Monday 29 August 2011
00:08 | 
Posted by
༄༅།། ཨེ་མ་ཧོའི་རིག་མཛོད་། |
༧སྐྱབས་རྗེ་དམ་པ་འཇིགས་མེད་བློ་གྲོས་རྒྱལ་མཚན་རིན་པོ་ཆེ་ལ
མཆོད་པ་བཀྲ་ཤིས་རྟགས་བརྒྱད། །
ན་མོ་མ་ཧྰ་གུ་རུ་ཨ་བྷྱ་མ་ཏི་ཡེ། །
སྡེ་གསུམ་ཀློང་དགུའི་བཀའ་བསྟན་དམ་ཆོས་མཛོད། །
ཚེགས་ཆུང་དོན་ཀུན་རྟོགས་པའི་མན་ངག་ཐབས། །
མ་ནོར་སྒོ་ཆེན་འབྱེད་པའི་ལྡེའུ་མིག་མཆོག །
བསྟན་པའི་སྙིང་པོར་འཛིན་ལ་ཡང་ཡང་བསྔགས། །
༡.
བརྒྱུད་པ་དགུ་ལྡན་རིག་འཛིན་བླ་མའི་སྲོལ། །
ཟབ་རྒྱས་ཐེག་པའི་བརྗོད་བྱ་ནང་རྒྱུད་གསུམ། །
མདོ་སྒྱུ་སེམས་ཀློང་མན་ངག་རྗོད་བྱེད་ལས། །
བསླབ་གསུམ་རྒྱུད་ལ་འཕོ་བའི་ཆོས་འཁོར་རྒྱལ། །
༢.
ཐོག་མེད་ལས་ཉོན་ཤེས་བྱའི་སྒྲིབ་པ་ཡི། །
མ་རིག་ཆགས་སྡང་འགྲོ་བའི་ཚ་གདུང་ལ། །
ཞི་བསིལ་མྱང་འདས་ཟླ་བའི་གཟི་བྱིན་ཅན། །
སྡུག་བསྔལ་ཀུན་སེལ་ཐར་པའི་གདུགས་དཀར་རྒྱལ། །
༣.
འཇིགས་མེད་ཏིང་འཛིན་ཤེས་རབ་སྒྲོན་མེ་ཡི། །
ལུང་རྟོགས་བཤད་སྒྲུབ་འཛིན་སྐྱོང་སྤེལ་མཁས་པས། །
ཕ་རོལ་བདུད་དང་མུ་སྟེགས་ཕམ་མཛད་པའི། །
བློ་གྲོས་དྲི་མེད་བསྟན་པའི་རྒྱལ་མཚན་རྒྱལ། །
༤.
སྒྲིབ་བྲལ་མཁྱེན་པའི་ཡེ་ཤེས་རྣམ་དག་པས། །
མཚན་དཔེའི་ཡོན་ཏན་ཕུན་ཚོགས་ཡོངས་རྫོགས་པའི། །
སྨིན་གྲོལ་དབང་ཕྱུག་ཀུན་བཟང་རྡོ་རྗེ་འཆང་། །
ཚོགས་གཉིས་ཕུལ་བྱུང་དཔལ་གྱི་བེའུར་རྒྱལ། །
༥.
ཐུགས་བསྐྱེད་མཐར་ཕྱིན་བྱང་ཆུབ་ཆེན་པོའི་སྐུ། །
མི་ཟད་འབྲས་ཆོས་རྒྱ་མཚོས་ལེགས་གཏམས་པ། །
ཟབ་རྒྱས་ཚངས་དབྱངས་ཡན་ལག་དྲུག་ཅུའི་སྒྲ། །
སྒྲོག་མཁས་ཆོས་དུང་དཀར་པོ་གཡས་འཁྱིལ་རྒྱལ།
༦.
རྣམ་དཀར་ལེགས་བཤད་འོ་མའི་རྒྱ་མཚོ་ཆེ། །
མདོ་སྔགས་རིག་གནས་བཅུད་ཀྱི་བདུད་རྩི་ཀུན། །
རྣམ་དཔྱོད་ཧུབ་ཀྱིས་འདྲེན་པའི་རྣལ་འབྱོར་པ། །
མན་ངག་དབང་ཕྱུག་བུམ་པ་རིན་ཆེན་རྒྱལ། །
༧.
སྲིད་པར་གནས་ཀྱང་དྲི་བྲལ་བྱང་ཆུབ་སེམས། །
ཀུན་ལྡན་ངག་གི་དབང་ཕྱུག་འཇམ་དཔལ་དབྱངས། །
ཟུར་ཕུད་ལྔ་བའི་མཁྱེན་བརྩེ་ནུས་མཐུའི་དཔལ། །
ཀུན་འདུས་སྔགས་འཆང་པདྨ་དཀར་པོ་རྒྱལ། །
༨.
ཆགས་ཐོགས་ཀུན་བྲལ་མཉམ་པ་ཉིད་ཀྱི་སྐུ། །
ཐབས་ཤེས་ཟུང་འཇུག་བདེ་སྟོང་ཡེ་ཤེས་རྩལ། །
ལྷན་སྐྱེས་ཕྱག་རྒྱ་ཆེན་པོར་དབང་འབྱོར་པའི། །
མཁྱེན་རབ་དབང་ཕྱུག་གསེར་ཉ་རིན་ཆེན་རྒྱལ། །
སྐྱབས་རྗེའི་དབུ་ལ་བཀྲ་ཤིས་གདུཊ་ལྟར་སྐྱོབས། །
སྤྲུལ་སྐུའི་བཀྲ་ཤིས་མི་ནུབ་རྒྱལ་མཚན་བརྟན། །
དམ་ཆོས་གསུང་ལ་བཀྲ་ཤིས་ཆོས་དུང་འཁྱིལ། །
ཐུགས་ལ་བཀྲ་ཤིས་དཔལ་གྱི་བེ་འུ་གསལ། །
སྤྱན་ལ་བཀྲ་ཤིས་རིན་ཆེན་གསེར་ཉས་རྒྱན། །
ལྗགས་ལ་བཀྲ་ཤིས་པད་མོ་ལོ་འདབ་རྒྱས། །
མགུལ་ལ་བཀྲ་ཤིས་རིན་ཆེན་བུམ་པ་འཁྱིལ། །
ཕྱག་ལ་བཀྲ་ཤིས་ཡོན་ཏན་ནོར་བུ་འཛིན། །
ཞབས་ལ་བཀྲ་ཤིས་ཕྲིན་ལས་འཁོར་ལོ་འཁོར། །
བཀྲ་ཤིས་བདེ་ལེགས་རྟགས་བརྒྱད་རིན་པོ་ཆེའི། །
ཕྱི་ནང་གསང་བའི་བཀྲ་ཤིས་གང་ཡིན་པ། །
དེང་འདིར་ཁྱེད་ལ་ཕུན་སུམ་ཚོགས་པར་ཤོག །
ཅེས་པ་འང་རབ་རྒྱན་ལྕགས་ཡོས་ཆུ་སྟོད་ཟླ་བའི་དབང་ཕྱོགས་དུས་ཚེས་དགེ་བར་༧སྐྱབས་རྗེ་དམ་པ་འཇིགས་མེད་བློ་གྲོས་རྒྱལ་མཚན་གྱིས་རྒྱལ་བསྟན་སྤྱི་དང་ཁྱད་པར་སྔ་འགྱུར་རིག་འཛིན་བརྒྱུད་པའི་ཆོས་འབྱུང་གི་ཆ་ཤས་སྔ་འགྱུར་བཀའ་མ་ཤིན་ཏུ་རྒྱས་པ་གླེགས་བམ་བརྒྱ་དང་ཉི་ཤུའི་དཀར་ཆག་ཞིབ་རྒྱས་སུ་བཀོད་པ་ཤེས་རབ་རིན་པོ་ཆེའི་སྒྲོན་མེ་ཞེས་བྱ་བ་ལེགས་གྲུབ་བྱུང་བས་ཤིན་ཏུ་དགའ་བའི་ཡི་རང་དང་རྟེན་འབྲེལ་དགའ་སྟོན་ལ་བཀྲ་ཤིས་བདེ་ལེགས་ཀྱི་ཤིས་ཚིག་ཅིག་གང་དྲན་དུ་ཤྲྰི་ཨ་ནནྟ་བཛྲས་ཝ་ཡེལ་བུདྡྷ་ཛྙྰ་ནའི་ཆོས་གླིང་ནས་བྲིས་དགེའོ། །
Subscribe to:
Post Comments (Atom)
0 comments:
Post a Comment