Monday 14 April 2014
00:41 | 
Posted by
༄༅།། ཨེ་མ་ཧོའི་རིག་མཛོད་། |
14/4.14འི་རྒྱབ་ཆོས།
ཡོམ་ཡོམ་ཤིག་ཤིག་འགུལ་བའི་དུས་དེ་ནས།།
སྙིང་ཤ་དུམ་སེ་ཐོར་བའི་མི་ཚོགས་ལ།།
འཆི་བའི་བར་དོ་ཤར་བའི་ལས་སྣང་གིས།།
སྲིད་པའི་སྡུག་བསྔལ་མཚོ་མོ་རབ་ཏུ་གཡོ།།
ལོ་ཟླའི་ཕྲེང་རྡོག་བར་གྱི་མི་ཚེའི་ནང་།།
བྲང་གཞུང་ཚ་བར་གཏོར་བའི་འཇིགས་སྔངས་དང་།།
དཀའ་སྡུག་ས་ཆུ་འདྲེས་པའི་མྱོང་ཚོར་དག།
སྡེ་ཆེན་སྐྱེ་རྒུ་གྲོང་གི་གོད་ཆག་ཡིན།།
སྒྱུ་མའི་ཆོ་འཕྲུལ་སྟོན་པའི་ཡུལ་ཤུལ་ན།།
མི་འདོད་ཐོག་ཏུ་བབས་པའི་སྡུག་བསྔལ་གྱིས།།
སྐྱོ་བའི་ཆོ་ངེ་འདོན་པའི་སྐད་རིང་ནི།།
མི་སྲུན་དུས་ཀྱིས་བཟོས་པའི་ཆོས་ཉིད་ཙམ།།
གནམ་ས་ཆ་ལང་བརྡབ་པའི་སྐྱེ་རྒུ་རུ།།
ཤི་གསོན་ཁ་བྲལ་གྱུར་པའི་མངོན་སུམ་གྱིས།།
ཡ་ཁོག་སྡུག་གིས་བཅོམ་པའི་རྨི་ལམ་དེས།།
མིག་ཀོང་མཆི་མས་བརླན་པ་ཐེངས་གཅིག་མིན།།
ཐ་སྙད་མེ་ཏོག་ཚིག་རོ་བཞི་གཅིག་བཞི།།
ལན་རེར་རྣ་བའི་ཨར་ཁུང་འགྲིམས་ཙམ་གྱིས།།
རུས་རྐང་ཁྲག་ལ་འདྲེས་པའི་གྱོང་གུན་དག།
ལྗོན་ཤིང་མཚོ་ལ་ལྷུང་བའི་ངང་ཚུལ་འདྲ།།
ས་རྡུལ་ལང་ལོང་ཁྲོད་ཀྱི་ཞོགས་པ་དེ།།
ཚེ་སྲོག་ཁྲི་སྟོང་མང་པོའི་གཤེད་མ་ཞིག།
ཁང་བརྩེགས་ཐང་ལ་བརྡབ་པའི་བར་ཆད་ཀྱིས།།
ཚེ་འདིའི་སྣང་བ་ནུབ་པའི་རྐྱེན་དུ་གྱུར།།
སྐད་ཅིག་ཙམ་ལ་གཡོ་འགུལ་ཐེངས་གཅིག་གིས།།
མི་ཐེག་སྙིང་ལ་ཟགས་པའི་ན་ཟུག་བསླངས།།
དེ་རིང་ཡང་ནི་སྐྱེ་རྒུ་མི་བརྗེད་དེ།།
འུར་འུར་རྡིག་རྡིག་ཁྲོད་ཀྱི་མི་རིགས་དྲན།།
2014.4.14ཉིན་ཡུལ་ཤུལ་ནས་བྲིས།
༤，，，.༡༤འི་ས་འགུལ་བྱུང་རྗེས་ཀྱི་པར་འགའ།
༢༠༡༤.༤.༡༣ཉིན་ཟུར་མང་དགོན་ཆེན་གྱིས་4.14འི་དུས་དྲན་འཚོགས་སྐབས་ཀྱི་པར།
Subscribe to:
Post Comments (Atom)
0 comments:
Post a Comment