Thursday, 9 June 2011
21:13 | 
Posted by
༄༅།། ཨེ་མ་ཧོའི་རིག་མཛོད་། |
༄༅། །གཉུག་མའི་རང་བྱུང་གི་སྟོན་པ་དང་བསྟན་པའི་གནས་ལུགས། །
ན་མོ་གུ་རུ་བུདྡྷ་ཛྙྰ་ན་བྷོ་དྷི་ཙིཏྟ་ཡེ། །
ཆོས་དབྱིངས་ཀ་དག་གཉུག་མའི་ཡེ་ཤེས་སྤྲོས་བྲལ་འདུས་མ་བྱས་པའི་སྐུ། །
ཆོས་ཉིད་ལྷུན་གྲུབ་རིག་རྩལ་ཞིང་ཁམས་ཁ་སྦྱོར་ཡན་ལག་བདུན་ལྡན་སྐུ། །
ཆོས་ཅན་འགགས་མེད་སྣ་ཚོགས་སྣང་བ་གང་ལ་གང་འདུལ་སྤྲུལ་པའི་སྐུ། །
སྐུ་གསུམ་རྒྱལ་བའི་དབང་པོར་བཅས་པར་སྒོ་གསུམ་མི་ཕྱེད་དད་པས་འདུད། །
ཆོས་འབྱུང་ལོ་རྒྱུས་རྣམ་དག་ཤེས་པར་ཚུལ་མཐོང་ཀུན་རྫོབ་ཚད་མས་འཇལ། །
ཆོས་སྲིད་བསྟན་པའི་དར་རྒུད་སྣ་ཚོགས་ཚོགས་དྲུག་ཡུལ་ལས་མ་འདས་ཕྱིར། །
ཆོས་ཀྱི་དག་སྣང་སྲིད་ལ་མ་གཡོག་སྲིད་ཀྱི་དབང་ཤུགས་མ་ཁྱེར་བར། །
གཟུར་གནས་བློ་ལྡན་དོན་གཉེར་ཚོགས་ལ་དྲང་བདེན་རིགས་པའི་ལམ་འདི་སྟོན། །
གཟུགས་སྒྲ་དྲི་རོ་རེག་བྱའི་ཡིད་དབང་འགལ་མེད་སྙོམ་མེད་འཆད་ནུས་ན། །
ཐ་སྙད་ཞིབ་འཇུག་ལོ་རྒྱུས་རྣམ་ཐར་འཇིག་རྟེན་སྲིད་པའི་རྒྱན་ཆ་དངོས། །
སྒྲོ་བཏགས་བཀུར་འདེབས་གྲུབ་མཐའ་རྩོམ་པའི་རྒྱལ་བསྟན་བཤིག་པའི་ཆོམ་རྐུན་དག །
དྲན་ཤེས་བག་ཡོད་བསྟེན་པར་འོས་པའི་དད་བརྩོན་ལྕག་གིས་ཡང་ཡང་བསྐུལ། །
བདག་ཅག་སྟོན་པ་ཐབས་མཁས་བདག་ཉིད་མཛད་པ་བཅུ་གཉིས་ཚུལ་བསྟན་པ། །
བྱང་ཆུབ་ཐུགས་བསྐྱེད་ཟབ་རྒྱས་ལམ་ལ་བསྐལ་ཆེན་དུ་མར་ཚོགས་བསགས་ཏེ། །
བསོད་ནམས་ཡེ་ཤེས་ཚོགས་གཉིས་རྒྱ་མཚོའི་དཔལ་ཡོན་མ་ལུས་ཡོངས་རྫོགས་ནས། །
སྙིགས་ལྔའི་འགྲོ་ལ་ལྷག་པར་དགོངས་ནས་གཟིགས་པ་རྣམ་ལྔས་ཞིང་འདིར་ཕེབས། །
༡
བཞི་བཅོམ་ལྔ་ལྡན་ཕུན་སུམ་ཚོགས་པས་དགའ་ལྡན་ལྷ་ཡུལ་ཆོས་ལ་བཀོད། །
རྒྱལ་ཚབ་ཆེན་པོ་མི་ཕམ་མགོན་པོ་ལྷ་རྣམས་འདུལ་བར་མངའ་གསོལ་ནས། །
རིག་བྱེད་དགྱེས་པའི་གླང་ཆེན་སྒྱུ་འཕྲུལ་དམ་པ་འོད་དཀར་ཛམ་གླིང་དུ། །
ཐུགས་རྗེ་ཆེན་པོས་རྩོད་དུས་མགོན་དུ་དགའ་ལྡན་གནས་ནས་འཕོ་བར་མཛད། །
༢
དུས་གསུམ་ཀུན་མཁྱེན་རྒྱལ་བའི་དབང་པོས་དགོངས་བཞིན་སྤྲུལ་པའི་གཟུགས་སྐུ་རུ། །
ངོ་མཚར་དགེ་མཚན་བཅོ་བརྒྱད་དང་བཅས་ས་ག་ཟླ་བའི་ཡར་ཚེས་ལ། །
ཡུམ་ཆེན་དག་བདེའི་གཟིམ་ལམ་ཇི་བཞིན་ཆོས་ཉིད་རྣལ་མའི་ཏིང་འཛིན་གྱིས། །
ལྷ་ལས་བབས་ནས་གླང་ཆེན་ལྟར་གཤེགས་སྒྱུ་མ་ལྷ་མཛེས་ལྷུམས་སུ་ཞུགས། །
༣
བྱང་ཆུབ་སེམས་ཀྱི་རྩལ་ཆེན་ཕྱིན་པས་ཟླ་བ་བཅུ་རྫོགས་རྒྱལ་བའི་སྲས། །
ཤཱཀྱའི་གཞོན་ནུ་དོན་ཀུན་གྲུབ་པ་བཀྲ་ཤིས་ལུམ་བིའི་ཚལ་དུ་བལྟམས། །
གང་ཚེ་རྐང་གཉིས་མཆོག་ཅེས་བསྟོད་པའི་ཚངས་དབང་བརྒྱ་བྱིན་འཁོར་གྱིས་བཏུད། །
འཇིག་རྟེན་འདྲེན་པའི་ཟས་གཙང་སྲས་པོ་མཚན་དཔེའི་དཀྱིལ་འཁོར་གསར་དུ་བཞད། །
༤
ཚར་གཅོད་རྗེས་འཛིན་ཀུན་ཤེས་ཐོབ་ཕྱིར་སྒྱུ་རྩལ་དྲུག་ཅུ་རྩ་བཞི་དང། །
ཕྱི་ནང་ཐུན་མོང་རིག་གནས་བསྟན་བཅོས་སློབ་སྦྱོང་ཀུན་ལ་མཐར་ཕྱིན་ནས། །
སྐྱེ་བོ་ངན་པའི་དྲེགས་ཅན་ཚར་བཅད་གཟུ་ལུམ་ཐམས་ཅད་ཟིལ་གྱིས་གནན། །
འགྲན་མེད་སྟོབས་ལྡན་མི་ཡི་སེང་གེ་ཤྰཀྱའི་རྒྱལ་པོས་འཁོར་ལོར་བསྒྱུར། །
༥
འཇིག་རྟེན་ཆོས་དང་མཐུན་པར་བྱ་ཕྱིར་འདོད་ཡོན་རོལ་བའི་མཛའ་ན་མོ། །
ས་འཚོ་མ་དང་གྲགས་འཛིན་ཅན་མ་རི་དྭགས་སྐྱེས་མ་གྲོགས་སུ་བསུས། །
མཛེས་མཛངས་བཙུན་མོ་འཁོར་གྱིས་སྐོར་ནས་རྒྱལ་སྲིད་དམ་པ་ཆོས་བཞིན་སྐྱོང་། །
ཐུགས་བསྐྱེད་རྟེན་འབྲེལ་དུས་སུ་སྨིན་པས་སྒྲ་གཅན་འཛིན་ཡང་གསར་དུ་བསྐྲུན། །
༦
ཡིད་འོང་སྐྱེད་ཚལ་རྒྱང་རྒྱུར་ཕེབས་ནས་གྲོང་ཁྱེར་སེར་སྐྱའི་ཕྱོགས་མཚམས་ནས། །
སྐྱེ་རྒ་ན་འཆི་འཁོར་བའི་བྱ་བ་སྙིང་བོ་མེད་པར་ལེགས་གཟིགས་ཏེ། །
ཐུགས་དམ་རྒྱུད་བསྐུལ་རྒྱལ་ཆེན་སྡེ་བཞིས་ནམ་མཁའི་དབྱིངས་སུ་སྤྱན་དྲངས་ཏེ། །
མཆོད་རྟེན་རྣམ་དག་དྲུང་དུ་བྱོན་ནས་དབུ་སྐྲ་བཅད་དེ་རབ་ཏུ་བྱུང་། །
༧
ཐབས་ཤེས་མཆོག་གི་དམ་བཅའ་བརྩོན་པས་དཀའ་སྤྱད་ཆེན་པོས་ལོ་དྲུག་ཏུ། །
ནེེ་རཉྫ་ནའི་འགྲམ་དུ་སྐྱིལ་ཀྲུང་མ་གཡོས་ཏིང་འཛིན་ངང་ནས་སྒྲུབ་པར་བརྙེས། །
བྱང་ཆུབ་སེམས་ཀྱི་རང་བཞིན་མཐོང་ནས་དཀར་གསུམ་བདུད་རྩིར་ལོངས་སྤྱོད་པས། །
སྐུ་མཆོག་གསེར་མདོག་མཚན་དཔེའི་དཔལ་འབར་བལྟ་བས་མི་ངོམས་དྲང་སྲོང་རྒྱལ། །
༨
བསྐལ་བཟང་སངས་རྒྱས་སྟོང་དང་རྩ་གཉིས་མངོན་འཚང་རྒྱལ་སའི་རྡོར་གདན་དུ། །
བྱང་ཆུབ་མཆོག་གི་ཤིང་དྲུང་ཕྱིན་ནས་མི་འཇིགས་རྩ་སྟན་སྟེང་བཞུགས་ནས། །
བསྐལ་མང་རྙེད་དཀའི་བྱང་ཆུབ་མ་ཐོབ་མི་གཡོ་ཐུགས་དམ་ཆོས་བདུན་ངང་། །
བྱང་ཕྱོགས་སོ་བདུན་སྤངས་རྟོགས་ཡོན་ཏན་སྐད་ཅིག་ཉིད་ལ་རྫོགས་པར་མཛད། །
༩
བྱང་ཆེན་ཐོབ་པའི་རྨིས་ལྟས་བཟང་པོས་བདུད་དམག་བྱེ་བའི་སྙིང་ཁམས་དཀྲུགས། །
ཆགས་སྡང་རྨོངས་པའི་ཆོ་འཕྲུལ་མཚོན་ཆར་ཏིང་འཛིན་ཐབས་ཤེས་རྒྱན་དུ་གྱུར། །
སྐུ་གསུམ་དོན་གྱི་རྒྱལ་བ་མཆོག་ལ་མངོན་པར་རྫོགས་པར་སངས་རྒྱས་པས། །
འཇིགས་རུང་བདུད་སྲིན་དཔུང་ཚོགས་བཅས་པར་མི་མངོན་དབྱིངས་སུ་འཇའ་ལྟར་ཡལ། །
༡༠
ཟབ་ཞི་སྤྲོས་བྲལ་འོད་གསལ་སྙིང་པོ་འདུས་མ་བྱས་པའི་ངོ་བོ་ཉིད། །
བདུད་རྩིའི་རང་བཞིན་སྐྱེ་འཆི་བྲལ་བའི་སྨིན་གྲོལ་ཡེ་ཤེས་རབ་ཏུ་བརྙེས། །
འོག་མིན་གནས་དང་རིགས་ལྔའི་ཞིང་དུ་དག་མཉམ་རྫོགས་པའི་ཐུགས་རྗེའི་དཔལ། །
ཁམས་གསུམ་ཆོས་ཀྱི་རྒྱལ་པོ་ཆེན་པོ་སངས་རྒྱས་ཤྰཀྱ་ཐུབ་པར་གྱུར། །
༡༡
ཚངས་དང་བརྒྱ་བྱིན་དངོས་འབྱོར་མཆོད་ནས་ཆོས་འཁོར་བསྐོར་བར་བསྐུལ་བྱས་པས། །
དྲང་སྲོང་ལྷུང་བ་རི་དྭགས་ནགས་སུ་ལྔ་སྡེར་བདེན་བཞིའི་ལམ་སྟོན་མཛད། །
བྱ་རྒོད་ཕུང་པོའི་རི་བོའི་སྤོ་རུ་ལྷ་མིར་སྟོང་ཆེན་ཆོས་འཁོར་བསྐོར། །
ཡངས་པ་ཅན་དང་ངེས་མེད་གནས་སུ་གཤེགས་སྙིང་གསང་ཆེན་བསྟན་པ་གསུངས། །
༡༢
བཅོམ་ལྡན་འདས་ཀྱི་ཡེ་ཤེས་དམ་པའི་གསང་གསུམ་བགྲེས་རྒུད་བྲལ་ན་ཡང་། །
རྟག་འཛིན་ཆེ་བའི་སོ་སྐྱེའི་ཚོགས་དང་འཕགས་གསུམ་ཆོས་ལ་བསྐུལ་བའི་ཕྱིར། །
ཟག་མེད་རྡོ་རྗེའི་སྐུ་མཆོག་དེ་ཡང་རེ་ཞིག་མྱ་ངན་འདའ་བར་བསྟན། །
དོན་དམ་ཕྱག་རྒྱའི་ཐུབ་པ་མཆོག་ཉིད་འཁོར་འདས་གཡུལ་ལས་རྣམ་པར་རྒྱལ། །
བདེ་གཤེགས་སྲས་བཅས་ཀུན་གྱི་མཛད་པ་སྨོན་ལམ་ཡེ་ཤེས་ཇི་འདྲ་བ། །
དེ་འདྲ་ཁོ་ནར་བདག་སོགས་གྱུར་ནས་སྡུག་བསྔལ་གསུམ་གྱིས་རྒྱུན་ཆད་དེ། །
སྐྱེ་རྒ་ན་འཆིའི་རྒྱ་མཚོར་བྱིང་བའི་ཁམས་གསུམ་འཁོར་བ་དོང་སྤྲུགས་ནས། །
ཅེས་པ་ཡང་རབ་རྒྱན་ལྕགས་ཡོས་ས་ག་ཟླ་བའི་ཡར་ཚེས་བདུན་ལ་རྒྱལ་བ་རྫོགས་པའི་སངས་རྒྱས་ཉིད་ལ་མི་ཕྱེད་པའི་དད་པ་ཅན་རིག་འཛིན་བླ་མ་དཔལ་དགྱེས་པ་རྡོ་རྗེས་དབྱིན་ཡུལ་བོད་བརྒྱུད་རྣལ་འབྱོར་ཆོས་ཚོགས་ཁང་ནས་གང་ཤར་སྙིང་ནས་གསོལ་བ་འདེབས་པ་དགེའོ། ། ཤྲྰི་ཨ་ནནྟ་སརྦ་ལོ་ཀ་བི་ཛ་ཡནྟུ། །
Subscribe to:
Post Comments (Atom)
0 comments:
Post a Comment