Saturday 7 May 2011
16:19 | 
Posted by
༄༅།། ཨེ་མ་ཧོའི་རིག་མཛོད་། |
ཁྱེད་རྣམས་བླ་མ་དམ་པས་སྐྱོབས།
[7/10/2010 11:00:30 PM]
ང་བླ་མ་མིན་ནོ། །
ཨ་ཁ་མ། ། རྒྱུ་འབྱོར་སྟོབས་ཤུགས་ཆུང་བས་རང་ཡུལ་ཤོར། ། སྤུན་ཟླ་བརྩེ་གདུང་ཆེ་ཡང་ཡུལ་གྱིས་བསྐལ། ། ཉེ་འབྲེལ་ཁྱིམ་གཞིས་སྟོང་ནས་ས་ཞབས་སོང་། ། དགའ་བདེའི་ཉི་ཟླ་མེད་པའི་མཚན་མོ་ཚེས། ། འཇིག་རྟེན་བླ་མ་མ་ཡིན་ཤེས་རིག་མེད། ། མྱང་འདས་བླ་མ་མ་ཡིན་ཐབས་ཤེས་མེད། ། དེང་དུས་རྒྱ་བླ་མ་ཡིན་དགོན་གནས་མེད། ། སྔོན་དུས་བླ་མ་མ་ཡིན་གསར་སྐྱེ་ལགས། ། བདེན་པ་བཤད་ཀྱང་ཀུན་གྱིས་ཉན་མཁན་དཀོན། ། རྫུན་པ་མེད་ཀྱང་སྒྲོ་བཀུར་ཆར་བཞིན་ཕབས། ། པདྨའི་ཟབ་གཏེར་མཇལ་ཡང་རྟེན་འབྲེལ་རལ། ། རྨི་ལམ་སྲིད་པའི་གནས་འདིར་ང་མི་འདོད། ། སོ་ཐར་ངེས་འབྱུང་མེད་པས་གྲོང་མཐར་ཉུང་། ། བྱང་སེམས་བསླབ་པར་མི་བརྩོན་རང་འདོད་མཁན། ། གསང་ཆེན་དམ་ཚིག་མེད་པའི་རལ་བ་ཅན། ། བླ་མ་མ་ཡིན་སྲིད་པའི་རྒན་པོ་བཞིན། ། བོད་ལ་བརྩེ་བ་ཆེ་ཡང་རང་མྱིས་བསླུས། ། རྒྱ་ལ་ཞེ་སྡང་མེད་ཀྱང་དགྲ་རུ་གྱུར། ། དབྱིན་ལ་ཆོས་ཚོང་མ་བྱས་བྲན་གཡོག་ང་། ། བླ་མ་མ་ཡིན་ཀ་ཁའི་དགེ་རྒན་ལགས། ། ཉིན་དུས་དྲིན་ཆེན་ཨ་མར་ནད་གཡོག་བྱས། ། མཚན་དུས་རིག་མཛོད་ནང་དུ་བོད་ཡིག་བྲིས། ། བར་མཚམས་རྣམས་སུ་བསྙེན་སྒྲུབ་ཅུང་ཟད་ལས། ། བླ་མ་མ་ཡིན་རང་རྒྱུས་རང་ལ་ཡོད། ། མཁྱེན་པ་ཀུན་གཟིགས་མཆོག་གིས་ལུང་བསྟན་གསུངས། ། དམ་པ་དག་སྣང་མཁན་གྱིས་ཞབས་བརྟན་བྲིས། ། དམན་པ་ངོ་དགའ་མཁན་གྱིས་བསྟོད་བསྔགས་ཀྱང་། ། བླ་མ་མ་ཡིན་མི་ཚེ་དོན་མེད་ཐལ། ། རྙིང་མའི་བླ་ཆེན་མ་ཡིན་གོ་ས་མེད། ། བཀའ་བརྒྱུད་སྒོམ་ཆེན་མ་ཡིན་ཁྱབ་བསྒྲགས་མེད། ། ས་སྐྱའི་ཁྲི་འཛིན་མ་ཡིན་བདག་མོ་མེད། ། དགེ་ལྡན་ཁྲི་བ་མ་ཡིན་དོལ་དགྲ་ཡིན། ། སྤྲུལ་སྐུ་མ་ཡིན་དགོས་པ་རྒྱུ་མཚན་མེད། ། མཁན་པོ་མ་ཡིན་བརྟན་མཁས་ཡོན་ཏན་མེད། ། དགེ་བཤེས་མ་ཡིན་གྲྭ་སར་སྡོད་ཡུན་ཐུང་། ། བླ་མ་མ་ཡིན་ཉལ་རུལ་རྒད་པོ་ལགས། ། ཆོས་བརྒྱད་མི་དགོས་འཆི་དུས་སྡུག་བསྔལ་རེད། ། དཔོན་པོ་མི་དགོས་རང་མགོ་རང་གིས་ཐོན། ། གཡོག་པོ་མི་དགོས་རང་གཡོག་རང་གིས་ཐུབ། ། བླ་མ་མ་ཡིན་ཁྱེད་རང་བདེ་བར་ཕེབས། ། ཞེས་གྲོགས་པོ་ཀུན་དགས་ཁྱེད་མཁན་ཆེན་བླ་མ་ལགས་རེད་འཛམ་གླིང་རྒྱལ་ཁབ་ཕྱི་ནང་ཀུན་ཏུ་གྲགས་པའི་བླ་ཆེན་དམ་པ་ཞིག་རེད་ཟེར་བའི་ལན་ཙམ་དུ་ཐོལ་བྱུང་དུ་ཤྲྰི་སྨྱོན་པས་ངོ་དེབ་ནང་ནས་མགྱོགས་འཕྲིན་ཕུལ་བ་བཅོས་བསྒྱུར་མེད་པར་བཀོད་པར་དགེའོ། །
Subscribe to:
Post Comments (Atom)
0 comments:
Post a Comment