Sunday 31 July 2011
02:10 | 
Posted by
༄༅།། ཨེ་མ་ཧོའི་རིག་མཛོད་། |
༄༅། །དཔལ་དགྱེས་པ་རྡོ་རྗེའི་སྨོན་ལམ་ཀུན་བཟང་རྒྱལ་པོ། །
ན་མོ་གུ་རུ་རཏྣ་བྷྱཿ
ཐུགས་རྗེས་གཞན་དོན་རབ་བསྒོམས་པས། །ཉིད་ཀྱི་སྐུ་སྲོག་གཏོང་བ་ལ། ། འགུམས་པ་སོས་ལྟར་རབ་དགྱེས་པ། །དཔལ་དགྱེས་རྡོ་རྗེ་ལ་ཕྱག་འཚལ། ། ཕྱོགས་དུས་རྩ་གསུམ་རྒྱལ་བ་དང་། །ཆོས་སྐྱོང་གེ་སར་རྒྱལ་པོ་ལ། ། ཕྱག་འཚལ་ཡན་ལག་བདུན་པའི་ངང་། །མི་ཕྱེད་སྒོ་གསུམ་དད་པས་མཆོད། ། རབ་འབྱམས་སྲས་བཅས་རྒྱལ་བ་དང་། ། ནམ་མཁའ་མཉམ་པའི་སེམས་ཅན་ལ། ། དད་དང་སྙིང་རྗེའི་སྨོན་འཇུག་གིས། །བསྟན་འགྲོར་ཕན་བདེས་སེམས་བསྐྱེད་དོ། ། མཁའ་ཁྱབ་མ་གྱུར་འགྲོ་བ་ཡི། །སྡིག་སྡུག་མ་ལུས་བདག་ལ་སྨིན། །བསོད་ནམས་ཡེ་ཤེས་རྒྱ་མཚོའི་ཚོགས། །འགྲོ་ཀུན་རྒྱུད་ལ་སྨིན་གྲོལ་ཤོག ། ལས་ངན་བག་ཆགས་རབ་དག་ཅིང་། །ཉོན་མོངས་མི་ཤེས་རྨོངས་པ་སེལ། ། ལོག་ལྟའི་བདུད་དང་མུ་སྟེགས་བོན། །བཟང་པོ་སྤྱོད་ལ་འགོད་པར་ཤོག ། ཁྱད་པར་གངས་ཅན་བསྟན་པའི་དགྲ། །དམ་སྲི་རྒྱལ་འགོང་དོལ་འདྲེའི་ཚོགས། ། ཐབས་མཁས་ཆེན་པོས་བྱིན་རླབས་ཀྱིས། ། མྱུར་ཏུ་ཞི་ཞིང་དུལ་གྱུར་ཅིག ། བསོད་ནམས་དགེ་བསགས་ཇི་སྙེད་པ། །མ་གྱུར་འགྲོ་ལ་བསྔོ་བའི་མཐུས། ། ཀུན་ཀྱང་སྒྲིབ་བྱང་ཚོགས་རྫོགས་ནས། མྱུར་དུ་སངས་རྒྱས་ས་ཐོབ་ཤོག །བླ་མེད་བྱང་ཆུབ་སེམས་མཆོག་གི །མཐའ་ཡས་འགྲོ་ཁམས་རྒྱུད་ཕྱུག་ནས། ། ཀུན་ཀྱང་ཞི་བདེ་ཐེག་པའི་ཆོས། །སྒོ་གསུམ་དགེ་བར་རྟག་རོལ་ཤོག ། འཇིག་རྟེན་འཁོར་བར་ཞེན་ལོག་གིས། །མྱང་འདས་ཉན་ཐོས་རང་རྒྱལ་གྱི། ། བདེན་བཞི་རྟེན་འབྲེལ་བྱང་ཆུབ་ནས། །གནས་བརྟན་དགྲ་བཅོམ་ཐོབ་པར་ཤོག ། ལྷག་བསམ་དྲི་མེད་གཞན་ཕན་སེམས། །འཇིག་རྟེན་ཡ་རབ་ལྟ་སྤྱོད་རིགས། ། ཆོས་དཔལ་རིག་པའི་གཞུང་ལུགས་ལ། །ཐབས་ཤེས་ཡོན་ཏན་རྒྱས་པར་ཤོག ། ཕ་མའི་དྲིན་ལན་འཇལ་བ་དང་། །སྤུན་ཟླའི་མདུན་ལམ་ཆིག་སྒྲིལ་ནས། ། ལ་རྒྱའི་རྒྱལ་མཚན་རིན་པོ་ཆེ། །ཆོས་སྲིད་དར་རྒྱས་བརྟན་པར་ཤོག ། རྒྱལ་ཁབ་མཐུ་དཔལ་མཐའ་ནས་རྒྱས། །འཇིག་རྟེན་བདེ་ཞིང་སྐྱིད་པ་ཡི། ། དཔལ་འབར་བཀྲ་ཤིས་བདེ་ལེགས་ཤིང་། །ཚེ་རིང་ནད་མེད་ཕུན་ཚོགས་ཤོག ། ས་ཆུ་མེ་རླུང་འབྱུང་བ་དང་། །ནམ་མཁར་རྟེན་པའི་སེམས་ཅན་ཀུན། ། ལུས་བདེ་སེམས་སྐྱིད་དམ་པའི་ཆོས། །གེགས་མེད་ཡིད་བཞིན་ལྷུན་འགྲུབ་ཤོག ། དལ་འབྱོར་རྙེད་དཀའི་རིན་ཆེན་ལུས། །དོན་ལྡན་སྲིད་ལས་ཐར་པའི་ཕྱིར། ། ཉིན་མཚན་གཡེལ་བ་མེད་པ་ཡི། །ཐོས་བསམ་བསྒོམ་ལ་འབད་པར་ཤོག ། དགྲ་གྲོགས་མ་ངེས་སོ་སོར་འབྲལ། །ནོར་རྫས་མི་རྟག་ཟད་པའི་རྒྱུ། ། སྒྱུ་ལུས་འཇིག་པའི་འཁྲུལ་བ་ཀུན། །འདུས་བྱས་རང་མཚན་མཐོང་བར་ཤོག ། རང་ཕྱོགས་ཞེན་ཆགས་འདོད་པ་དང་། །གཞན་ཕྱོགས་སྡང་ཞིང་ཁྲོ་བ་ཀུན། ། བླང་དོར་རྨོངས་པའི་མ་རིག་པའི། །དུག་གསུམ་རྩ་ནས་སྤོང་བར་ཤོག ། སྟོན་པའི་རྒྱལ་ཚབ་དགེ་བའི་བཤེས། །མི་ཟད་ལོངས་སྤྱོད་ཡོན་ཏན་གཏེར། ། འབྱུང་གནས་བླ་མ་རིན་ཆེན་ལ། །མཉེས་པ་གསུམ་གྱིས་བསྟེན་པར་ཤོག ། བསླུ་མེད་གཏན་གྱི་སྐྱབས་གནས་མཆོག །དཀོན་མཆོག་རིན་ཆེན་རྣམ་གསུམ་ལ། ། དང་འདོད་ཡིད་ཆེས་མི་ཕྱེད་པའི། །དད་གུས་ངེས་ཤེས་སྐྱེ་བར་ཤོག ། བདེ་སྡུག་ལས་ཀྱི་རྣམ་གྲངས་ཀུན། ། རྒྱུ་འབྲས་རྟེན་འབྲེལ་མི་བསླུ་ཕྱིར། ། སྲོག་ལ་བབ་ཀྱང་སྡིག་པའི་ལས། །ཀུན་གྱིས་ནམ་ཡང་མི་བྱེད་ཤོག ། སྲིད་གསུམ་བདེ་ལ་མི་ཆགས་པར། །ཐར་པའི་གོ་འཕང་རིན་ཆེན་ལ། ། ངེས་འབྱུང་རྣམ་དག་བསམ་པ་ཡིས། །བློ་གྲོས་ནམ་ཡང་མི་ཉམས་ཤོག ། འཇིག་རྟེན་འཁོར་བར་ཞེན་ལོག་གིས། །མྱང་འདས་ཉན་ཐོས་རང་རྒྱལ་གྱི། ། བདེན་བཞི་རྟེན་འབྲེལ་བྱང་ཆུབ་ནས། །གནས་བརྟན་དགྲ་བཅོམ་ཐོབ་པར་ཤོག ། བླ་མེད་བྱང་ཆུབ་སེམས་མཆོག་གི །མཐའ་ཡས་འགྲོ་ཁམས་རྒྱུད་ཕྱུག་ནས། ། ཀུན་ཀྱང་ཞི་བདེ་ཐེག་པའི་ཆོས། །སྒོ་གསུམ་དགེ་བར་རྟག་རོལ་ཤོག ། སྡུག་ཀུན་བདག་བདེ་འདོད་ལས་བྱུང་། བདེ་ཀུན་གཞན་ཕན་ལས་བྱུང་ཕྱིར། ། བདག་གཞན་བརྗེ་བའི་བྱང་ཆུབ་སེམས། །ཀུན་གྱིས་རྒྱུད་ལ་འཁྲུངས་པར་ཤོག ། བསྟན་འགྲོའི་ཆོམ་རྐུན་ཇག་པ་ཡིས། །བདག་གི་ཆོས་ནོར་ལོངས་སྤྱོད་ཀུན། ། འཕྲོག་ཅིང་བསད་པར་བྱས་ན་ཡང། །བདག་གཞན་དགེ་བས་སྨིན་པར་ཤོག ། འགའ་ཞིག་བདག་ལ་ཉེས་མེད་བཞིན། །གཞི་མེད་སྒྲོ་བསྐུར་མི་སྙན་ཚིག ། མཚང་བྲུ་དམོ་ངན་བདོ་ན་ཡང་། །གདམས་ངག་མཆོག་ཏུ་མཐོང་བར་ཤོག ། སྨྱོས་ནད་གནར་བཞིན་འགྲོ་བ་དག །བདག་གི་སྙིང་བཞིན་གཅེས་ན་ཡང་། ། དགྲ་བཞིན་བདག་ལ་གནོད་བྱས་ཀྱང་། །དགེ་སྦྱོར་སྙིང་བརྩེ་སྐྱེ་བར་ཤོག ། མཐོ་དམན་མཉམ་པའི་སྐྱེ་བོ་ཡིས། །ང་རྒྱལ་བརྙས་ཐབས་བྱས་ན་ཡང་། ། འབྱོར་རྒུད་མི་རྟག་ཆོ་འཕྲུལ་ལ། །ཞུམ་མེད་བློ་སྦྱོང་ཡོང་བར་ཤོག ། རྙེད་བདེ་གྲགས་བསྟོད་རབ་རྒྱས་ཀྱང་། །དོན་མེད་འཇིག་རྟེན་ཆོས་བརྒྱད་ལ། ། ཞེན་མེད་ཁེངས་པ་ཀུན་བྲལ་ནས། །བྱ་བྲལ་སྤྱོད་པ་གཤེགས་པར་ཤོག ། ཞི་བདེ་འབྱུང་བའི་ཐབས་ཤེས་མཆོག །བྱམས་དང་སྙིང་རྗེའི་རྩ་བ་བརྟན། ། རང་རྒྱུད་དྲན་ཤེས་ཞི་དུལ་ངང་། །ཆོས་དང་འདུལ་བ་བཞིན་དུ་ཤོག ། གཟུགས་སྒྲ་དྲི་རོ་རེག་བྱ་ལ། །སྲེད་ལེན་ཞེན་པའི་སེམས་ཅན་ཀུན། ། མི་རྟག་སྟོང་པ་བདག་མེད་པའི། །གཉེན་པོ་ཚུལ་བཞིན་བརྟེན་ནུས་ཤོག ། སྣང་བ་དཀར་དམར་སེམས་ལས་འཁྲུལ། །སེམས་ཉིད་སྤྲོས་པའི་རྩ་བ་ཆོད། ། གཟུང་འཛིན་མཚན་མ་བྲལ་བ་ཡི། །དམིགས་མེད་ངང་དུ་གནས་པར་ཤོག ། དམ་པའི་ཆོས་ཀྱི་དོན་སྟོན་ཅིང་། །དཔལ་འབྱོར་འདོད་དགུའི་ལོངས་སྤྱོད་སྟེར། ། མི་འཇིགས་སྲོག་གི་སྦྱིན་པ་དང་། །བསྡུ་དངོས་བཞི་ཡིས་སྨིན་པར་ཤོག ། སོར་བྱང་སྔགས་སྡོམ་པ་ལེགས་གནས་ཞིང་། །སྦྱོར་དངོས་རྗེས་གསུམ་ཚང་བ་ཡིས། ། སེམས་ཅན་དོན་སྒྲུབ་བྱ་བ་ལ། །དྲན་ཤེས་བག་ཡོད་བརྟེན་པར་ཤོག ། ཆོས་དང་འཇིག་རྟེན་གནོད་པའི་ཚོགས། །སྒོ་གསུམ་མི་མཐུན་ཉེས་ཀུན་ལ། ། བཟོད་པའི་དཀའ་ཐུབ་ལེགས་བརྟེན་ནས། །ཀུན་ལ་ཞེ་འགྲས་མེད་པར་ཤོག ། ལེ་ལོ་ངན་ཞེན་བདག་ཉིད་བརྙེས། །དོན་མེད་མི་ཚེ་མི་འདའ་བར། ། མངོན་མཐོ་ངེས་ལེགས་བྱང་སེམས་ལ། །རྟག་ཏུ་བརྩོན་འགྲུས་བྱེད་པར་ཤོག ། འདུ་འཛི་ངན་པ་རབ་སྤངས་ནས། །དབེན་པའི་རི་ལ་དགེ་བར་སྦྱོར། ། འཇིག་རྟེན་འདས་པའི་ཞི་ལྷག་གི །ཏིང་འཛིན་རྩེ་གཅིག་སྒོམ་པར་ཤོག ། ཀུན་རྫོབ་བདེན་པར་རྒྱུ་འབྲས་ཞིབ། །དག་གཟིགས་བདེན་པར་དག་སྣང་ཐོབ། ། དོན་དམ་འཁོར་གསུམ་མི་རྟོག་པའི། །ཤེས་རབ་ཕ་རོལ་ཕྱིན་ཐོབ་ཤོག ། ཐབས་སྟོབས་སྨོན་ལམ་ཡེ་ཤེས་ཀྱི། །ཀུན་བཟང་རྒྱལ་བའི་ས་ལམ་མཆོག ། རིག་འཛིན་རྣམ་བཞི་གོ་འཕང་ཉིད། །འབད་མེད་ལྷུན་གྱིས་གྲུབ་པར་ཤོག ། བརྟག་དཔྱད་ཚད་མས་ཆོས་དང་ནི། །ཆོས་མིན་རིགས་པས་ཚར་གཅོད་ནས། ། མ་རིག་ལོག་པའི་འགྲོ་བ་རྣམས། །ཆོས་བཟང་ཤེས་རབ་འབྱེད་པར་ཤོག ། སོ་སོར་ཡང་དག་རིག་པ་བཞིས། ། བདེན་བཞིའི་བླང་དོར་ལེགས་བསྟན་ནས། ། ཉོན་མོངས་མེད་པའི་ཐེག་ཆེན་ལམ། །རབ་ཏུ་གཅེས་འཛིན་བྱེད་པར་ཤོག ། བློ་དོན་བསམ་པ་ཆོས་སུ་འགྲོ། །ཆོས་ལམ་བར་ཆད་མེད་པ་དང་། ། ལམ་གྱི་འཁྲུལ་པ་རབ་སེལ་ནས། །ཆོས་སྐུའི་དགོངས་པ་རྟོགས་པར་ཤོག ། མདོར་ན་སྤྱོད་ལམ་ཅི་བྱེད་ཀྱང་། །དྲན་ཤེས་བག་ཡོད་མ་ཉམས་པར། ། རང་སེམས་དག་པའི་དགེ་བ་ཡིས། །བསྟན་འགྲོའི་དོན་ཆེན་ལྷུན་གྲུབ་ཤོག ། འདིར་སྨྲས་དགེ་བས་བདག་གཞན་ཀུན། །ཀུན་ཏུ་བཟང་པོའི་སྤྱོད་པ་དང་། ། སྐལ་བ་དག་དང་རབ་མཉམ་ནས། །དག་རྫོགས་སྨིན་གྲོལ་མཐར་ཕྱིན་ཤོག །
ཅེས་པའང་རབ་རྒྱན་སྣྲོན་ཟླའི་དབང་ཕྱོགས་རྫོགས་པ་གསུམ་པའི་སྐབས་སུ་དྲ་ཐོག་ནས་རྒྱུ་འབྲས་མེད་པའི་སྐད་ཆ་དང་དབྱེན་སྦྱོར་རིགས་སྣ་ཚོགས་པ་དག་དོན་ལ་མི་གནས་པའི་བསྟོད་སྨད་ཀྱི་སྒྲོ་བསྐུར་འགའ་མཐོང་བའི་རྐྱེན་ལས་རང་བློ་ལྷག་བསམ་དྲི་མེད་གཞན་ལ་སྟོན་པའི་བརྡ་ཙམ་དང་སྙིང་ཁུངས་རུས་པས་སྨོན་ཚིག་འདི་དག་གང་དྲན་དུ་ཝ་ལེལ་རི་ཁྲོད་ནས་སྔ་འགྱུར་རིག་འཛིན་བརྒྱུད་པའི་གྲལ་མཐར་པ་དཔལ་དགྱེས་པ་རྡོ་རྗེས་སྨོན་ལམ་འདེབས་པར་དགེ་ལེགས་འཕེལ། ། དགེའོ། ། དགེའོ། །དགེའོ། །
Subscribe to:
Post Comments (Atom)
0 comments:
Post a Comment