༄༅།། ཨེ་མ་ཧོའི་རིག་མཛོད།

 

མཆོག་གསུམ་རྒྱལ་བ་སྲས་བཅས་བྱིན་རླབས་དང་། །

རྟེན་འབྲེལ་བསླུ་བ་མེད་པའི་བདེན་སྟོབས་ཀྱིས། །

དད་སྙིང་དྲང་བདེན་མཛད་པའི་སྐྱེ་བོ་ཀུན། །

བཀྲ་ཤིས་དབུ་གདུགས་དཀར་པོ་ཡར་ལ་ལྕོག །

རྩ་བརྒྱུད་བླ་མས་བྱིན་རླབས་སྙིང་ལ་ཞུགས། །

ཡི་དམ་ལྷ་ཡིས་རྗེས་བཟུང་དངོས་གྲུབ་ཐོབ། །

མཁའ་འགྲོ་དམ་ཅན་ལུས་དང་གྲིབ་བཞིན་འགྲོགས། །

གང་བསམ་ལྷུན་གྱིས་འགྲུབ་པའི་བཀྲ་ཤིས་ཤོག །

གནམ་ལ་བཀྲ་ཤིས་འཇའ་འོད་ལམ་སེ་ལམ། །

ས་ལ་བཀྲ་ཤིས་བསངས་མཆོད་ཐུ་ལུ་ལུ། །

བར་ལ་བཀྲ་ཤིས་ཀི་བསྭོ་དུ་རུ་རུ། །

དཔྱིད་དཔལ་སྤྱི་ཡི་ལོ་སར་ཨེ་མ་ཧོ། །

གནམ་ལོ་གསར་ཚེས་ཤེས་རིག་དྲི་མ་དག །

ས་ལོ་གསར་ཚེས་འབྲུ་དྲུག་སྙིང་པོ་སྨིན། །

བར་ལོ་གསར་ཚེས་རྗེ་འབངས་བདེ་སྐྱིད་ལྡན། །

གནམ་ས་བར་སྣང་བཀྲ་ཤིས་བདེ་ལེགས་ཤོག། །

ལོ་ནག་སྲིད་པའི་སྡུག་བསྔལ་དབྱིངས་སུ་ཡལ། །

ལོ་དཀར་མྱང་འདས་བདེ་ཆེན་ཉི་མ་ཤར། །

ལོ་ཟླ་ཞག་དུས་དོན་ལྡན་མི་ཡི་ལུས། །

ལོ་སར་བསྐལ་བཟང་ཉི་མ་ཀུན་ལ་སྨོན། །

རྣམ་དཀར་ལས་ཀྱི་ཅང་ཤེས་ན་གཞོན་ཚོ། །

རྣམ་མཁྱེན་སྒྲུབ་པ་དངོས་ཤུགས་ཞོར་ལ་ཐོབ། །

རྣམ་ཐར་རྒྱ་མཚོའི་སྙིང་པོ་ཕན་བདེ་མཆོག །

རྣམ་པ་ལྷན་རྒྱས་ཀུན་ལ་ཡོང་བར་སྨོན། །

སྐུ་ཚེ་འཆི་མེད་རྒྱལ་མཚན་བརྟན་གྱུར་ཅིག །

ཚངས་དབྱངས་འགག་མེད་ཆོས་དུང་སྒྲོག་གྱུར་ཅིག །

ཐུགས་རྗེ་མཚུངས་མེད་དཔལ་བེར་རྟག་གྱུར་ཅིག །

གང་བསམ་ལྷུན་གྱིས་འགྲུབ་པའི་བཀྲ་ཤིས་ཤོག །

ཚངས༵་དབྱངས༵་སྙན་པའི་གྲགས་པ་ཕྱོགས་ཀུན་ཁྱབ། །

ཕན་བདེ་སྒྱུ་འཕྲུལ་དྲ༵་བ༵་ཕུན་སུམ་ཚོགས། །

ལུགས་གཉིས་འབད་པ་དོན་ལྡན་འཛམ་བུ་གླིང། །

ཞི་བདེའི་རྒྱལ་ཁམས་རིང་དུ་འཚོ་གྱུར་ཅིག །