Friday 28 March 2014
23:29 | 
Posted by
༄༅།། ཨེ་མ་ཧོའི་རིག་མཛོད་། |
ཐོལ་བྱུང་གི་གླུ།།
གངས་དཀར་ལྷུན་པོ་ཡི་མཛེས་རྒྱན།།
ཉི་ཟླ་རྣ་ཆ་ལ་བཏགས་ནས།།
གངས་སེང་གད་རྒྱངས་རེ་སྒྲོགས་པར།།
སྨོན་ལམ་གསོལ་བ་རེ་འདེབས་ཡ།།
སེང་ཕྲུག་ཡོན་ཏན་གྱི་གཡུ་རལ།།
མཐོ་གསུམ་ནམ་མཁའ་ལ་གསིག་ཅིང་།།
རྒྱང་མཐོང་མེ་ལོང་རེ་འཛིན་རྒྱུ།།
སྐུལ་མ་གསོལ་བ་རེ་འདེབས་ཡ།།
ཡ་གའི་བདེ་ལྡན་གྱི་ཞིང་ཁམས།།
མ་གའི་དམྱལ་བ་ཡི་ཟངས་ཆེན།།
གང་དུ་བདམ་རྒྱུ་ཡི་བདམ་ང་།།
བུ་ཁྱོད་སྙིང་རུས་ལ་ཐུག་ཡ།།
ཞེ་རུས་བརྩོན་ལྡན་གྱི་མི་ལ།།
མི་འགྲུབ་བྱ་བ་ནི་ཡོད་མིན།།
གང་བྱུང་ལས་དབང་ལ་ཁ་གཡར།།
རང་ཉིད་གུ་ཡངས་ལ་མ་གཏོང་།།
དགོན་པའི་བླ་མ་དང་སྤྲུལ་སྐུ།།
རྒྱལ་ཁབ་དཔོན་པོ་དང་ལས་བྱེད།།
མ་བསམ་ཁ་ཁ་དང་སོ་སོ།།
བསམས་ན་གཅིག་པ་རུ་འདུག་གོ།
གཅིག་གིས་སེམས་ཅན་གྱི་འགྲོ་དོན།།
ཅིག་ཤོས་མི་དམངས་ལ་ཞབས་འདེགས།།
ཐ་སྙད་འདོག་ཚུལ་ནི་མི་གཅིག །
ལག་ལེན་ཐིགས་པ་རུ་འདྲེས་འདུག །
ཆོས་ལུགས་ཆོས་ལུགས་སུ་སྒྲོག་ཀྱང་།།
སེམས་ཅན་འགྲོ་དྲུག་གི་བདེ་དོན།།
ཆབ་སྲིད་ཆབ་སྲིད་ཅེས་ཟེར་ཡང་།།
མི་དམངས་བདེ་སྐྱིད་ཀྱི་བདག་གཉེར།།
ཚན་ཚན་རིག་པ་ཡི་ཞིབ་འཇུག །
དངོས་པོའི་བདེན་དོན་གྱི་ར་སྤྲོད།།
ཆོས་ལུགས་ཆོས་ལུགས་ཀྱི་ཞིབ་འཇུག །
དངོས་པོའི་མཐར་ཐུག་གི་དེ་ཉིད།།
གཅིག་གིས་དངོས་པོ་ཡི་བདེན་དོན།།
ཀྲི་ཙི་ཀྲུང་ཙི་ལ་དབྱེ་ཞིང་།།
གང་གི་རྟེན་འབྲེལ་གྱི་དངོས་པོ།།
རྡུལ་ཕྲན་ཆ་མེད་ཀྱིས་གྲུབ་པ།།
གང་གིས་བདེ་ལྡན་གྱི་ཞིང་ཁམས།།
གཅིག་གིས་གུང་ཁྲན་གྱི་རིང་ལུགས།།
ཡོད་ན་ཅིག་ཤོས་ཀྱང་མེད་མིན།།
བརྩོན་འགྲུས་སྐལ་ལྡན་གྱི་སྤྱོད་ཡུལ།།
དེང་རབས་བཙོན་པ་ཡི་ལུས་ལ།།
རྫོགས་ཆེན་མཉམ་ཉིད་དང་དབྱེར་མེད།།
དགོངས་ཀློང་རང་གྲོལ་དུ་རྫོགས་པས།།
ཐོལ་བྱུང་གླུ་དབྱངས་འདི་བླངས་སོང་།།
མཐའ་གཅིག་བསྟོད་པ་ཡི་ཕྱོགས་ཞེན།།
མཐའ་གཅིག་སྨད་པ་ཡི་དགག་སྒྲུབ།།
རྟག་ཆད་མཐའ་གཉིས་ལ་མ་ལྷུང་།།
དབུ་མའི་ལམ་ཆེན་ལ་ཞུགས་ཡ།།
༡༩༩༧ལོའི་ཟླ༡ཚེས༡༣དགོང་མོར་ཆུ་གློག་སྒྲིག་ཆས་བཟོ་གྲྭའི་ཆུ་སྐོལ་ཁང་ནས་ཤར་མར་བྲིས།
Subscribe to:
Post Comments (Atom)
0 comments:
Post a Comment