན་འཇིག་རྟེན་རྙིང་བའི་བླ་ཐོབ་མཁན་ཐོབ་ཉོ་རུང་བའི་སྲོལ་ངན་འབུལ་སྡུད་བླ་མ་དང་མང་ཇའི་མཁན་པོ་སོགས་རྩ་བ་ནས་བསྒྱུར་དགོས།
ཡི་གེ་འབྲི་ཀློག་ཙམ་ཤེས་ནས་འདོན་པ་གཅིག་པོ་འདོན་ཐུབ་པ་ཡིས་ནང་བའི་གཞུང་གི་གོ་བ་ལེན་མི་ཐུབ་པས། སུམ་རྟགས་དག་གསུམ་ནི་སྐད་ཡིག་གི་རྨང་གཞི་ལྟ་བུ་ཡིན་པས་མ་སྦྱངས་ཐབས་མེད་ཡིན། དགོན་སྡེ་ནི་བོད་ཀྱི་སློབ་གྲྭ་ཡིན་པར་ཁས་ལེན་དགོན་པས་བོད་སྤྱི་ཚོགས་ལ་མཁོ་བའི་ཤེས་ལྡན་མི་སྣ་སྐྱེད་སྲིང་བྱེད་དགོས་པར་འདོད།
གཉིས། ཇི་ལྟར་བྱེད་པའི་ཐབས་ལ།
༡.གྲུབ་མཐའ་རང་རང་གི་དགེ་བཤེས་མཁན་པོ་བསྡུ་སྒྲིག་གིས་ཁྲིད་གཞི་གཏན་ཁེལ། ཁྲིད་དེབ་གསར་བཟོ། ཁྲིད་དུས་བཀོད་སྒྲིག སྦྱངས་འབྲས་བསྡུར་ཚད་སོགས་གང་ཅིའི་ཐད་ནས་གཏན་ཁེལ་བྱེད་དགོས།
༢.འཛིན་གྲྭའི་སློབ་མ་བསྡུ་སྐབས། སྦྱངས་འབྲས་གཞུང་ལུགས་གཙོ་བོ་དང་། རིག་གནས་སོགས་ཕལ་བས་སྐར་གྲངས་ལྟར་འཛིན་གྲྭ་སྤར་བ་ལས་ལུག་ཁྱུ་འདེད་འདེད་མི་བྱེད་རྒྱུ།
༣.མཐར་ཕྱིན་དཔང་ཡིག་སྟེར་རྒྱུ། དེ་ལ་གྲུབ་མཐའ་སོ་སོའི་དགོན་པས་ཕན་ཚུན་ཚོགས་ཞུགས་དང་དགེ་རྒན་བསྡུ་ལེན་སོགས་ཀྱི་གཞི་འཛིན་ས་བྱེད་རྒྱུ། རིམ་བཞིན་རྒྱལ་ཁབ་ནས་ཀྱང་ཁས་ལེན་ཐོབ་ཐུབ་པ་བྱེད་དགོས།
གསུམ། སློབ་གསོའི་ནང་དོན།
དགོན་པའི་སློབ་ཁྲིད་ཕུན་སུམ་ཇེ་ཚོགས་སུ་གཏོང་བ།
རྒྱ་ཡིག་རྒྱ་སྐད་མ་ཤེས་ཐབས་མེད་ཡིན་པ།
རྒྱ་ཡིག་ནི་ཀྲུང་གོ་རྒྱལ་ཁབ་ཀྱི་ཁྲིམས་སུ་གཏན་ཁེལ་བྱས་པའི་སྤྱི་སྤྱོད་སྐད་ཡིག་དང་མི་གྲངས་མང་བོའི་ཡི་གེ་ཡིན་པ། བོད་རྒྱ་གཉིས་གནའ་ནས་ཁྱིམ་མཚེས་རྒྱལ་ཁབ་དང་ཕན་ཚུན་རིག་གནས་གོམས་སྲོལ་ཐད་ཤན་ཤུགས་ཆེན་པོ་ཐེབས་ཡོད་པ། གཞུང་ལུགས་ཕར་བསྒྱུར་ཚུར་བསྒྱུར་བྱས་པ་མང་བ། གཙོ་བོ་ཚང་མ་ནང་བ་སངས་རྒྱས་ལ་དད་པའི་མི་རིགས་ཡིན་པས། རྗེས་ཕྱོགས་ཆོས་སྲིད་གང་ཐད་ནས་བཀོལ་སྤྱོད་རྒྱ་ཆེ་བའི་ཡི་གེ་ཡིན་པས་སོ།། དངོས་ཡོད་གནས་ཚུལ་ལྟར་ན་དགོན་པའི་གློག་བརྙན་འཕྲིན་བལྟ་བ་དང་། རྒྱ་ཡིག་རྒྱ་སྐད་སྦྱོང་བ་ཐོས་བསམ་གྱི་བགེགས་ཡིན་པར་འཛེམ་ནས་བཀག་རྒྱ་བྱེད་ཀྱིན་ཡོད་རུང་། གྲོང་ཁྱེར་དང་འདབས་འདྲེས་པའི་དགོན་པའི་གྲྭ་བ་ནས་རྒྱ་ཡིག་གི་འཕྲིན་ཐུང་བསྐུར་མི་ཤེས་པ་དང་རྒྱ་སྐད་བཤད་མི་ཤེས་པ་ཕལ་ཆེར་མེད་ཚོད་རེད། དེ་བས་ཁོང་རྣམ་པར་དུས་ཚོད་ངེས་ཅན་ཞིག་བཀོད་སྒྲིག་བྱས་ནས་བསླབ་ན་བཟང་སྙམ།
གར་ནག་གི་རྩིས་ཀྱི་སྔོན་འགྲོ་ཙམ་ཤེས་དགོས།
མ་མཐའ་དགུ་མཐའ་ཙམ་རྒྱུད་ལ་མ་ངེས་ན། དེ་ནི་ཉི་མ་རེ་རེར་ཚོང་ཁང་དང་ཚོང་རྭ་ཟ་ཁང་སོགས་ལ་འགྲིམ་དུས་མེད་མི་རུང་བའི་ལག་ཆ་ཡིན། གཞན་དད་ལྡན་མང་ཚོགས་ནས་ཉི་མ་བཟང་ངན་ལེགས་ཉེས་ཀྱི་གཟའ་སྐར་འཕྲོད་སྦྱོར་དྲི་བར་ལན་ཡག་པོ་ཞིག་ཕོག་དགོས་པར་འདོད། ད་ལྟ་རྒྱལ་སྤྱིའི་སྟེང་ན་བོད་རིགས་པའི་ཞིབ་འཇུག་ཚོགས་འདུ་ཚོགས་པ་དང་། ནང་སྒོས་སུ་ལོ་རེར་ནང་ཆོས་དང་ཚན་རིག་བར་གྱི་བགྲོ་གླེང་ཚོགས་འདུ་འཚོགས་བཞིན་པ་ནི་དགའ་འོས་པའི་གནས་ཡིན་ལ། ཕྱིའི་གྲྭ་ས་ནའང་ཚན་རིག་གི་དཔེ་ཁྲིད་བཙུགས་ཡོད་པའི་གནས་ཚུལ་ཐོས།
དངོས་ལུགས་དང་རྫས་འགྱུར་གྱི་ཚན་རིག་གི་སྐོར་སློབ་སྦྱོང་བྱེད་པ།
དེ་ལྟར་རིག་པའི་དྲག་ཆས་སྤྲས་ན་གྲྭ་བ་ཇེ་མང་དུ་འགྲོ་བ་དང་སངས་རྒྱས་ཀྱི་བསྟན་པ་འཛིན་སྐྱོང་སྤེལ་གསུམ་གྱི་བསྟན་འཛིན་གྱི་སྐྱེས་བུ་དམ་པ་ཇེ་མང་དུ་འཕེལ་ལ། ཞོར་དུ་ད་ལྟའི་སློབ་གྲྭར་བོད་ཡིག་བོད་སྐད་བཀག་རུང་དགོན་པས་ཕ་སྐད་རྒྱུད་འཛིན་བྱེད་པར་ནུས་པ་འདོན་ཐུབ་པ།
གྲྭ་བ་ཉན་ན་རབ་དང་། མ་ཉན་རུང་ལྟ་བ་མ་ལོག་པའི་སྟེང་ནས་སྤྱི་ཚོགས་ལ་ཟབ་འཇུག་བྱེད་ཐུབ་པ་མ་ཟད། སློབ་གྲྭ་ཆེན་མོ་དང་ཞིབ་འཇུག་སློབ་མར་རྒྱུགས་སྤྲོད་ཐུབ་པ།
གཞན་གྲྭ་ལོག་ཞེས་སྨད་ར་གཏོང་བ་ལས་ཁེ་ལས་དང་ཚོང་ལས་སོགས་སྤྱི་ཚོགས་ལ་ཞབས་ཕྱིའི་ལས་རིགས་བསྒྲུབ་ཐུབ་པའི་སྐྱེས་བུ་སྟོབས་ལྡན་མང་བོ་འཕེལ་བར་འགྱུར་སྙམ་པའི་སྨོན་པ་བཏང་བའོ།།
བཞི། སློབ་གསོའི་བཀོད་སྒྲིག་བྱེད་ཕྱོགས།
སྔོན་ཆད་ཁ་དོག་དཀར་དམར་སོགས་ལོ་གཉིས་ནས་གསུམ། བསྡུས་རྭ་ལོ་བཞི་ནས་ལྔ། བློ་རྟགས་ལ་ལོ་གཉིས། ཕར་ཕྱིན་ལ་ལོ་ལྔ་ནས་དྲུག དབུ་མ་གསར་རྙིང་ལ་ལོ་གཉིས། མཛོད་ལ་ལོ་གཉིས། དེ་ནས་འདུལ་བ་ལོ་ཁ་ཤས། ཕལ་ཆེར་མི་ལོ་ཉི་ཤུ་ལྷག་གི་དཀའ་བ་སྤྱད་ན་གཟོད་མདོ་ཕྱོགས་ནས་དགེ་བཤེས་དམ་བཅའ་འཇོག་ཐུབ་ལ། རྒྱལ་བའི་བསྟན་པ་མདོ་སྔགས་ཡ་མ་བྲལ་བ་ཡིན་ན་ད་རུང་སྔགས་ཕྱོགས་ནས་སློབ་སྦྱོང་གི་དུས་ཚོད་མཁོ་བས། དཔེར་ན། ཁ་དོག་དཀར་དམར་གཅིག་པོ་རྩད་ནས་ལོ་གཉིས་གསུམ་འཕྲོ་བརླག་ཏུ་མ་བཏང་བར་སྔགས་སྦྱངས་ཁོམ་ཡོད་པ་དང་། ཞོར་དུ་སུམ་རྟགས་སྙན་གསུམ་རྒྱ་ཡིག་རྒྱ་སྐད་རྩིས་དངོས་རྫས་གསུམ་སོགས་ཀྱི་སློབ་སྦྱོང་གི་དུས་ཚོད་དང་དགེ་རྒན་བཀོད་སྒྲིག་བྱས་ན། མདོ་སྔགས་ཆ་ཚང་བ་དང་ཆོས་སྲིད་ཡ་མ་བྲལ་བར་བོད་སྤྱི་ཚོགས་ལ་མཁོ་བའི་ཤེས་ལྡན་མི་སྣ་འབོར་ཆེན་ཞིག་སྐྱེད་སྲིང་བྱེད་ཐུབ།
བསམ་བློ་བློ་སྦྱོང་དང་ཡ་རབས་ཀུན་སྤྱོད་ཀྱི་བཀོད་སྒྲིག
བསམ་བློ་བློ་སྦྱོང་ཐད་རྒྱལ་སྲས་ལག་ལེན་སོ་བདུན་མ་དང་། གླང་རི་ཐང་བའི་བློ་སྦྱོང་ཚིགས་བརྒྱད་མ། ཁ་རེག་སྒོམ་ཆེན་གྱི་ཨང་ཡིག་བདུན་ཅུ་མ། བློ་སྦྱོང་དོན་བདུན་མ་སོགས་དམ་པ་གོང་མ་རྣམས་ཀྱིས་བསམ་བློ་འདུལ་ཐབས་ཀྱི་གཞུང་ལུགས་ལ་བསླབ། དེའི་སྟེང་ནས་གཞན་རིགས་ཀྱི་ལག་ཆ་བསྡུ་ལེན་དང་ཐབས་བཀོད་ལེགས་པར་བཟོ་བཅོས་ལག་བསྟར་བྱེད་དགོས།
དེ་ཡང་རྒྱ་ཡིག་རྩིས་དངོས་རྫས་འགྱུར་སུམ་རྟགས་དག་གསུམ། སྙན་ངག རྩོམ་རིག གཞུང་ལུགས། བརྡ་སྤྲོད་རིག་པ། ལོ་རྒྱུས་སོགས། ཕ་མེས་ཀྱི་ལོ་རྒྱུས་མ་ཤེས་ན་ནགས་ཀྱི་སྤྲེའུ་འདྲ་ཞེས་པ་ལྟར་མ་མཐར་བོད་པ་རང་གི་ལོ་རྒྱུས་ཤེས་དགོས། དེ་ཡང་ཁྲིད་ཚན་རེ་རེར་ལས་བྱ་འབྲི་བ་དང་དཔེ་བརྗོད་འཇོག་དགོས། མ་མཐའ་དགུ་མཐའ་ལུགས་འབྱུང་ལུགས་ལྡོག་ཤར་ཤར་བརྩི་ཐུབ་པའི་སྟེང་དངོས་ལུགས། རྫས་འགྱུར་སོགས་སློབ་ཁྲིད་ཀྱི་བཀོད་སྒྲིག་འཆར་གཞི་ཡང་དག་གཏན་འབེབས་བྱས་པ་ལག་ལེན་དུ་ཁེལ་ཐུབ་པ་བྱེད་དགོས།
ལྔ། སློབ་ཁྲིད་བྱེད་སྟངས།
སྲོལ་རྒྱུན་གྱི་ཁྲིད་ལུང་དབང་གསུམ་ལས་གཞན་གཤར་སྦྱང་དང་བློ་རྒྱུགས་སྤྲོད་པ་སོགས་སྲོལ་རྒྱུན་དཔེ་ཁྲིད་ཀྱི་ལག་ཆ་བཟང་བོ་རྒྱུད་འཛིན་དང་། ད་ལྟའི་འཆད་ཁྲིད་བྱེད་སྟངས་གོ་བདེ་བ། འཛིན་སླ་བ། བློ་སྒོ་འབྱེད་པའི་ཕྱོགས་ལ་ཉམས་མྱོང་བསྡུ་ལེན་བྱེད་དགོས།
དེ་ཡང་སློབ་གསོའི་དམིགས་ཡུལ་ནི་སློབ་མའི་འཆད་རྩོད་རྩོམ་གསུམ་གྱི་ནུས་པ་མཐོར་འདེགས་གཏོང་དགོས་པ་ཡིན་ན། ཆོས་རྭར་ཆོས་རྩོད་ལས་གཞན། དཔྱད་གླེང་དང་གཏམ་བཤད་འགྲན་བསྡུར། ནང་དོན་མི་འདྲ་བའི་གླེང་མོལ་སྣ་ཚོགས་བསྡུ་བ།ལས་བྱ་དང་དཔེ་བརྗོད་འབྲི་བ། དེང་སྐབས་དགོན་པ་སོ་སོ་ན་ཡོད་པའི་སྒེར་དེབ་ལ་དགོན་གཞུང་ནས་གཙིགས་ཆེར་བཟུང་སྟེ་འགྲོ་ གྲོན་ཕུད། དེའི་སྟེང་རྩོམ་ཡིག་སྣ་ཚོགས་ཕུད། དེ་ལ་བྱ་དགའི་འགྲན་བསྡུར་ཚོགས་རྒྱུ་གལ་ཆེ་བར་སེམས།
དྲུག བསམ་བློའི་ཀུན་སྤྱོད་སློབ་གསོ།
༡.མི་ཆོས་གཙང་མ་བཅུ་དྲུག་སོགས་ཡ་རབས་མི་ཆོས་ཀྱི་སློབ་གསོ་བཀའ་གདམས་གོང་མའི་བློ་སྦྱོང་དང་། རྒྱལ་སྲས་ཐོགས་མེད་ཀྱི་རྒྱལ་སྲས་ལག་ལེན་སོ་བདུན་མ་སོགས་ཀྱིས།
༢.ཁྲིམས་ལུགས་ཤེས་བྱའི་སློབ་གསོ།
རང་གཅེས་རང་སྲུང་བྱེད་དགོས་ན། སྐབས་བབས་ཀྱི་ཁྲིམས་ལུགས་ཤེས་བྱའི་གོ་ཁྲབ་ཡོད་དགོས།
བདུན། ཁོར་ཡུག་ཆ་རྐྱེན་བསྐྲུན་དགོས།
༡.དཔེ་མཛོད་ཁང་འཛུགས་དགོས། བོད་ཀྱི་དགོན་སྡེ་ནི་བོད་ཀྱི་སློབ་གྲྭ་ཡིན་ན་སློབ་གྲྭའི་ནང་དུ་འཇིག་རྟེན་ལས་འདས་པ་དང་མ་འདས་པའི་ཆོས་ཐམས་ཅད་སྦྱང་དགོས་ལ། རྒྱ་གར་གནའ་སྲོལ་ལྟར་ཕྱི་རོལ་བའི་གྲུབ་མཐའ་ཡང་སྦྱང་དགོས་པ། ནང་སྒོས་སུ་ཆོས་ལུགས་གཅིག་ལས་མཆེད་པའི་བོད་ཀྱི་ས་དགེ་བཀའ་རྙིང་སོགས་ཀྱི་ཆོས་གཞུང་ལའང་སྦྱངས་དགོས། དེ་ཡང་གྲུབ་མཐའ་རང་གཞུང་མཁས་པ་གཞན་གཞུང་ཤེས་པ་ཞིག་བྱེད་དགོས། དེ་མིན་འཇིག་རྟེན་ཁྱིམ་པ་བས་ཆོས་ཀྱི་སྐྱབས་གནས་དང་འཇིག་རྟེན་པའི་བློ་འདྲི་སའི་ཨ་མཆོད་དུ་བཀུར་ནས་ཕྱག་འཚལ་བ་ཡིན་ན། ཕྱག་འཚལ་མཁན་ལས་ཁྱད་དུ་འཕགས་པའི་ཡོན་ཏན་ཞིག་ལྡན་དགོས། ཁྱིམ་པ་ཕོ་མོས་ཤེས་པའི་ཤེས་བྱ་དེ་ཁྱེད་ཚོས་ཤེས་དགོས་ལ། ཁྱིམ་པ་ཕོ་མོས་མི་ཤེས་པའི་ཤེས་བྱ་ཐམས་ཅད་ཀྱང་ཁྱེད་ཚོས་མཁྱེན་དགོས། དེང་སང་གི་དུས་འདིར་ང་རང་ཨ་མཆོད་ཚོ་ལས་སྐྱིད་པོ་ཞིག་སུ་ཡོད། ཅེས་ཟ་འདོད་གྲོང་ཆོག་ཏུ་རྒྱུགས་ནས་ཁ་ལག་ཉི་མར་བསྲོས་ནས་འདུག་ས་གང་ན་ཡོད།
༢.རྩལ་སྦྱང་རྭ་བ་འཛུགས་དགོས། མི་ལུས་རིན་པོ་ཆེ་ཡི་ལུས་བདེ་ན་བསླབ་པ་སློབ་གཉེར་དང་ཆོས་ལ་སྒྲུབ་སྦྱོང་བྱེད་ཐུབ། དེའི་གཞི་རྩའི་ཆ་རྐྱེན་ནི་ལུས་ཕུང་སྦྱོང་བརྡར་བྱེད་རྒྱུ་དེའོ།།
༣.ཚོམས་ཁང་ཆེན་མོ་ཡོད་དགོས། ཚོམས་ཁང་ཆེན་མོ་ཞིག་ཡོད་ན་སྲིད་གཞུང་གི་སྲིད་ཇུས་དྲིལ་བསྒྲགས་བྱེད་ས་ཉན་པ། དེ་འདྲ་མ་བཙུགས་པར་རྒྱལ་ཁབ་ཀྱི་ལས་བྱེད་པ་འདུ་ཁང་གྲལ་མགོ་འམ་ཡང་ན་ཁྲི་སྟེང་ལ་བསྡད་ནས་མར་སྲིད་ཇུས་བསྒྲགས་ན་འོས་མེད་པ། ངེས་པར་དུ་ཚོམས་ཁང་ཆེན་མོ་མཁོ་བས་ཡར་ཞུ་ཡི་གེ་བརྒྱབ་ན་སྲིད་གཞུང་ནས་དངུལ་རེག་ཐུབ་པ་དང་། སྤྱི་ཚོགས་ལས་རིགས་སོ་སོའི་ཆེད་མཁས་པ་གདན་དྲངས་ནས་ཆེད་ཁྲིད་ཀྱི་གོ་སྐབས་ཐོབ་སྟེ་བསམ་བློ་བརྗེ་རེས་བྱས་ཆོག་པ། སྐབས་སྐབས་སུ་བགྲོ་གླེང་ཚོགས་འདུ་དང་གཏམ་བཤད་ཚོགས་འདུ། རྩོམ་རིག་གྱེར་འདོན་སོགས་བྱས་ཆོག བརྙན་འཕྲིན་བལྟ་བར་མཐའ་གཅིག་ཏུ་མི་འགོག་པར་ཆོས་ལུགས་དང་རིག་གནས་ཤེས་བྱའི་འཁྲབ་སྟོན་གྱི་གློག་བརྙན་འཕྲིན་ཚོམས་ཁང་ཆེན་མོ་ནས་ལྷན་དུ་སྟོན་པ།
༤.སྤྱི་སྤྱོད་གསང་སྤྱོད་ཁང་ཡོད་དགོས།
རང་རང་གྲྭ་ཤག་ན་སྤྱི་སྤྱོད་ཁང་ཡོད་རུང་། དགོན་པའི་གླིང་བར་དུ་གསང་སྤྱོད་ཁང་མེད་པས། སྔར་ཡང་ཚོགས་གྲོལ་མ་ཐག་ཆབ་ཆུང་གླིང་བར་དུ་གཏོང་བའི་གནས་ཚུལ་མང་བོ་བྱུང་ནས་ཆབ་གསང་མཁན་པོ་ཞེས་ལྟ་རྟོག་མི་སྣ་བསྐོས་མྱོང་། དེང་སང་དགོན་སྡེ་སོ་སོ་ན་ཆབ་གསང་མཁན་པོའི་མིང་དང་གོ་ཐོབ་མེད་པས། ཚོགས་གྲོལ་བའི་གྲྭ་བཙུན་དང་མཆོད་མཇལ་དུ་ཡོང་བའི་མཇལ་བསྐོར་བ། ལྟ་བསྐོར་དུ་ཡོང་བའི་ལྟད་མོ་བ་རྣམ་པས་མི་གཙང་བ་གང་སར་སྤུངས་ཡོད་པ་གཞན་སྡེས་རིག་ན་ཞེ་མེར་བ། དེང་རབས་དཔལ་ཡོན་དང་མི་མཐུན་པ། ཆོས་ཀྱི་གཞུང་དང་ཡང་འགལ་བའི་བྱ་སྤྱོད་བསྒྱུར་དགོས། དེ་ཡང་ས་གནས་སོ་སོའི་ཡུལ་སྐོར་ཅུས་ལ་ཡར་ཞུའི་ཡི་གེ་ཕུལ་ན། དེའི་ཕྱོགས་ཀྱི་གྲོན་དངུལ་ཡོད་པས་ལོན་ཐབས་བྱེད་དགོས།
༥.སློབ་གྲྭ་ཡོད་དགོས།
སྲོལ་རྒྱུན་གྱི་དགོན་སྡེ་ན་བཤད་གྲྭ་དང་སྒྲུབ་གྲྭ་གཉིས་ཡོད་པ་གཞིར་བཞག་སྟེང་དུ་སློབ་གྲྭ་ཞིག་ངེས་པར་དུ་འཛུགས་དགོས། གྲྭ་གསུམ་ཚང་ན་སྲོལ་རྒྱུན་དང་དེང་རབས་གཉིས་ཟུང་འབྲེལ་གྱི་ཕུལ་བྱུང་དགོན་སྡེ་ཞིག་ཏུ་འགྱུར་ཐུབ།
ཞོར་དུ་དགོན་སྡེ་བཅོས་བསྒྱུར་གྱི་བསམ་ཚུལ་འགའ།
གཅིག དགོན་མ་ལག་ཁུ་བསྡུ།
དགོན་མ་ལག་རྣམས་ཁུ་བསྡུ་བྱེད་དགོས་པར་འདོད།
༡.དེ་མིན་གྲྭ་རྒྱུན་མེད་པར་སྒོ་བརྒྱབ་སྟེ་ལྡེ་མིག་སྲིད་གཞུང་ལ་སྤྲོད་པའི་སྣང་ཚུལ་མཐོང་ཐོས་སུ་གྱུར་མྱོང་།
༢.དཔལ་འབྱོར་གྱི་ཆ་ནས་དགོན་པའི་འཛུགས་སྐྲུན་དང་གྲྭ་བའི་འཚོ་གནས་ཀྱི་ཆ་རྐྱེན། སྤྱི་ཚོགས་ལ་ཁུར་ཆེན་པོ་དང་གྲྭ་བའི་ངོས་ནས་མཐུན་རྐྱེན་ཁག་པོ་རེད།
༣.སློབ་སྦྱོང་གི་ཁོར་ཡུག་གྲྭ་ས་ཆེན་པོ་དང་བསྡུར་ཐབས་མེད་པ།
གཉིས། ལོ་རེར་ཟླ་མཚམས།
སངས་རྒྱས་ཀྱི་བསྟན་པ་ལ་ལུང་རྟོགས་གཉིས་དགོས་པས་བཤད་དང་སྒྲུབ་པའི་སྡེ་གང་ཡིན་རུང་། མ་མཐའ་ལོ་གཅིག་ནང་མཚམས་བསྙེན་སྒྲུབ་ལ་ཟླ་གཅིག་འདུག་ཐུབ་ན། ནང་སེམས་ལ་དྲོད་སྐྱེས། ཆོས་ལ་ཡིད་ཆེས་འཇུག་པའི་ཕན་ཡོན་ཡོད་པར་བསམ། དེ་མིན་ད་ལྟ་ཕྱི་ཚུལ་འདུལ་བ་ཙམ་ལས་རང་གི་ནང་སེམས་འདུལ་ཐུབ་ཀྱི་མེད་པའི་རྟགས་ཤིག་མངོན་ཡོང་གི་འདུག
གསུམ། དུས་ཐུང་སྡོམ་འབོགས།
ད་ལྟ་ཐེ་གོ་རྒྱལ་ཁབ་དང་ཐའེ་ཝན་སོགས་སུ་དུས་ཐུང་ཟླ་བ་ཁ་ཤས་སམ་ཡང་ན་ལོ་ཁ་ཤས་སུ་སྡོམ་པ་་བཟུང་ནས་དགོན་སྡེ་རུ་གྲྭ་བ་བྱས་ཏེ་ནང་ཆོས་སྦྱངས། དུས་ཡུན་ལོངས་ན་སྡོམ་པ་ཡར་ཕུལ་ནས་སླར་གྲོང་དུ་ཡོང་ནས་རང་གི་བྱ་བ་བསྒྲུབ་ཆོག་པ་ནི་ནང་ཆོས་ལ་ཟབ་སྦྱོང་དང་རྒྱུས་ལོན་བྱེད་པའི་གོ་སྐབས་ཐོབ་པ་ཡིན་པས་ཧ་ཅང་བཟང་། དེ་ཡང་ཁ་དོག་དཀར་དམར་ལོ་མང་བོར་རྩོད་པ་སོགས་ཀྱི་དུས་ཡུན་བརྩོན་བསྲི་བཅོས་ནས། ལོ༧ནས༣༠བར་དུ་གཞུང་བཀའ་པོད་སྦྱངས་ཏེ་མུ་མཐུད་སྔགས་ལམ་ཞུགས་ན་མི་ཚེ་འདང་བར་སྙམ། དེ་མིན་མདོ་ལ་མི་ཚེ་ཟད་ནས་སྔགས་ལ་སྦྱངས་པའི་ཆུ་ཚོད་མེད་དུས་ཆོས་རྒྱུད་ལ་ཉམས་སུ་ལེན་མ་ཐུབ་པས་རྟོག་གེ་མགོ་མཁྲེགས་ཟེར་བ་ལྟར་མཚན་ཉིད་པ་སྐམ་པོ་རང་རེད། འདི་ནི་ད་ལྟའི་སྤྱི་ཚོགས་སྟེང་ན་གྲྭ་བ་དང་དགེ་བཤེས་མང་བོ་སྐྱ་སར་བབས་ནས་སླར་ཡང་རང་གིས་སྦྱངས་པའི་ཡོན་ཏན་ངོམ་ཆེད་ཆོས་ལ་རྨ་འབྱིན་པ་མང་བོ་མཐོང་བས། སེང་གེ་རང་སྟེང་གི་འབུས་ཟ་བའི་ལུང་བསྟན་ཡང་ཡིད་ལ་ཝལ་གྱིས་འཆར་ཡོང་། དེ་མིན་གྲོང་དུ་བབས་དུས་གྲྭ་ལོག་སྡོམ་ཤོར་གྱི་ལྟ་བ་དང་མིང་ངན་མི་ལེན་པར་ཁོང་ཚོས་མུ་མཐུད་དུ་ཞིབ་འཇུག་སློབ་མ་དང་། ཡང་ན་བོད་ཀྱི་ཤེས་རིག་ཞིབ་འཇུག་ཚོགས་པར་བྱ་བ་སྒྲུབ་ཐུབ་པ་མུ་མཐུད་དུ་ལྟ་བ་མ་ལོག་པར་སེམས་ཅན་ལ་ཞབས་ཕྱི་སྒྲུབ་གང་ཐུབ་ལག་ཏུ་བླངས་ཆོག དེ་མིན་མི་ལོ་བཅུ་ཕྲག་འགའི་དགོན་སྡེ་ནས་རྩམ་སྐྱ་ཆུ་སྐྱ་བཏང་ནས་སྦྱངས་པའི་ཡོན་ཏན་ཕངས་པའི་བློས་སྙིང་ཁུང་ དྲོན་མོའི་གཏམ་དུ་ཟད་དོ།།
དེ་ཡང་དགོན་པའི་ལས་ཀ་ནི་དབྱར་ཀ་འབྲོག་ཏུ་ཆོས་གསོལ་དུ་འགྲོ་བ་དང་། སྟོན་ཁར་རོང་དུ་ཕེབས་ནས་འབྲུ་གསོལ་བསྡུ་བ། རྒྱ་བོད་གང་རུང་དུ་སོང་ནས་སྦྱིན་བདག་བཙལ་བ། དེའི་ཆ་རྐྱེན་ལ་བརྟེན་ནས་དགོན་པ་སུ་བས་འདུ་ཁང་ཀ་བརྒྱ་མ་བཞེངས་ཡོད། གང་ཞིག་གིས་གསེར་ཏོག་ཆེན་པོ་བསྟད་ཡོད། གང་ན་སྐུ་ཆེན་པོ་ཞིག་བཞེངས་ཡོད་པར་འགྲན་བསྡུར་བྱེད་པ་ནི་ནང་བསྟན་དགོན་སྡེའི་ལས་འགན་གཙོ་བོ་རུ་གཙིགས་འཛིན་བྱེད་པ་བསྐྱུར་ནས་མིག་རྒྱ་བསྐྱེད། བློ་རྒྱ་ཡངས་སུ་བཅུག་ནས་འཛམ་གླིང་ལ་ཁ་ཕྱོགས། ཡེ་ཤུ་ཆོས་ལུགས་ཀྱིས་སྙིང་རྗེ་ངོ་མ་ཞིག་ལག་ལེན་ཏུ་བཏབ་ནས་འཛམ་གླིང་གི་རྒྱལ་ཁབ་ཕལ་མོ་ཆེར་རྒྱ་གྲམ་དམར་བོའི་ཚོགས་པ་བཙུགས་ནས་སྨན་བཅོས་དང་མྱུར་སྐྱོབ་ཀྱི་ལས་ལ་རེམ་པ་དང། དབྱི་སི་ལན་ཆོས་ལུགས་ཀྱིས་ཆོས་ལུགས་ལ་བརྟེན་ནས་རང་རིགས་མཐུན་སྒྲིལ་དམ་པོར་གྱིས་འཛམ་གླིང་དབང་དུ་སྡུད་པར་བརྩོན་པ་ལ་ལྟོས་དང་། སྔོན་ཆད་རང་རེའི་ཆོས་སྲིད་ཀྱི་ལྟེ་བ་ལྷ་ས་ན་ཡེ་ཤུ་ཆོས་ཁང་ཡོད་པ་དང་། ཡུན་ནན་ཁ་བ་དཀར་བོའི་འཇོལ་གྱི་ས་ཆར་ཡེ་ཤུ་ཆོས་ཁང་ཡོད་པ། རང་རེའི་རྒན་རབས་ཀྱི་གྲས་ནའང་ཡེ་ཤུ་ཆོས་ཚོགས་སུ་ཞུགས་པ་ཡོད་ལ། ད་ལྟའི་སློབ་གྲྭ་ཁག་ནའང་ཡེ་ཤེས་ཆོས་ཚོགས་སུ་ཞུགས་པ་མང་བོ་འདུག་པ་མ་ཟད། བོད་ཀྱི་གྲྭ་ལོག་རྩོམ་པ་བོར་རློམ་པ་འགའ་ཡང་ཚོགས་གྲལ་དེར་ཞུགས་ཡོད་དོ།།
གཞན་ཡང་ཁ་ཆེའི་ལྷ་ཁང་མང་བོ་བོད་ཡུལ་དུ་བཏབ་པ་དང་། བོད་ཀྱི་བུད་མེད་མང་བོ་ཁ་ཆེ་དག་གི་མནའ་མར་སོང་བ་སོགས་བགྲང་ལས་འདས་སོ།།
མཇུག་མཐར་བོད་ཀྱི་དགོན་པ་ཆེ་ཆུང་ལ་མ་ལྟོས་པར་ནང་རིག་འཆད་ཉན་གྱི་སློབ་གྲྭ་དང་དེང་རབས་སློབ་གསོའི་སློབ་གྲྭ་གཉེར་རྒྱུ་དང་། དེ་ནས་སྒོམ་སྒྲུབ་ཉམས་ལེན་གྱི་གྲྭར་ཞུགས་རྒྱུ་ནི་ལོ་ངོ་སྟོང་གི་ཐབས་ཇུས་གལ་ཆེན་དུ་བསམ་ནས་རེ་འབོད་དུ་བཏང་བ་ཡིན།
འདི་ནི་རང་ཉིད་ཀྱི་མི་ཚེ་གང་བོར་སློབ་གྲྭ་ཆེ་འབྲིང་ཆུང་གསུམ་དང་ཞིབ་འཇུག་སློབ་མ་སོགས་མི་ལོ་བཅོ་བརྒྱད་བསྟེན་པའི་མྱོང་བ་སྤྱི་བསྡོམས་བྱས་ནས་སྐུ་འབུམ་དྭ་ཕྲུག་སློབ་གྲྭར་སློབ་ཁྲིད་འཆར་གཞི་ལོ་གསུམ་བཟོས། དེའི་ནང་ནས་མཐར་ཕྱིན་སློབ་མས་སློབ་གྲྭ་ཆེན་མོར་རྒྱུགས་འཕྲོད་པ་ཡོད་ལ། དེ་བཞིན་དུ་བོད་ཀྱི་དགོན་སྡེ་སློབ་གསོའང་བཅོས་བསྒྱུར་རེ་བྱས་ན། སྟོན་པ་ཚད་མ་ལ་བསྟན་པ་ཚད་མས་རྒྱུན་བསྲིང་ཐུབ་པའི་རེ་བ་བརྗོད་པ་ཡིན་མོད། གཙོ་བོར་རང་ཉིད་ནས་དགོན་སྡེའི་སློབ་གསོ་ཉམས་སུ་མ་མྱངས་པས་མ་ཤེས་པ་དང་མ་གོ་བ། འགལ་འཁྲུལ་ཉེས་པ་ཡོད་སྲིད་པས་བསམ་པ་བཟང་བོ་དང་ཀུན་སློང་ཡང་དག་པས། ཇི་སྐད་དུ། སྙིང་རྗེ་ལྡན་དང་བྱམས་ཕྱིར་དང་།། སེམས་དགེ་བ་ལ་མྱ་ངན་མེད།། ཅེས་པ་ལྟར་ཉེས་པ་མེད་མོད། འོན་ཏེ་ཡོད་སྲིད་ན་འོད་གསལ་ཆོས་སྐུའི་ངང་དུ་བཤགས་པར་བགྱིའོ།།
Subscribe to:
Post Comments (Atom)
0 comments:
Post a Comment