༄༅།། ཨེ་མ་ཧོའི་རིག་མཛོད།

དཔལ་ཡུལ་ལྷ་སྤྲུལ་རིན་པོ་ཆེ་སྐུ་ཕྲེང་གསུམ་པ། ༧སྐྱབས་རྗེ་ཨོ་རྒྱན་གར་དབང་ཉི་མའམ་མཚན་གཞན ༧ཐུབ་བསྟན་གར་དབང་ཉིན་བྱེད་བཤད་སྒྲུབ་ཕྲིན་ལས་དཔལ་བཟང་པོ་གང་གི་རྣམ་པར་ཐར་བ་ནི།

དེ་ཡང་མདོ་ལས།།།།མ་འོངས་པའི་དུས་ལྔ་བརྒྱ་ཐ་མ་ལ་དམ་པའི་ཆོས་རབ་ཏུ་རྣམ་པར་འཇིག་པར་འགྱུར་བ་ན་བྱང་ཆུབ་སེམས་དཔའ་སེམས་དཔའ་ཆེན་པོ། ཚུལ་ཁྲིམས་དང་ལྡན་པ།།།།ཡོན་ཏན་དང་ལྡན་པ། ཤེས་རབ་དང་ལྡན་པ་དག་བྱུང་སྟེ། ཞེས་ཚུལ་ཁྲིམས་གྱི་ཕུང་པོ་ཡོངས་སུ་དག་པའི་དམ་པ་དུ་མ་ཞིག་དང་ཆབ་ཅིག་སྤྱིར་ལུང་གིས་བསྟན་པ་དང་།།།།བྱེ་བྲག་ཏུ་ཡང་རིག་འཛིན་བདུད་འདུལ་རྡོ་རྗེའི་གཏེར་ལུང་ལས།

ཤུད་པུ་དཔལ་སེང་སྐྱེ་བ་ནི༔

ཀ་ཐོག་ཕྱོགས་ནས་དབང་གི་མིང་ཅན་འབྱུང༔

ས་བཅུའི་དབང་ཕྱུག་རྣམ་འབྱོར་ཨེ་མ་ཧོ༔

མཐོང་ཐོས་ཐམས་ཅད་རིག་འཛིན་ས་ལ་སྦྱོར༔

ཞེས་དང་།།།།ཆོས་རྒྱལ་རཏྣ་གླིང་པའི་གཏེར་ལུང་ལས།

ཕྱག་རྡོར་སྤྲུལ་པ་འགྲོ་བ་ཐབས་ཀྱིས་འདུལ༔

དབང་གི་མིང་ཅན་ཁམས་ཀྱི་ཕྱོགས་སུ་འབྱུང༔

ཞེས་ཀ་ཐོག་དང་ཁམས་ཀྱི་ཕྱོགས་ཞེས་པའི་སྐུའི་འཁྲུངས་ཡུལ་མདོ་ཁམས་ཨ་སྐྱོང་གོང་མ་ཚང་གི་སའི་ཆར། གད་ཐོག་གམ་ཁ་སྐད་དུ་ཀ་ཐོག་ཅེས་འབོད་པ་དེ་དང་། ཕྱག་རྡོར་སྤྲུལ་པ་ཞེས་པས་སྤྲུལ་གཞི། དབང་ཞེས་པས་མཚན་གྱི་ཆ་ཤས་གསལ་བར་བསྟན། རིག་འཛིན་འཇའ་ཚོན་སྙིང་པོའི་གཏེར་ལུང་ལས།

ངུར་སྨྲིག་འཛིན་པ་གར་གྱི་མིང་ཅན་ལ༔

དེ་ཚེ་བར་ཆད་མ་ངེས་སྣ་ཚོགས་འབྱུང༔

གདམས་པ་འདི་ལ་འབད་ན་བར་ཆད་ཞི༔

དངོས་གྲུབ་གསོ་འགྱུར་སྐུ་ཚེ་མཐར་ཕྱིན་འགྱུར༔

ཞེས་རྐང་པ་དང་པོའི་ཕྱེད་སྔ་མས་རྟེན་རབ་བྱུང་ཡིན་པ་དང་། ཕྱེད་ཕྱི་མས་མཚན་གྱི་ཆ་ཤས། རྐང་པ་གཉིས་པས་ནི་དུས་འགྱུར་གྱི་སྐབས་སུ་ཡ་ང་བའི་བར་ཆད་སྣ་ཚོགས་འབྱུང་ཚུལ། རྐང་པ་ཐ་མ་གཉིས་ཀྱིས་གདམས་པ་འདི་དང་ཕྲད་ནས་བར་ཆད་ཞི་ཞིང་སྐུ་ཚེ་མཐར་ཕྱིན་ཚུལ་བཅས་གསལ་བར་བསྟན། ལུང་བསྟན་ཉི་ཟླ་ཁ་སྦྱོར་ལས།

གསང་བདག་རྣམ་སྤྲུལ་བསོད་ནམས་ཅན༔

ཐུགས་ཀར་ཡི་གེ་ཧཱུྃ་གིས་མཚན༔

ང་རྒྱལ་ཐོ་རྒྱུད་གར་གྱི་མིང༔

ཀ་ཐོག་ཤར་དུ་ངེས་པར་ཡོང༔།།།ཞེས་དང་།།།།རིག་འཛིན་མི་འགྱུར་རྡོ་རྗེའི་གཏེར་ལུང་ལས།

འདི་ནས་བྱང་གི་ཕྱོགས་ཉིད་དུ༔

བསྟན་པ་འདེགས་སོ་ཙམ་ཞིག་འབྱུང་༔

ཆགས་མེད་དང་ནི་ཨོ་རྒྱན་མིང༔

མཁུར་ནང་ལ་ནི་སྨེ་བས་བརྒྱན༔ ཞེས་འཁྲུངས་ཡུལ་དང་།།། མཚན་རྟགས་ཁྱད་པར་ཅན། རིགས་རྒྱུད།།།།མཚན་བཅས་གསལ་བར་བསྟན། ངན་ལམ་རྒྱལ་བ་མཆོག་དབྱངས་ཀྱི་རྣམ་རོལ་ལྕགས་སྤྲུལ་རོལ་བའི་རྡོ་རྗེའི་གཏེར་ལུང་ལས།

ཨོ་རྒྱན་སངས་རྒྱས་གཉིས་པ་གར་གྱིས་བསྒྱུར༔

འབྲེལ་ཚད་དཔལ་ལྡན་བདེ་ཆེན་བཀོད་པ་རུ༔

དབུགས་འབྱིན་བྱེད་པ་བྱང་ཆུབ་ཆོས་ཀྱི་ཉི༔

དེ་ཡི་འཕྲིན་ལས་རྣམ་པར་དཀར་པོའི་སྟོབས༔

སྐྱེ་དགུའི་དཔལ་དུ་སྤྱོད་ཚེ་ཨེ་མ་ཧོ༔

ཞེས་སྐུ་ཆུང་དུས་ཀྱི་མཚན་གསལ་བོར་བསྟན་པ་དང་།།།།གདུང་སྲས་པདྨ་ཚེ་དབང་གི་ལུང་བསྟན་ལས།

བྱང་ནས་གྷྲྀ་ཝའི་མིང་ཅན་འབྱུང༔

དམར་སེར་བསྟན་པ་དགུང་ལ་རེག༔

ཅེས་སྐུའི་འཁྲུངས་ཡུལ་དར་ཐང་གི་བྱང་ཕྱོགས་དང་།།།།མཚན་གྱི་ཆ་ཤས། དམར་སེར་ངུར་སྨྲིག་གི་བསྟན་པ་ཕྱོགས་མཐར་སྤེལ་བའི་འཕྲིན་ལས་དང་བཅས་པའི་སྒོ་ནས་བསླུ་མེད་རྡོ་རྗེའི་ལུང་གིས་གསལ་བོར་བསྔགས་པ་ལྟར། མཚན་དཔེའི་པངྨོ་བསྟན་འགྲོའི་མགོན་དུ་འཁྲུངས་ཚུལ་ནི། ས་བཅུའི་དབང་ཕྱུག་རྗེ་བཙུན་བྱམས་པ་མགོན་པོའི་ཞལ་ནས།

མངལ་དུ་འཇུག་པ་མཆོག་དང་ནི།།།།

རིགས་དང་རུས་དང་ཆོ་འབྲང་དང་།།།།

འཁོར་དང་སྐྱེ་བ་དག་དང་ནི།།།།

ངེས་འབྱུང་བྱང་ཆུབ་ཤིང་རྣམས་དང་།།།།

ཡོན་ཏན་ཕུན་སུམ་ཚོགས་པ་ཡིན།།།།

ཞེས་ས་བཅུའི་སེམས་དཔའ་རྣམས་ནི་རིགས་རུས་ཕུན་སུམ་ཚོགས་པར་སྐྱེ་བ་འཛིན་པར་གསུངས་པ་ལྟར། དམ་པ་འདི་ཉིད་ཀྱི་རིགས་ནི། དཀར་ཕྱོགས་སྐྱོང་བའི་ཡུལ་ལྷ་གཉན་པོ།།།།གསེར་གྱི་འབྲོང་རི་སྨུག་པོའི་རིགས་རྒྱུད་གནས་མཆོག་ལྕགས་རི་འོད་འབར་གྱི་གནས་སྲུང་གི་བླ་བུ་གད་ཐོག་ལྷ་བསོ་ནས་བཟུང་འོད་གསལ་ལྷ་ཡི་རིགས་རྒྱུད་མ་ཉམས་པར་བྱོན་པ་ལས། ཨ་སྐྱོང་གོང་མ་དཔོན་གྱི་བཀའ་བློན་ཆེན་པོ་གད་ཐོག་ཨ་པོ་ཞེས་པ་དང་།།།།རུས་ནི་སྨུག་པོ་གདུང་གི་རུས་རྒྱུད་ཡིན་ཞིང་། ཆོ་འབྲང་ནི་མགོ་ལོག་གྱང་ཁང་བཟའ་བསོད་ནམས་སྐྱིད་ཡིན་ལ། དེ་ལྟར་རིགས་རུས་ཆོ་འབྲང་ཕུན་སུམ་ཚོགས་པར་རབ་བྱུང་བཅུ་དྲུག་པའི་རྣམ་འགྱུར་ཞེས་པ་རབ་རྒྱལ་ལྕགས་སྟག་སྤྱི་ལོ་།།༡༩༥༠། ལོའི་ཁྲུམས་ཟླ་བར་རྨ་ཀླུང་གསེར་ལྡན་ཕྱུག་མོའི་ཉེ་འགྲམ་གྱི་ལུང་སྐྱའི་སྨིན་ལུང་རི་རྒྱལ་ཕྱུག་མོའི་རི་ཞོལ་དུ། མཐོང་ན་མི་མཐུན་པ་མེད་པར་ངོ་མཚར་བའི་རྟགས་དུ་མ་དང་བཅས་གཟུགས་སྐུའི་མེ་ཏོག་གསར་དུ་བཞད།

དེ་ཚེ་མཚན་ལ་ཨོ་རྒྱན་ཉི་མ་ཞེས་གསོལ།།དགུང་ལོ་བཞི་བ་སྤྱི་ལོ་།།༡༩༥༣ ལོར་འཇམ་དཔལ་དབྱངས་དངོས་མཆོག་སྤྲུལ་ཆོས་ཀྱི་ཟླ་བས་༧སྐྱབས་རྗེ་ལྷ་སྤྲུལ་རིན་པོ་ཆེའི་ཡང་སྲིད་དེ་མ་ཐག་པ་སྤྲུལ་སྐུ་ལྷུན་གྲུབ་རྒྱ་མཚོའི་ཡང་སྲིད་འཁྲུལ་བྲལ་དུ་གཟིགས་ཏེ་སྐུ་བདག་མཛད།

དགུང་ལོ་ལྔ་བ་སྤྱི་ལོ་ ༡༩༥༤།།།ལོར་དར་ཐང་དགོན་དུ་ཞབས་སོར་ཐོག་མར་འཁོད་ཚེ། སྐུ་གོང་མ་པདྨ་དཀར་དབང་བསྟན་འཛིན་གྱིས་བཞེངས་པའི་གླིང་སྨད་རྣམ་རྒྱལ་མཆོད་རྟེན་ཆེན་མོ་གཟིགས་མ་ཐག་ངས་མ་གི་མཆོད་རྟེན་ཆེན་པོ་དེ་མ་གྲུབ་ནས་ངལ་བ་ཆེན་པོ་བྱུང་ཞེས་སོགས་སྔོན་གནས་རྗེས་སུ་དྲན་པའི་ཞལ་གསུང་མང་དུ་གནང་། དེར་མཆོག་སྤྲུལ་རིན་པོ་ཆེ་ནས་ཆོས་ཀྱི་ཁྲི་འཕང་མཐོན་པོར་མངའ་གསོལ་རྒྱ་ཆེར་མཛད་ཅིང་གཟིས་རི་དབོན་པོ་ཀུན་བཟང་ཡོངས་འཛིན་ཏུ་བསྐོས། འདི་༧སྐྱབས་རྗེ་ལྷ་སྤྲུལ་རིན་པོ་ཆེའི་ཡང་སྤྲུལ་འཁྲུལ་མེད་ཡིན་པས་ཡི་གེ་དང་ཀློག་ལོབ་ངེས་ཀྱིས་མནོལ་གྲིབ་སོགས་འཛེམས་པ་ལ་རེམ་ཞེས་བཀའ་བསྩལ་པ་བཞིན།

དགུང་གྲངས་བརྒྱད་པ་སྤྱི་ལོ་།།༡༩༥༧།།།ལོར་འབྲི་ཀློག་ལེགས་པར་མཐར་ཕྱིན། དེ་ནས་མཆོག་སྤྲུལ་རིན་པོ་ཆེ་ལས་སྐྱབས་གསུམ་འཛིན་པའི་དགེ་བསྙེན་གྱི་སྡོམ་པ་ལེགས་པར་མནོས་ཚེ། སྐུ་ཆུང་དུས་ཀྱི་མཚན་ལ་ལྷ་སྤྲུལ་རིན་པོ་ཆེའི་མཚན་གྱི་ཆ་ཤས་ཀྱིས་ཟུར་བརྒྱན་ཏེ་ཨོ་རྒྱན་གར་དབང་ཉི་མ་ཞེས་གསོལ།། གནམ་ཆོས།།།།རཏྣ།།།།འཇའ་ཚོན།།ཀར་གླིང་ཞི་ཁྲོ།།བཀའ་བརྒྱད་རྣམ་གསུམ། མ་ཏིའི་སེང་ཧ་སོགས་ཀྱི་སྨིན་བྱེད་ཡོངས་རྫོགས་གསན།

དགུང་གྲངས་དགུ་བ་རབ་རྒྱལ་ས་ཁྱི་སྤྱི་ལོ་ ༡༩༥༨།ལོར་སྐུ་གོང་མའི་སྐུ་གེགས་ཐོག་དུ་ཁེལ་བ་སེལ་ཆེད་དུ་༧སྐྱབས་མགོན་མཆོག་སྤྲུལ་རིན་པོ་ཆེའི་བཀའ་དགོངས་ལྟར། རྡོ་གྲུབ་ཆེན་དགོན་དུ་ཕེབས། རྡོ་གྲུབ་སྤྲུལ་སྐུ་རིག་འཛིན་བསྟན་པའི་རྒྱལ་མཚན་ལས། སྙིང་ཐིག་ཡ་བཞི་དང་དུམ་གཉིས་གྱི་སྨིན་གྲོལ་མཐའ་དག་གསན། སྐུ་ཡི་ན་ཚོད་མ་སྨིན་པ་འདི་དུས་ནས་ཀྱང་ཚེ་རབས་དུ་མར་ཚུལ་ཁྲིམས་ཀྱི་ཕུང་པོར་ཡོངས་སུ་གནས་པའི་བག་ཆགས་ཀྱི་དབང་གིས། སྐུ་ཚུགས་བཙུན་ཞིང་། ཐུགས་རིག་ཤིན་ཏུ་བཀྲ་བས་མཆོག་དམན་ཀུན་གྱིས་བསྔགས་བརྗོད་ཀྱི་མེ་ཏོག་འཐོར་བའི་གནས་སུ་གྱུར།

དུས་འདི་སྐོར་ནས་སྐྱེ་འགྲོ་སྤྱི་མཐུན་གྱི་ལས་རླུང་རབ་ཏུ་གཡོས་པའི་རྐྱེན་གྱིས། བསམ་ཡུལ་ལས་འདས་པའི་དུས་འགྱུར་མེ་དཔུང་ཆེན་པོ་ཆོལ་གསུམ་ཆོས་ལྡན་ཞིང་ཁམས་ཀུན་དུ་ཁྱབ་ཅིང་། གངས་ལྗོངས་ཆོས་སྲིད་ཀྱི་ཚང་ཚིང་མ་ལུས་པ་རྨང་མེད་དུ་སྲེག་པའི་སྐལ་ངན་ཐོག་ཏུ་བབ། དེའི་ཚེ་སྐུ་ཉིད་ཡོངས་འཛིན་སོགས་གྲྭ་འཁོར་དུ་མ་དང་མཉམ་དུ། སྟོད་ཕྱོགས་སུ་བྲོས་བྱོལ་དུ་ཕེབས་ཚེ། ཡོངས་འཛིན་སོགས་འཁོར་རྣམས་དམག་དཔུང་གི་ཁྲོད་དུ་ཚུད་དེ་གཅིག་ཀྱང་མ་ལུས་པར་ལྔ་ལམ་དུ་བཏང་། སྐུ་ཉིད་ནི་བླ་མ་དང་ཡི་དམ་ལ་གསོལ་བ་བཏབ་པས་དམག་ཚོགས་ཀྱིས་མ་མཐོང་བར་འབྲོག་དགོན་ཞིག་ཏུ་ཞགས་བདུན་ཕྲག་གཉིས་ཀྱི་རིང་ལ་ཁམས་ཟས་རགས་པ་ཏིལ་འབྲུ་ཙམ་ཡང་གསོལ་དུ་མེད་པར་ལུས་ཀྱང་།།།།ཇི་སྐད་དུ།།།།རྒྱུད་བླ་མ་ལས།

ཇི་ལྟར་པདྨ་ཆུ་ནང་དུ།།།།

སྐྱེས་པ་ཆུ་ཡིས་གོས་པ་མེད།།།།

དེ་བཞིན་དུ་ནི་འཇིག་རྟེན་དུ།།།།

སྐྱེས་ཀྱང་འཇིག་རྟེན་ཆོས་མི་གོས།།།།ཞེས་དང་།།།།མདོ་སྡེ་རྒྱན་ལས།

འབྱོར་བའི་དུས་དང་རྒུད་པའི་དུས་ནའང་འདི།།།།

ཉོན་མོངས་སྡུག་བསྔལ་དག་གིས་འཇིགས་པ་མེད།།།།

ཅེས་གསུངས་པ་བཞིན་ཕྲལ་རྐྱེན་གྱི་གནོད་པས་རྡུལ་ཙམ་ཡང་མ་གོས།།དེ་ཚེ་འོད་གསལ་གྱི་ཉམས་ལ་༧སྐྱབས་མགོན་མཆོག་སྤྲུལ་རིན་པོ་ཆེ་དངོས་སུ་བྱོན་ནས་ཤིང་ཏོག་ལྟ་བུའི་རིལ་བུ་ཞིག་གནང་ནས་འདིས་ཟས་ཀྱི་གོ་ཆོད་ཅེས་གསུངས་ཤིང་ཕྱག་སྡིགས་མཛུབ་མཛད་དེ་ཕྱོགས་ཀུན་ཏུ་བསྐོར་བས་ཁོ་ར་ཁོར་ཡུག་ཐམས་ཅད་མེ་དཔུང་འབར་བས་འོད་ཀྱི་ལེར་སོང་བའི་ཐུགས་སྣང་ཤར།

རིམ་བཞིན་བླ་མ་དང་ཆོས་སྐྱོང་སྲུང་མ་རྣམས་ཀྱིས་དངོས་སུ་སྡོང་གྲོགས་མཛད་དེ་རྨ་སྟོད་འབོས་ལམ་འབྲོག་སྡེའི་ཕྱོགས་སུ་བྱོན།།དེར་བགྲང་བྱ་གཉིས་ཙམ་ལ་བྱིས་པ་དཀྱུས་མའི་ཚུལ་དུ་བཞུགས། དེ་ཚེ་གྲུབ་མཆོག་འཁོར་ལོའི་མགོན་པོ་མགར་ཀློང་རིན་པོ་ཆེའི་ཐུགས་མཁྱེན་པའི་ཡེ་ཤེས་ཀྱིས་དམ་པ་འདི་ཉིད་སྐུ་ལ་གནོད་པ་མ་བྱུང་བར་བཞུགས་ཡོད་པར་གཟིགས་ནས་སྐུ་ཡི་གཅེན་པོ་སྤྲུལ་པད་མ་ཆོས་འབྱོར་སོགས་འཚོལ་དུ་བཏང་བ་དངོས་ཞལ་ཕྲད་དེ་མར་ཕ་གཞིས་སུ་གདན་དྲངས།

དེ་སྐབས་དུས་འགྱུར་ཆེས་ཆེར་བདོ་བའི་དུས་སུ་གྱུར་པས་འགོ་དཔོན་དག་གིས་གཞན་གནོད་ཉེས་སྤྱོད་སྡིག་པའི་གཡང་སར་ཁྲིད་པར་ངན་བསྐུལ་དང་། བསླུ་བྲིད་རྡུང་རྡེག་སོགས་ཇི་ལྟར་བྱས་ཀྱང་། ཚེ་རབས་དུ་མར་རྒྱལ་སྲས་ཀྱི་སྤྱོད་པ་ལ་གོམས་པས་སྐུ་སྲོག་ལ་མི་ལྟོས་པར་ཐ་ན་འབུ་སྲིན་ཕྲ་མོ་ཙམ་ལ་ཡང་བསམ་བཞིན་དངོས་སུ་གནོད་པ་བྱེད་མ་མྱོང་བ་ནི།།།།མདོ་ལས།

ནོར་དང་མཛའ་བཤེས་དེ་བཞིན་ཕ་མ་དང་།།།།

སྲོག་གི་སླད་དུའང་སྡིག་པ་མི་བགྱིད་དོ།།།།

ཞེས་དང་།།།།དཔལ་ས་ར་ཧས།།

ཀུན་རྫོབ་སངས་རྒྱས་མི་རེ་གདེངས་ཆེན་ལྡན་གྱུར་ཀྱང་།།།།

བསོད་ནམས་ཚོགས་ཆེན་མི་བཅག་ཅི་ནུས་འབད་པར་བྱ།།།།

འཁོར་བ་དག་ལ་དོགས་པའི་འཇིགས་བཅས་སེམས་བྲལ་ཡང་།།།།

སྡིག་པའི་ལས་རྣམས་ཕྲ་མོ་དག་ལ་འཛེམས་པར་བྱ།།།།

ཞེས་གདམས་པའི་དོན་ཚུལ་བཞིན་ཉམས་སུ་བླངས་པས་འཕགས་ཆེན་དམ་པའི་རང་གཤིས་བླ་ན་མེད་པ་གསལ་བར་བསྟན་པ་ལགས་སོ། །

སྐབས་དེར་བསྟན་པ་འཛིན་པའི་སྐྱེས་ཆེན་ཕལ་ཆེ་བ་ནི་དགོངས་པ་གཞན་དུ་གཤེགས།།ཅོལ་ཆུང་བྱིས་པའི་རྟེན་ཅན་གྱི་དགེ་འདུན་པ་ཕལ་ཆེ་བས་ནི་བསླབ་སྡོམ་རྩྭ་བཞིན་དོར། བསླབ་སྡོམ་སྲོག་ལྟར་སྲུང་བ་རེ་ཟུང་མཆིས་པ་རྣམས་ནི་གདུག་པའི་ཁྲི་མུན་དུ་བཙུད་དེ་བསྟན་པ་འཛིན་པའི་སྐྱེས་བུ་ནི་ཉིན་མོའི་སྐར་མ་ཙམ་དང་འདུལ་བ་སོ་ཐར་གྱི་བསྟན་པ་ནི་མེ་ཤི་བའི་དུད་པ་ཙམ་དུ་གྱུར། དེའི་ཚེ་ཆོ་འཕྲུལ་ཆེན་པོའི་མདོ་ལས།

སྨད་པར་བྱ་བའི་ཁྱིམ་ལ་བརྟེན་པ་དེས།།།

བླ་མེད་བྱང་ཆུབ་དམ་པ་གཞར་མི་ཐོབ། །

ཁྱིམ་གྱིས་སྐྲག་སྟེ་ཁྱིམ་ནས་མངོན་བྱུང་བ།།།།

དེ་དག་བྱང་ཆུབ་མཆོག་འདི་རྙེད་མི་དཀའ།།།།

ཞེས་དང་།།།།སྐྱེས་རབས་ལས།

གལ་ཏེ་ཆོས་སྤྱོད་ཁྱིམ་པའི་སོ་ནམ་འཆོར། །

ཁྱིམ་ལ་ཕྱོགས་ན་ཆོས་ཀྱང་ག་ལ་འགྲུབ། །

དེ་བས་ཆོས་དང་འགལ་བའི་སྐྱོན་ཡོད་ཕྱིར། །

བདག་ལ་ཕན་འདོད་སུ་ཞིག་ཁྱིམ་ན་གནས། །

ཞེས་གསུངས་པ་བཞིན།།།དམ་པ་འདིས་ཀྱང་ཁྱིམ་ནས་ཁྱིམ་མེད་པར་ངེས་པར་འབྱུང་མུས་ཀྱི་རྣམ་པ་ཐུགས་ཉམས་སུ་བཞེས་ཐོག དཀའ་ངལ་དུ་མ་ཁྱད་དུ་བསད་དེ་ལྔ་རིག་མཁས་པའི་དབང་པོ་ཨར་སྐུང་མཁན་ཆེན་ཐུབ་བསྟན་འགྱུར་མེད་ཕྲིན་ལས་ཀྱི་ཞབས་ལ་ཆེད་དུ་བཅར་ནས།

དགུང་ལོ་ཉེར་བཞི་བཞེས་པ་ཆུ་མོ་གླང་སྤྱི་ལོ་ ༡༩༧༣ ལོའི་ཐ་སྐར་ཟླ་བའི་ཚེས་ཉེར་གཉིས་རྒྱལ་བ་ལྷ་ལས་བབ་པའི་དུས་བཟང་ལ་ཚིགས་སྔ་མ་དགེ་ཚུལ་དང་ཕྱི་མ་བསྙེན་རྫོགས་ཀྱི་དངོས་པོ་ཡང་དག་པར་བཞེས།།དེ་ཚེ་༧་ཐུབ་བསྟན་གར་དབང་ཉིན་བྱེད་བཤད་སྒྲུབ་ཕྲིན་ལས་དཔལ་བཟང་པོ་ཞེས་པའི་མཚན་གྱི་ཅོད་པན་ཕུལ། དེ་ནས་བཟུང་དམ་ཆོས་འདུལ་བ་རིན་པོ་ཆེའི་དགག་སྒྲུབ་ཀྱི་བསླབ་བྱ་མཐའ་དག་མིག་འབྲས་བཞིན་དུ་བསྲུངས་ཏེ་ཐ་ན་ཕྱི་དྲོའི་ཁ་ཟས་དང་། རྩྭ་སྔོན་གཅོད་པ་སོགས་ཉེས་ལྟུང་ཕྲ་མོ་ཙམ་ཡང་ཁྱད་དུ་མི་གསོད་པར་སྲུང་བ་ནི།།།དབུ་མ་ལ་འཇུག་པ་ལས།

དེ་ཚུལ་ཕུན་ཚོགས་ཡོན་ཏན་དག་ལྡན་ཕྱིར། །

རྨི་ལམ་དུ་ཡང་འཆལ་ཁྲིམས་དྲི་མ་སྤངས། །

ལུས་ངག་ཡིད་ཀྱི་རྒྱུ་བ་དག་གྱུར་པས།།།།

དམ་པའི་ལས་ལམ་བཅུ་ཆར་གསོག་པར་བྱེད།།།།

ཅེས་གསུངས་པ་ལྟར་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པའི་འབྲས་རྟགས་སུ་གྱུར་པའི་མཛད་པ་བཟང་པོ་མཐུན་སྣང་དུ་གསལ་བར་བསྟན་པ་ཡིན་པ་གོར་མ་ཆག་གོ།།།སློབ་དཔོན་དབྱིག་གཉེན་གྱིས།

ཚུལ་གནས་ཐོས་དང་བསམ་ལྡན་པས།།།།

སྒོམ་པ་ལ་ནི་རབ་ཏུ་སྦྱོར།།།།

ཞེས་གསུངས་པ་ལྟར། ཚུལ་ཁྲིམས་ཡང་དག་པར་བླང་བའི་རྗེས་སུ་དུས་འགྱུར་གྱི་འཚུབ་མ་རེ་ཞིག་ཞི་བ་ནས་བཟུང་། མདོ་སྔགས་སྨྲ་བའི་ཉི་མ་ཨར་སྐུང་མཁན་ཆེན་མཆོག་ལས། དམ་ཆོས་འདུལ་བ་གཞི་གསུམ་གྱི་ལག་ལེན་མཐའ་དག་དང་། སྙིང་ཐིག་སྔོན་འགྲོ། གནམ་ཆོས་སྔོན་འགྲོ། སྡོམ་གསུམ་རྣམ་ངེས།།ཚིག་གསུམ་གནད་རྡེག་སོགས་ཀྱི་ཟབ་ཁྲིད་དང་། གཏེར་ཁ་གསར་རྙིང་གི་གཏེར་ཆོས་དུ་མའི་སྨིན་བྱེད་ཀྱི་རིམ་པ་ལེགས་པར་མནོས། གཞན་ཡང་སྔ་ཕྱི་ཅི་རིགས་སུ་དགེ་རྩེ་མཁན་ཆེན་བློ་བཟང་ཤེས་རབ།།ཨ་ཉ་མཁན་པོ་བློ་བཟང་ཚུལ་ཁྲིམས།།།།ཞི་ལི་མཁན་པོ་བསྟན་འཛིན་བཟང་པོ།།།།མགར་བ་མཁན་པོ་བློ་བཟང་ཚུལ་ཁྲིམས་སོགས་མཁས་གྲུབ་དུ་མའི་ཞབས་ལ་གཏུགས་ཏེ་སུམ་རྟགས།།།སྡོམ་གསུམ། དཔལ་སྤྲུལ་སྔོན་འགྲོ། བཤེས་སྤྲིངས།།།།སྤྱོད་འཇུག།།།ཀློང་ཆེན་མཛོད་བདུན།།།ཀརྨ་མ་ངེས་ལེགས་སྡོམ་ཊིཀ གཏེར་གསར་ཐོལ་རྒལ་ཟླ་དྲུག་མ་སོགས་དང་། འཇམ་མགོན་མི་ཕམ་ཆོས་རྗེའི་གསུང་འབུམ་ཕལ་ཆེ་བ་གསན་བསམ་མཐར་ཕྱིན་པར་མཛད།

གཞན་ཡང་སྔ་འགྱུར་བསྟན་པའི་གསལ་བྱེད་སྨིན་གླིང་གཅོང་རིན་པོ་ཆེ།།།།བ་སོ་ཆོས་རྗེ།།།།ཨ་ལག་བློ་བཟང་དོན་གྲུབ། གྱང་ཁང་སྤྲུལ་སྐུ་ཐུབ་བསྟན་དཔལ་བཟང་།།།།ཨོ་རྒྱན་སྐུ་གསུམ་གླིང་པ། རི་ཤུལ་མཁན་པོ་འོད་ཟེར་དཔལ་ལྡན།།།མགར་ཀློང་སྤྲུལ་སྐུ་པདྨ་བདེ་ཆེན་མཁའ་ཀློང་ཡངས་པ་སོགས་ལས། སྔ་འགྱུར་བཀའ་གཏེར་གྱི་ཟབ་ཆོས་ཤིན་དུ་མང་པོ་སྔ་ཕྱི་ཅི་རིགས་སུ་གསན་བཞེས་གནང་ཚུལ་རྣམས་ནི་འདིར་བྲིས་མེད་པས།།ཤེས་པར་འདོད་པ་རྣམས་ཀྱིས་རྗེ་ཉིད་ཀྱི་གསན་ཡིག་དང་དར་ཐང་གདན་རབས་རྒྱས་པ་སོགས་ལས་རྟོགས་པར་བྱའོ།།།།

དགུང་གྲངས་སོ་གཉིས་བཞེས་པ་ལྕགས་མོ་བྱ་སྤྱི་ལོ་ ༡༩༨༡ །།ལོར་རྨ་ཉིན་གོང་མའི་ཆོས་སྒར་གྱི་མཁན་རབས་བཅུ་གཅིག་པའི་གསེར་ཁྲི་ལ་མངའ་དབང་བསྒྱུར་ཏེ་འདུལ་བ་གཞི་གསུམ་གྱི་ཕྱག་བཞེས། ལོ་ཆེན་ངྷརྨ་ཤྲཱིས་གསུང་ལྟར་བཙུགས་ཤིང་། དབྱར་གནས་ཀྱི་མཁན་པོ་མཛད། གྲྭ་གསར་ཤིན་དུ་མང་པོ་ལ་དགེ་ཚུལ་དང་བསྙེན་རྫོགས་ཀྱི་སྡོམ་པ་གནང་སྟེ་དམར་སེར་ངུར་སྨྲིག་གི་བསྟན་པའི་རྨང་གཞི་ལེགས་པར་བཙུགས། དགུང་ལོ་སོ་གསུམ་པ་ཆུ་ཕོ་ཁྱི་ལོ་།།།༡༩༨༢།།།ལོར་གྲྭ་འཁོར་བརྒྱ་ཕྲག་དང་བཅས་དར་ཐང་དུ་ཕེབས་ཏེ་མཆོག་སྤྲུལ་ཆོས་ཀྱི་ཟླ་བའི་རྒྱལ་ཚབ་གསེར་གྱི་ཁྲི་འཕངས་མཐོན་པོར་ཞབས་སེན་རྩིབས་སྟོང་འཁོར་ལོའི་རེ་ཁ་རྣམ་པར་བཀོད་དེ། ཁྲོམ་ཚོགས་སྟོང་ཕྲག་མང་པོར་ཞི་ཁྲོ་དགོངས་པ་རང་གྲོལ་གྱི་སྨིན་བྱེད་ཟབ་མོའི་དགའ་སྟོན་ལེགས་པར་བསྩལ།

དེ་ནས་བཟུང་རྒྱལ་བསྟན་དང་འགྲོ་བའི་བདེ་སྐྱིད་ཁོ་ནར་དམིགས་ཏེ་སྐྱེ་དགུའི་བསོད་ནམས་གསོག་པའི་ཞིང་དུ་རྟེན་གསུམ་རབ་འབྱམས་བཞེངས་པའི་དབུ་བཟུང་ནས་ད་ལྟའི་བར་དུ་བཞེངས་པ་རྣམས་རག་རིམ་ཙམ་ཞིག་འགོད་ན། དེ་ཡང་གསེར་སྡོང་ལྷ་ཁང་ཆེན་མོ་ཐོག་བརྩེགས་གསུམ་པ་རྟེན་དང་བརྟེན་པར་བཅས་པ་བཟོ་བཀོད་ཕུན་སུམ་ཚོགས་པ།།།།ཚོགས་ཆེན་འདུ་ཁང་ཀ་བ་བརྒྱ་དང་བཞི་བཅུ་རྩ་དྲུག་པ་དྲི་གཙང་ཁང་སུམ་ཐོག་ཅན་ནང་རྟེན་གཙོ་བོ་གསེར་ཟངས་ལས་གྲུབ་པའི་རྒྱལ་བ་ཤཱཀྱ་ཐུབ་པ་ལོངས་སྐུའི་ཆས་ཅན། དེའི་གཡས་སུ་སངས་རྒྱས་འོད་དཔག་མེད།།།།གཡོན་དུ་གུ་རུ་སྣང་སྲིད་ཟིལ་གནོན་བཅས་ཐོག་ཚད་གསུམ་ཅན་རེ་དང་། མི་འཁྲུག་པ། རྡོར་སེམས། བྱམས་པ། འཇམ་དབྱངས། མཁན་ཆེན་ཞི་བ་འཚོ།།།།ཆོས་རྒྱལ་ཁྲི་སྲོང་སྡེའུ་བཙན་བཅས་ཀྱི་གསེར་སྐུ་ཐོག་ཚད་སོགས་བཟོ་བཀོད་ཕུན་སུམ་ཚོགས་པའི་རྟེན་གསུམ་གྲངས་ལས་འདས་པ།

སྒྲུབ་གྲྭ་གསང་ཆེན་ངེས་དོན་གླིང་།།བཙན་ཁང་ཆེན་མོ།།།།གླིང་སྨད་རྣམ་རྒྱལ་མཆོད་རྟེན་ཆེན་མོ།།།དཔལ་རི་པདྨ་འོད་ཀྱི་ཕོ་བྲང་གི་ཞིང་བཀོད་ཆོས་འཁོར་བཅུ་གསུམ་གསེར་ཟངས་ལས་བྱས་པ་ནང་རྟེན་གཙོ་བོ་སློབ་དཔོན་པདྨ་འབྱུང་གནས་ཐོག་ཚད་དང་འཁོར་རྗེ་འབངས་ཉེར་ལྔ། གུ་རུ་མཚན་བརྒྱད་སོགས་སྐུ་གསུང་ཐུགས་རྟེན་གྲངས་མེད་པ། དགོན་པའི་མཐའ་སྐོར་དུ་འཁོར་ཕྲན་སྟོང་ཕྲག་དུ་མ། བཤད་གྲྭ་ཐོས་བསམ་གླིང་གི་ལྷ་ཁང་དང་གྲྭ་ཤག རི་ཁྲོད་ཕོ་བྲང་སོགས་གསར་དུ་བཞེངས་པའི་ཞལ་བཀོད་དང་ཕྱག་རྫས་རྒྱ་ཆེན་པོ་གནང་བ་སོགས།

མདོར་ན་དུས་འགྱུར་གྱི་དབང་གིས་དགོན་པ་འདིར། ནང་སོ་ཞིག་རལ་གཅིག་དང་གྲྭ་ཤག་གཅིག་ཙམ་ལས་མ་ལྷག་པར་གཞི་མེད་རྩ་གཏོར་དུ་བཏང་བ་རྣམས་སླར་ཡང་གསོས་ཏེ། ད་ལྟ་འཆི་མེད་གྲོང་གི་དཔལ་ལ་འདྲན་པའི་བསྟན་གཞི་ཆེན་པོ་ཞིག་ཏུ་གྲུབ་པ་ནི། དམ་པ་འདི་ཉིད་གཅིག་པུའི་ཐུགས་བསྐྱེད་དང་བཀའ་དྲིན་ཁོ་ན་ལས་བྱུང་བ་ཡིན་ནོ།།།།

གཞན་ཡང་རྡོ་གྲུབ་བཞི་བ་འཇིགས་མེད་ཕྲིན་ལས་དཔལ་འབར།།།།༧མཁན་ཆེན་དམ་པ་འཇིགས་མེད་ཕུན་ཚོགས་འབྱུང་གནས་སོགས་རྩོད་བྲལ་གྱི་མཁས་གྲུབ་དུ་མ་གདན་དྲངས་ཤིང་། སྔ་འགྱུར་བཀའ་གཏེར་རྒྱ་མཚོའི་སྨིན་གྲོལ་རྒྱབ་རྟེན་དང་བཅས་པའི་སྒོ་འཕར་ཡངས་པོར་ཕྱེས།

ཁྱད་པར་དུ་ཤིང་ཁྱི་སྤྱི་ལོ་།།།༡༩༩༤།།།ལོར་སྔ་འགྱུར་བསྟན་པ་ཡོངས་རྫོགས་ཀྱི་མངའ་བདག་ ༧སྐྱབས་རྗེ་གྲུབ་དབང་བླ་མ། ༧འཇིགས་མེད་ཐུབ་བསྟན་བཤད་སྒྲུབ་ཆོས་ཀྱི་སྒྲ་དབྱངས་དཔལ་བཟང་པོ་མཆོག་འཕགས་ཡུལ་ནས་དགོན་འདིར་གདན་དྲངས་ཏེ་རིན་ཆེན་གཏེར་མཛོད་ཆེན་མོ་དང་། བཀའ་མ་མདོ་སྒྱུའི་སྨིན་བྱེད་ཡོངས་རྫོགས་གསན་སྐབས། ཁོང་གི་རྒྱལ་ཚབ་ཏུ་མངའ་གསོལ་ཞིང་མཚན་གྱི་རྣམ་གྲངས་སུ། ཐུབ་བསྟན་ལེགས་བཤད་སྨྲ་བའི་སེངྒེ། །དྲི་མེད་འོད་ཟེར་འབྱུང་གནས། རྒྱལ་སྲས་དཔའ་བོ་དགྱེས་པའི་རྡོ་རྗེ། ཨོ་རྒྱན་འགྱུར་མེད་ཆེ་མཆོག་འདུས་པ་རྩལ་ཞེས་རིམ་པར་གནང་། མཛོག་ཤོད་དུ་པཎ་ཆེན་སྣང་བ་མཐའ་ཡས་སྐུ་ཕྲེང་བཅུ་བ་མཆོག་གི་ཞབས་ལ་གཏུགས་ཤིང་ཆོས་བཀའ་དུ་མ་གསན། པཎ་ཆེན་མཆོག་ནས་ཕྱིས་སུ་པེ་ཅིང་ནང་བསྟན་སློབ་གླིང་དང་གདན་ས་བཀྲ་ཤིས་ལྷུན་པོར་འབྱོན་དགོས་པའི་བཀའ་གསུང་སྔ་ཕྱིར་ལན་མང་དུ་བསྩལ་ཡང་དར་ཐང་བསྟན་དགོན་གྱི་བྱ་བས་ཁུར་གྱིས་འབྱོན་རྒྱུ་རིམ་བཤོལ་དུ་གྱུར།

བར་སྐབས་སུ་འོད་གསལ་སྙན་རྒྱུད་ཀྱི་བཀའ་བབ་མཁན་ཆེན་དམ་པ་མུན་སེལ་རིན་པོ་ཆེས། དམ་པ་འདི་ཉིད་འོད་གསལ་སྙན་རྒྱུད་ཀྱི་བདག་པོར་གཟིགས་ཏེ་བང་ཆེན་ཆེད་མངགས་ཀྱིས་གདན་ཞུས་ལྟར་བྱོན་པས། ཐོག་མར་མཁན་ཆེན་མཆོག་ནས་ཟབ་མོ་ལྟ་བའི་སྲོལ་གྱི་བྱང་ཆུབ་སེམས་སྡོམ་དང་། ཀློང་གསལ་འཕོ་བའི་དམིགས་ཁྲིད། སྔོན་འགྲོ་ཀུན་བཏུས་དང་ཀློང་གསལ་སྔོན་འགྲོའི་ལྗགས་བཤད།།།ཀཿདམ་པའི་ཞིང་སྒྲུབ་སོགས་ཐུན་མོང་གི་ཆོས་བཀའ་དུ་མ་དང་།།།།ཐུན་མིན་རྡོ་རྗེ་ཐེག་པའི་གནད་གསང་གསལ་བོར་སྟོན་པ་གྲུབ་དབང་སྙན་རྒྱུད་ཆེན་མོ་རྒྱས་བསྡུས་གཉིས། ཁྲིད་ཡིག་ཡེ་ཤེས་བླ་མ། ཀུན་བཟང་ཐུགས་ཐིག ཐུགས་དམ་ནར་མ།།།ཀློང་ཆེན་ཆོས་དབྱིངས་རིན་པོ་ཆེའི་མཛོད།།།།རྡོ་གྲུབ་རྫོགས་གསར་སོགས་ཤིན་ཏུ་ཟབ་པའི་མན་ངག མཁན་ཆེན་ངག་དགའ་རིན་པོ་ཆེ་ལས་བརྒྱུད་པའི་སྙན་བརྒྱུད་ཀྱི་ངོ་སྤྲོད་མཐའ་དག་བུམ་པ་གང་བྱོའི་ཚུལ་དུ་གནང་ཞིང་། ཟབ་གསང་སྙན་བརྒྱུད་ཀྱི་བདག་པོར་མངའ་གསོལ་ཏེ། དགུང་གྲངས་ལྔ་བཅུ་ནས་སྙན་བརྒྱུད་ཀྱི་དམིགས་ཁྲིད་སྐལ་ལྡན་གཞན་ལ་སྤེལ་དགོས་པའི་བཀའ་གསུང་སྤྱི་བོར་བསྩལ།

དགུང་ལོ་ཞེ་བཞི་བ་ཆུ་བྱ་ལོར་རྒྱལ་རོང་ཁོ་སྲུང་དགོན་དང་།།།།སོ་མང་དགོན་སོགས་རྒྱལ་རོང་ཚ་བ་ཁག་ལྔའི་དར་ཐང་དགོན་ལག་རྣམས་ཀྱིས་གདན་དྲངས་པ་ལྟར་ཕེབས་ཏེ་དབང་ཆོས་དུ་མ་གནང་ཞིང་རྒྱལ་བ་དཔལ་ཡུལ་བའི་རང་ལུགས་ཀྱི་ཕྱག་བཞེས་གཙང་མ་རྒྱ་ཆེར་སྤེལ།

དགུང་གྲངས་ཞེ་དྲུག་པ་ཤིང་མོ་ཕག་སྤྱི་ལོ་ ༡༩༩༥། ལོར་སྔ་འགྱུར་བསྟན་པའི་གསལ་བྱེད་མཁན་ཆེན་ཐམས་ཅད་མཁྱེན་པ་༧འཇིགས་མེད་ཕུན་ཚོགས་འབྱུང་གནས་ཀྱིས་བླ་རུང་ལྔ་རིག་ནང་བསྟན་སློབ་གླིང་དུ་རིག་འཛིན་འབུམ་སྒྲུབ་ཆེན་མོའི་དབུ་བཞུགས་སུ་གདན་དྲངས་ཏེ་འདུས་ཚོགས་ཁྲི་ཕྲག་མང་པོའི་དབུས་སུ་འགྲན་ཟླ་དང་བྲལ་བའི་ལྷ་སྤྲུལ་གར་དབང་ཉི་མ་ཞེས་བསྔགས་བརྗོད་ཀྱི་མེ་ཏོག་འཐོར་ཞིང་སྒྲུབ་པ་ཆེན་པོའི་རྡོ་རྗེ་སློབ་དཔོན་དུ་མངའ་གསོལ།།།།ཁྱད་པར་དུ་མཁན་ཆེན་ཉིད་ནས་ཉག་གཏེར་གར་དབང་ལྷ་དགུ་དང་། རྟེན་འབྲེལ་ཉེས་སེལ་སོགས་ཀྱི་དབང་གནང་ཞིང་ཁོང་གི་རྒྱལ་ཚབ་དང་སྔ་འགྱུར་བསྟན་པ་ཡོངས་ཀྱི་བདག་པོར་མངའ་གསོལ་མཛད།།།།དེར་དཔལ་ཡུལ་བའི་ཆོས་བརྒྱུད་འཛིན་པའི་དགོན་སྡེ་ཁག་གི་བླ་ཆེན་རྣམས་ནས་ཀྱང་ཟང་ཟིང་གི་མཆོད་སྤྲིན་དུ་མ་ཕུལ་ཏེ་བསྟན་དགོན་ཡོངས་ལ་གཟིགས་དགོས་པའི་ཞུ་བ་ཕུལ།།།།གཞན་ཡང་ངྷཱི་མདའ་བདེ་ཆེན་ཆོས་གླིང་། ཁང་གསར་སྟག་ལུང་དགོན། སྦྲ་གསར་དགོན། པཎ་ཆེན་དགོན། ཨ་སུག་དཔོན་སྐོར་དགོན།།།།པད་ནག་དགོན།།།།དབུ་ཚ་དགོན།།།།བཀྲ་ཤིས་སྒོ་མང་དགོན།།།།ཨ་སུག་བླ་སྐོར་དགོན།།།།སྨར་རོང་དགོན།།།ཆོས་རོང་དུང་རི་དགོན།།།།སྨེ་བའི་ར་སྐོར་དགོན། ཐུགས་ཆེན་གནས་མཆོག་དགོན། ཡི་ངོག་ཁྱབ་གདལ་དགོན། གཟིས་རི་གཞུ་མདའ་དགོན། །ཆ་ལ་དགོན། །གོ་ཡུལ་རྣམ་རྒྱལ་གླིང་།།།།རྫི་འགག་ནོར་བུ་གླིང་།།།འབྲོང་རྫོང་དགོན། །ཁོ་སྲུང་བསམ་གཏན་གླིང་།།།།རྒྱ་ཁ་ས་འདུ་པངྨ་འོད་གླིང་། དམ་པ་སྟོབས་བཅུ་དགོན་སོགས་མགོ་ལོག་རྒྱལ་རོང་།།།།ལི་གཙང་རྣམས་སུ་དཔལ་ཡུལ་དར་ཐང་གི་དགོན་ལག་བརྒྱ་ཕྲག་ལྷག དུས་འགྱུར་གྱི་དབང་གིས་ཉམས་རྒུད་དུ་ཕྱིན་པ་རྣམས་ལ་དབང་ལུང་གི་བརྒྱུད་པ།།།།བཅའ་ཡིག་དངོས་རྫས་སོགས་བསྩལ་ཅིང་ངེས་པ་དོན་གྱི་བསྟན་པའི་བདག་པོ་གནང་སྟེ་ཆོས་དང་འཇིག་རྟེན་གཉིས་ཀའི་སྒོ་ནས་རྒྱལ་བསྟན་སླར་གསོ་མཛད།

རང་དགོན་དར་ཐང་དུ་གོང་བཤད་ལྟར་རྟེན་གསུམ་རྒྱ་ཆེར་བསྐྲུན་པར་མ་ཟད། སྐུ་གསུམ་ཚོམ་བུ་ཚོགས་སྒྲུབ་ཆེན་མོའི་དབུ་བཞུགས་རྡོ་རྗེ་སློབ་དཔོན་དང་།།།།རི་ཆོས་གསུམ། །སྒྲུབ་གྲྭ། མཚམས་གྲྭ་རྣམས་ལ་རང་ལུགས་ཀྱི་ཟབ་ཆོས་མཐའ་དག་གི་དབང་ལུང་ཁྲིད་རྣམས་ལོ་རེ་བཞིན་ཆད་མེད་དུ་གནང་བ་དང་། བར་སྐབས་རྣམས་སུ་གནམ་ཆོས་དང་རཏྣའི་གཏེར་ཆོས་སྐོར་སོགས་བཀའ་གཏེར་གྱི་སྨིན་གྲོལ་མཐའ་ཡས་པ་དང་།།།།རབ་བྱུང་དགེ་ཚུལ་དང་བསྙེན་རྫོགས་ཀྱི་སྡོམ་པ་སྟོང་ཕྲག་དུ་མ་གནང་སྟེ་རབ་བྱུང་ངུར་སྨྲིག་གི་སྡེ་ཆེན་དབྱར་མཚོ་ལྟར་རྒྱས་པར་བྱས་ཤིང་། ཚུལ་འཆལ་ཕྱོགས་ཙམ་ཡང་དགོན་འདིར་ཉེ་མི་ཆོག་པ་དང་།།།།དུས་དབང་གིས་འབྱུང་ཉེ་བའི་ཉེས་སྤྱོད་མཐའ་དག་ལ་དམིགས་ཀྱིས་དགག་པ་སོགས་ཁྱད་ཆོས་ཕུན་སུམ་ཚོགས་པའི་བཅའ་ཡིག་ཆེན་མོ་གསར་དུ་ལྗགས་རྩོམ་གནང་སྟེ།།།།སྔོན༧སྐྱབས་མགོན་མཆོག་སྤྲུལ་རིན་པོ་ཆེ་ཞལ་བཞུགས་པའི་སྐབས་ལས་ཀྱང་ལྷག་པའི་རབ་བྱུང་གི་འདུས་སྡེ་ཕྱི་གཙང་ནང་གཙང་དུ་བསྐྲུན་པར་མཛད་པའི་ཕྲིན་ལས་འདི་གཅིག་པུ་ཡང་བསམ་གྱིས་མི་ཁྱབ་བོ།།།།

དེ་ལྟར་དམ་པ་འདི་ཉིད་ཕྱི་སོ་ཐར་གྱི་ཚུལ་ཁྲིམས་གཙང་ཞིང་འདུལ་བ་གཞི་གསུམ་གྱི་ཕྱག་ལེན་ལ་ཤིན་ཏུ་མཁས་པར་མ་ཟད།།།།ཚེ་རབས་དུ་མར་རྒྱལ་སྲས་ཀྱི་སྤྱོད་པ་ལ་བསླབས་པས་ནང་བྱང་སེམས་ཀྱིས་རྒྱུད་བརླན་ཏེ་སེམས་ཅན་སྤྱི་དང་ཁྱད་པར་ཉམས་ཆུང་གི་རིགས་ལ་ཟས་གོས་ཆོས་གསུམ་གྱིས་ལྷག་པར་བསྐྱང་ཞིང་བརྩེ་བ་དང་། གསང་བ་རྡོ་རྗེ་ཐེག་པའི་བསྙེན་སྒྲུབ་ཀྱི་རིམ་པ་ཚད་དུ་འཁྱོལ་ཞིང་ཡང་གསང་འོད་གསལ་སྙན་བརྒྱུད་ཀྱི་མན་ངག་ལ་ཉམས་ལེན་གནད་དུ་ཕྱིན་པས། ཆོས་སྐྱོང་སྲུང་མ་རྣམས་ཀྱིས་དངོས་སུ་སྡོང་གྲོགས་མཛད་པ་དང་།།།ཚེ་རབས་སྔོན་མའི་མཛད་པ་རྣམས་རྗེས་སུ་དྲན་པ་དང་།།།།རང་གི་ཐུན་མིན་གྱི་བླ་མ་༧སྐྱབས་མགོན་མཆོག་སྤྲུལ་རིན་པོ་ཆེས་ཞལ་གཟིགས་པ་སོགས་ཀྱི་ཚུལ་གོང་དུ་ཡང་ཅུང་ཟད་སོང་ལ།

གཞན་ཡང་ཚོགས་ཆེན་ལྷ་ཁང་གསར་བཞེངས་སྐབས་སུ་བཀའ་བརྒྱད་གསང་བ་ཡོངས་རྫོགས་ཀྱི་ཞལ་ཐང་གི་ཐོག་མའི་སྐྱ་ཐིག་རང་བབ་ཏུ་དོད།།།།གསེར་ཉུང་ངུ་ཙམ་གྱིས་གསེར་སྐུ་ཐོག་ཚད་གསུམ་པ་ཅན་གསུམ་དང་སྐུ་གཟུགས་ཤིན་ཏུ་མང་པོར་བྱུག་ཀྱང་ཟད་པ་མེད་པར་བྱིན་གྱིས་རླབས། ཉེ་གནས་དང་ཕྱག་མཛོད་སོགས་ལ་ཡང་མཐོང་ཐོས་མེད་པར་དངོས་རྫས་བརྒྱ་ཕྲག་མང་པོ་གློ་བུར་དུ་བྱུང་།།།རྒྱུ་རྫས་ཉུང་ཙམ་ལ་ཅི་ཙམ་སྤྱོད་ཀྱང་ཟད་པ་མེད་པ་སོགས་ཕྱི་ཡོ་བྱད་ལ་དབང་ཐོབ་པ་ཡང་། མདོ་ལས།

གང་ཚེ་མར་མེ་མཛད་ཀྱིས་ང་།།།།

ལུང་བསྟན་གྱུར་པ་དེ་ཡི་ཚེ།།།།

ས་བརྒྱད་པ་ནི་ཐོབ་གྱུར་ཅིང་།།།།

དབང་བཅུ་དག་ཀྱང་ཐོབ་པར་གྱུར།།།།ཅེས་གསུངས་པ་ལྟར།།ས་ཆེན་འཕགས་པའི་འབྲས་རྟགས་ཡིན་པར་མངོན་ནོ།།།།གཞན་ཡང་།།།།ཇི་སྐད་དུ།

བསྟན་སྲུང་རྒྱ་མཚོའི་ཚོགས་ཀྱིས་མངོན་སུམ་དུ། །

སྔོན་ཚེ་རྡོ་རྗེ་འཆང་གི་བཀའ་སྩལ་བཞིན། །

ཁྱེད་ཀྱིས་བསྟན་པ་འཛིན་དང་སྤེལ་བ་ལ།།།།

ལྷག་པར་གུས་པའི་ཡིད་ཀྱིས་ཚུལ་བཞིན་བསྒྲུབ།།།།ཅེས་གསུངས་པ་བཞིན། དཔལ་རིའི་ཞིང་བཀོལ་བཞེངས་པར་དགོངས་ཚེ་འོད་གསལ་གྱི་སྣང་བར། མི་དམར་པོ་རྟ་དམར་ལ་ཞོན་པ་ཞིག་འོང་ནས་གཡང་ཁུག་ཡིན་ཟེར་བ་ཞིག་ཕྱག་ཏུ་གཏད་དེ་ཁྱོད་ཀྱིས་རྒྱུ་རྫས་འདི་ལ་བསྟེན་ནས་ས་འདིར་དཔལ་རིའི་ཞིང་བཀོད་ཅིག་བཞེངས་དང་ཡུལ་དུས་སྤྱི་ལ་ཕན་པ་རྒྱ་ཆེན་པོ་འོང་ཞེས་ཆོས་སྐྱོང་གིས་ལུང་བསྟན་ཅིང་ཡོ་བྱད་སྦྱར།།།།ཞིང་བཀོད་ཀྱི་ས་ཐིག་གདབ་ཚེ་ཀེང་དཀར་དམར་ཟུང་གིས་ཐིག་གདབ་པར་གཟིགས་པ་སོགས་འོད་གསལ་དག་པའི་སྣང་བ་ཕྱོགས་མེད་དུ་གཟིགས།

གཞན་ཡང་སྔ་འགྱུར་མཐོ་སློབ་མདོ་རྒྱུད་ཐོས་བསམ་གླིང་དུ་རྟ་ནག་ལྕགས་རལ་ཅན་གྱི་ཚོགས་སྒྲུབ་མཛད་ཚེ་དཀྱིལ་འཁོར་དུ་སྒྲུབ་རྟེན་གྱི་བདུད་རྩི་ཁོལ་ཞིང་ཕྱིར་ལུད་པ་ལས་སློབ་ཀུན་གྱིས་མཐོང་། གཤིན་པོ་ཞིག་ལ་འཕོ་བ་བཏབ་ཚེ་སྦ་རོད་ཡང་སྤྲུལ་རིན་པོ་ཆེས་གཤིན་པོའི་རྣམ་ཤེས་སྒྲོམ་དུ་བཀུག་པ་དམ་པ་འདི་ཉིད་ཀྱིས་ཕཊ་སྒྲ་གཅིག་གིས་སྒྲོམ་གྱི་ཁ་ཆོད་ནམ་མཁར་ཐག་སྒྲ་དང་བཅས་ཡར་བ། ཉེ་གནས་ཀྱིས་དངོས་སུ་མཐོང་བ་སོགས་ཀྱིས་མཚོན་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་བདེན་མེད་སྒྱུ་མའི་རོལ་བར་མངོན་སུམ་དུ་རྟོགས་པའི་ལག་རྗེས་ལས་བྱུང་བའི་གྲུབ་པའི་རྟགས་མཚན་འབུམ་ཕྲག་དུ་མ་མངའ་བའི་ནང་དང་གསང་བའི་རྣམ་ཐར་ཤིན་ཏུ་མང་པོ་ཡོད་པ་གོར་མ་ཆག་ཀྱང་།།།དེ་དག་ཐམས་ཅད་རེ་རེ་ནས་རྟོགས་པ་ནི་བྱང་ཆུབ་སེམས་དཔའ་རང་དང་རྟོགས་པ་མཉམ་པ་དང་། རང་ལས་ལྷག་པ་དག་གིས་སྤྱོད་ཡུལ་ལས་སོ་སོའི་སྐྱེ་བོ་རང་ཅག་ལྟ་བུས་ཇི་ལྟ་བ་བཞིན་དཔོག་པར་མི་ནུས་ཏེ།།།།དབུ་མ་ལ་འཇུག་པ་ལས།

ནམ་མཁའ་མེད་པས་འདབ་ཆགས་ལྡོག་པར་མི་འགྱུར་གྱི།།།།

འདིར་ནི་རང་མཐུ་ཟད་པས་ལྡོག་པར་འགྱུར་དེ་བཞིན།།།།

སློབ་མ་དང་བཅས་སངས་རྒྱས་སྲས་རྣམས་སངས་རྒྱས་ཀྱི།།།།

ཡོན་ཏན་མཁའ་ལྟར་མཐའ་ཡས་མ་བརྗོད་ལྡོག་པར་འགྱུར།།།།

དེའི་ཕྱིར་བདག་འདྲས་ཁྱོད་ཡོན་འདི་དག་ཅི།།།།

ཤེས་པ་དང་ནི་བརྗོད་པར་ནུས་འགྱུར་རམ།།།།

ཞེས་གསུངས་པ་ལྟར་རོ།།།།དེས་ན་དམ་པ་འདི་ཡི་ཕྱི་ནང་གསང་གསུམ་གྱི་རྣམ་ཐར་རྒྱ་མཚོ་ལྟ་བུ་ལས། སྐུ་ཚེའི་སྟོད་ཀྱི་མཐུན་སྣང་ཕྱི་ཡི་མཛད་པ་གཙོ་ཆེ་བ་རྣམས་ཅུང་ཟད་བརྗོད་པ་འདི་ཡང་། རྗེ་གང་གི་ཞལ་སློབ་གཞུང་ལུགས་རབ་འབྱམས་སྨྲ་བ་ལ་མི་འཇིགས་པའི་སྤོབས་པ་ཐོབ་པ་མཁན་རིན་པོ་ཆེ་ཨོ་རྒྱན་བརྩོན་འགྲུས་གྱིས་མཛད་པའི་རྣམ་ཐར་གཞིར་བཞག་ཐོག།།།དག་སྣང་གི་མིག་ཟུང་རབ་ཏུ་ཡངས་པའི་མཆེད་གྲོགས་དུ་མའི་ངག་ལས་ཐོས་པའི་རྣམ་ཐར་ཐོར་བུ་ཉུང་ངུས་ཟུར་བརྒྱན་ཏེ་བཀོད་པ་ལས་རང་བཟོས་ཟོལ་བསྟོད་ཀྱི་དྲི་མ་ཕྱོགས་ཙམ་ཡང་མེད་པས་ཀུན་གྱིས་ཡིད་ཆེས་པར་རིགས་སོ།།།།

སླར་སྨྲས་པ།

རྨད་བྱུང་ཐུགས་བསྐྱེད་ཤིང་རྟས་ལེགས་དྲངས་པའི།།

ངོ་མཚར་མཛད་པའི་རོལ་མོ་རྒྱུ་སྐར་གྲངས། །

དཔག་ཡས་ཞིང་གི་འཆི་མེད་གྲོང་ཀུན་ཏུ། །

ཁྱབ་པར་གདལ་དེར་བདག་ཡིད་སྤྲོ་དགས་ཕྱོགས། །

གང་གི་ཐུགས་བསྐྱེད་ཆུ་གཏེར་ལས་བྱུང་བའི། །

གཞན་ཕན་མཛད་བཟང་ནོར་བུའི་ཕུང་པོ་ཀུན། །

ཟོལ་མེད་ཚིག་གི་སྲད་བུ་ལ་བརྒྱུས་ནས། །

སྐལ་བཟང་སྐྱེ་བོའི་རྣ་བའི་རྒྱན་དུ་སྐྲུན། །

འདིར་འབད་ལས་བྱུང་རྣམ་དཀར་ཆར་བའི་རྒྱུན། །

ལྷག་བསམ་དལ་འབབ་ཀླུང་དང་ཉེར་འགྲོགས་ནས། །

མཐའ་ཡས་འགྲོ་བའི་ཤེས་རྒྱུད་གངྒཱའི་རྡུལ། །

བྱང་ཆེན་རྒྱ་མཚོའི་ཀློང་དུ་འདྲེན་ནུས་ཤོག །

བདག་སོགས་དེང་ནས་སྐྱེ་བའི་ཕྲེང་བ་ཀུན། །

དཔལ་ལྡན་བླ་མའི་གསུང་གི་སྣང་བ་ཡིས། །

ཆོས་རབ་རྣམ་འབྱེད་བློ་གྲོས་མིག་རྙེད་ནས། །

དོན་གཉིས་ལྷུན་གྱིས་འགྲུབ་པའི་མཐུ་ཐོབ་ཤོག །

དེ་ལྟར་རྣམ་དག་སྨོན་པའི་བདེན་མཐུ་ཡིས། །

རྒྱལ་དང་རྒྱལ་སྲས་སེམས་དཔའ་ཆེན་པོའི་ཚོགས། །

དབྱིངས་ནས་ཡེ་ཤེས་སྤྱན་གྱིས་ཉེར་དགོངས་ནས། །

སྨོན་པ་གཡེལ་མེད་འགྲུབ་པའི་མཐུན་འགྱུར་མཛོད། །