Tuesday 3 May 2011
13:57 | 
Posted by
༄༅།། ཨེ་མ་ཧོའི་རིག་མཛོད་། |
༄༅། །མི་འགྱུར་རྡོ་རྗེ་ལ་སྤྲིངས་པའི་འཕྲིན་ཐུང་སྨིག་སྒྱུའི་ཆུ་རེག །
ན་མོ་གུ་རུ་བུདྡྷ་ཛྙ་ན་ཡེ། །
སྐྱབས་གནས་རྒྱལ་བ་ཀུན་གྱི་ངོ་བོ་ཉིད། ། མཚུངས་མེད་ཐུགས་རྗེའི་གཏེར་མཛོད་རིན་པོ་ཆེ། ། དྲིན་ཆེན་རྩ་བའི་བླ་མ་ཁྱེད་མཁྱེན་ནོ། ། ཚེ་རབས་ཀུན་ཏུ་ཐུགས་དགྱེས་རྗེས་ཟུངས་ཤིག ། རིང་རིང་ཡུལ་གྱི་བསྐལ་བའི་གྲོགས་པོ་ཁྱེད། ། ཉེ་ཉེར་དམ་པའི་གསུང་དང་མ་མཐུན་ན། ། བརྩེ་བརྩེ་ཆོས་མཆེད་གྲོགས་པོ་ཅི་ལྟར་འགྱུར། ། གདུང་གདུང་སྨྲེ་ངག་འབོད་པ་ཁྱེད་ལ་ཁྲོལ། ། ཀུན་རྟོག་བློ་ཡི་གཞལ་བའི་ཚུར་མཐོང་གཅིག ། ཀུན་གཟིགས་དག་པའི་སྒྱུ་འཕྲུལ་ཞིང་ཁམས་གཉིས། ། ཀུན་མཁྱེན་རྒྱལ་བའི་ཟག་མེད་ཡེ་ཤེས་གསུམ། ། ཀུན་ལ་མཐུན་སྣང་ཉིད་དུ་ཤིན་ཏུ་དཀོན། ། ཀྱེ་མ་སྙིགས་ལྔའི་སྤྱོད་པ་དར་དྲག་ནས། ། ཆོས་ཁྲིམས་དར་གྱི་མདུད་པ་ལྷོད་ནས་ཐལ། ། རྒྱལ་ཁྲིམས་གསེར་གྱི་གཉའ་ཤིང་ཆག་ནས་འདུག ། བྱ་བྱེད་ཐམས་ཅད་ལོག་པར་མ་སོང་ངམ། ། སྣོད་བཅུད་ཐམས་ཅད་སྡུག་བསྔལ་རང་བཞིན་ཤར། ། ལྟ་སྤྱོད་ཐམས་ཅད་མ་རབས་ལད་མོ་དར། ། སྨྲ་བརྗོད་ཐམས་ཅད་སྐྱག་རྫུན་འཁོར་ལོ་བསྐོར། ། ལོངས་སྤྱོད་ཐམས་ཅད་ལོག་འཚོར་མ་སོང་ངམ། ། སྙིགས་མའི་རང་མཚང་མཐོང་ཡང་ངོ་མཚར་ཅན། ། མི་འགྱུར་རྡོ་རྗེ་རང་གཤིས་འགྱུར་མེད་པས། ། ངེས་འབྱུང་བྱང་ཆུབ་སེམས་ཀྱི་བསྐུལ་མ་དང་། ། དད་པ་དག་སྣང་སྐྱེ་བར་ངོ་སོ་བསྟོད། ། རྒྱལ་འགོང་དམ་སྲིའི་བསླུ་བར་མ་ཡིན་པར། ། མཁྱེན་བརྩེའི་དམ་ཚིག་གཏིང་མཐའ་མི་མངོན་ན། ། དམེ་འཁྲུགས་གྱོད་ཁ་གཡོ་སྒྱུའི་ངན་སྦྱོར་ཀུན། ། བསམ་སྦྱོར་མཚོན་ཆ་གཞན་ལ་འཁོར་བར་འགྱུར། ། རྒྱལ་བསྟན་སེམས་པའི་ལྷག་བསམ་རྒྱ་མཚོ་བཞིན། ། དགོས་འདོད་ཀུན་འབྱུང་བསམ་པ་བཟང་པོ་ཞིག ། ཡོད་ན་གཅིག་ཆོག་ཡིད་བཞིན་ནོར་བུ་ལགས། ། ཅི་བྱས་ཆོས་སུ་འགྲོ་བར་གསུངས་མིན་ནམ། ། མདོར་ན་དཔྱོད་ལྡན་མི་འགྱུར་རྡོ་རྗེ་ལ། ། ཁ་ངན་དགྱེས་རྡོར་འགལ་བ་ཅི་མཆིས་བཤགས། ། དགེ་བས་ས་དགེ་བཀའ་རྙིང་བདེན་གྲུབ་རིགས། ། ཕྱོགས་ལས་རྣམ་རྒྱལ་སྐུ་གསུམ་མཐར་ཕྱིན་ཤོག །
ཅེས་པ་འདི་ནི་སྤྲུལ་མི་འགྱུར་རྡོ་རྗེ་ལ་ཤྲྰི་སྨྱོན་པས་ཐོལ་བྱུང་དུ་བྲིས་པ་དགེའོ། །
Subscribe to:
Post Comments (Atom)
0 comments:
Post a Comment