༄༅།། ཨེ་མ་ཧོའི་རིག་མཛོད།

༄༅།། ཁྱི་དང་བྱི་ལའི་རྩོད་གླེང་།

ཉིན་ཞིག་ལ།  རྒན་རྒོན་གཉིས་ཀས་འཚོ་བའི་ཕྱོགས་ལ་ལབ་གླེང་བྱེད་བཞིན་པའི་སྐབས་དེར།  བྱི་ལས་ཁྱི་ཕྲུག་གྲོགས་སུ་བཀུག་སྟེ་ཁ་ཟས་འཚོ་དུ་སོང་། རྣམ་རྒྱུན་ཁྱི་དང་བྱི་ལ་གཉིས་ཀ་ཉི་མར་ལྡེས་ནས་ཕན་ཚུན་ལ་དགའ་བའི་གླེང་མོ་སྣ་ཚོགས་བྱེད་ཀྱི་ཡོད་པ་རེད། གཅིག་གིས་གཅིག་གི་ངོ་ལ་འཕྲུག་རེས་བྱེད་པའི་ཚུལ་དེ་མཐོང་ཚེ་འདི་ལྟ་བའི་འགྲུག་མཐུན་ཞིག་ཡོང་དཀའ་བ་རེད་སྙམ།



བྱི་ལས་ཁྱི་ཕྲུག་ལ།  འུ་ཚང་ནས་ངེད་གཉིས་ལོ་མང་བོའི་ཟ་ལྷག་འཐུང་ལྷག་ཁོ་ན་ཟོས་ནས་བསྡད་པས། ཟ་མ་ཞུམ་པོ་ཞིག་ཟ་མ་ཐུབ་པ་རེད།ད་ཁྱིམ་མཚེས་ཚང་ལ་ཟ་མ་ཞུམ་པོ་ཞིག་རྐུ་རུ་འགྲོ་ཞེས་བཤད་དུས།  ཁྱི་ཕྲུག་དགའ་ཐག་ཆོད་ནས་བྱི་ལའི་རྗེས་ལ་བརྒྱུགས་སོང་།

དེ་ནས་ཁོང་གཉིས་ཁྱིམ་མཚེས་ཚང་གི་སྒོ་ཁར་བསླེབ་ཚེ།  བྱི་ལས་ཁྱི་ཕྲུག་ལ།  གྲོགས་པོ་ཁྱོད་ཀྱིས་འདི་ནས་སོ་ལྟ་བྱོས།  ང་ནང་དུ་སོང་ནས་ཟས་ཞིམ་པོ་ཞིག་བརྐུ་འེ་ཐུབ་བལྟ་ཞེས་བཤད།  དེ་ནས་ཁྱི་ཕྲུག་སྒོ་རྩར་ཉལ་ནས་བསྡད། དུས་ཡུན་རིང་བོ་མ་འགོར་བར་བྱི་ལ་ལག་སྟོང་དུ་ཕྱིར་ཐོན། ཁྱི་ཕྲུག་གིས་ཁྱོད་ཀྱི་མཆུ་ཏོའི་ཐོག་ལ་འོ་མ་འགོས་འདུག   ང་ལ་འོ་མ་བཟུང་ནས་མ་འོང་བ་ག་རེ་ཡིན་ཞེས་དྲིས།  བྱིས་ལས་འོ་མ་འོ་ཟེའུ་ནང་ན་ཡོད་པས་ཁྱེར་ནས་ཡོང་ཐུབ།  ད་ངེིད་གཉིས་འགྲོ།  ཁྱིམ་མཚེས་མེད་པོ་འདི་ཚང་ནས་ཟ་མ་ཞུམ་པོ་ཞིག་མི་རྙེད་ཅེས་བཤད།

ཁྱི་ཕྲུག་གིས་དེ་ན་ད་ཐེངས་འུ་གཉིས་ཨ་ཁུ་ཕྱུག་པོ་ཚང་ལ་འགྲོ།  ཁོང་ཚང་ལ་ཟ་མ་ཞིམ་པོ་རེ་ཡོད་པ་ཁོ་ཐག་ཡིན།  ཞེས་ཆུ་ཁུང་ནས་ཡར་ནང་དུ་འཛུལ་ནས་ཟ་མ་ཞིམ་པོ་ཞིག་བཙལ་གྱང་མ་རྙེད་པ་རེད།  སྐབས་དེར་བྱི་ལས་བྱི་བ་ཞིག་བཟུང་ཡོང་ནས།  ཡ་ཁྱི་ཕྲུག་འདིར་ཤོག   འུ་གཉིས་ཀྱིས་བྱི་ཤ་འདི་མཉམ་ཟ་བྱེད་ཅེས་བཤད།

ཁྱི་ཕྲུག་གིས་སྣ་གཉེར་ཏེ།  ངས་ཤ་འདི་མི་ཟ་སེམས་ཐག་ཡིན།  ཤ་འདི་ནི་སྐྱུག་བྲོ་བ་ཞིག་རེད།  ཁྱོས་ཀྱི་ང་ལ་ཟ་མ་ཞིམ་པོ་ཞིག་བཙལ་རོགས་མི་བྱེད་པར།  མགོ་བསྐོར་གཏོང་དགོས་པ་འདི་ག་རེ་རེད་ཅེས་བཤད་ཞོར་ལ་ཕྱིར་བུད་སོང་།ཕྱི་ནས་ཁྱི་ཕྲུག་བྱི་ལ་མཉམ་དུ་ཟས་རྐུ་བར་མ་སོང་བར་ཡུལ་ནས་བསྡད་པ་རེད།  བྱི་ལས་ཁྱིམ་མཚེས་ཀྱིས་ལུག་བཤས་པའི་གྲོད་པུ་ཞིག་བརྐུས་ཏེ་ཟ་བར་རྩོམ་པའི་ཚེ།  ཁྱི་ཕྲུག་གིས་ཁོའི་ལག་ནས་འཕྲོག་སྟེ།  ངས་ཉིན་གཉིས་ལ་ཟ་མ་ཟོས་མེད་པས། ཁྱོད་ཀྱིས་ང་ལ་ངོམས་པ་ཡིན་ནམ།  ཞེས་བཤད་བཞིན་ཁོ་རང་གིས་ཟོས།

བྱི་ལས་འདི་ནི་ངས་བཙལ་བའི་རྒྱུ་ཡིན་པས། ཁྱོད་ཀྱིས་ཟ་ན་མི་ཆོག ང་ལ་ཕྱིར་སྤྲོད།  ཁྱོད་རང་ལྟོགས་ན་ཁྱོད་རང་ཟ་མ་འཚོལ་དུ་སོང་ཞེས་རྩོད་དེ་འཕྲོག་རེས་བྱས་པ་དང་།  མཐར་ཕན་ཚུན་ལ་ཁ་ཡང་མི་གྲགས་པར་རང་རང་གི་སར་བསྡད། རྒན་རྒོན་གཉིས་ཀྱིས་གཟི་ཇི་ལྟར་བཤད་ཀྱང་འགྲིག་ཐབས་མ་བྱུང་།

དེ་ནས་བྱི་ལར་རྒན་པོས་བདག་སྐྱོང་བྱས་ནས་ཚ་ཐབས་སྟེང་ལ་བཞག  ཁྱི་ཕྲུག་ལ་རྒན་མོས་གཉོར་སྐྱོང་བྱས་ནས་སྒོ་སྲུང་དུ་བཅུགས།  དེ་ནས་བཟུང་ཁྱི་དང་བྱི་ལ་གཉིས་དགྲ་ཟླ་རུ་གྱུར་ཏེ་ཁྱོན་ནས་འཁོན་འཛིང་མ་ཞི་བ་རེད།


༄༅།། ར་མ་བློ་གྲོས་ཅན་དང་སྤྱང་ཀི།
སྔོན་ཁྱིམ་བདག་ཞིག་ལ་ར་ཕོ་ཞིག་ཡོད་པ་དེ་ཡུལ་ལྷའི་སྒོ་ཟོག་ཏུ་ཕུལ་ནས་ལྷ་རྒྱལ་རི་བོའི་རྩེ་རུ་བཏང་།  ར་ཕོས་ཉིན་མོ་རི་མགོ་ནས་རྩྭ་ཟོས་ཤིང་མཚན་མོ་ཞོལ་དུ་བབས་ནས་ཆུ་འཐུང་བཞིན་ཉིན་མཚན་འདས། ཉིན་ཞིག་རི་ཞོལ་གྱི་གྲམ་ཆུའི་ཁ་ནས་སྤྱང་ལྟོགས་ཤིག་ལ་འཕྲད་སོང་།  ར་ཕོས་སེམས་ལ་དེ་རིང་སྤྱང་ལྟོགས་འདིས་བདག་ཟ་ངེས་སུ་གྱུར་ཡང་།  བདག་གིས་ནུས་ཚོད་ཀྱིས་ཕར་རྒོལ་བྱ་དགོས་སྙམ་ནས་རྭ་ཅོ་གཉིས་སྤྱང་ཀིར་གཏན་ནས་བསྡད།



དེ་དུས་སྤྱང་ཀི་ཡང་ཅུང་ཧད་པར་གྱུར་ནས་འཛུམ་དམུལ་དམུལ་གྱིས།  ར་ཕོ་ལགས།  ཁྱོད་ཀྱི་མགོ་ལ་སྲ་མཁྲེགས་རྡོ་རྗེ་རྩེ་བརྒྱ་ལྟ་བུ་ཞིག་ཡོད་པ་དེ་ཅི་རེད། ཞེས་དྲིས་པ་ན།  ར་ཕོས་རྫིག་ཉམས་ཆེན་པོས།  འདི་ནི་ལྷ་ཚངས་པས་གནང་བའི་གཅན་གཟན་འགོག་བྱེད་ཀྱི་རྡོ་རྗེ་རྭ་ཅོ་ཡིན་ཞེས་ཟེར། སྤྱང་ཀིས་རྭ་ཅོ་དེའི་སྟོབས་ཆེ་ཆུང་ཅི་འདྲ་འདུག   ཁྱོད་ཀྱིས་ང་ལ་བསྟན་ན་ཆོག་གམ།  ཞེས་ཟེར།  ར་ཕོས།  འོ།  ཁྱོད་དེ་རུ་སྡོད་དང་ངས་ཁྱོད་ལ་བསྟན་ཆོག་ཟེར་ནས།  རྒྱང་རིང་ནས་རྒྱུག་འོང་སྟེ་སྤྱང་ཀིར་གཅིག་རྡུང་བས་སྤྱང་ཀིའི་གསུས་འོག་ནས་ཤོར་བར་གྱུར་པ་ན།  ཨ་ཁ།  ད་ཐེངས་དམའ་སོང་།  ད་ཐེངས་དམའ་སོང་ཟེར།




དེ་ནས་ར་མས།  ཡ།  ད་ངས་ཡང་བསྐྱར་ཐེངས་གཅིག་རྡུང་ཟེར།  སྤྱང་ཀི་སྔར་ལྟར་བསྡད་པ་ལ། ར་ཕོ་རྒྱང་རིང་ནས་རྒྱུག་འོང་ནས་རྡུང་བ་ལ་སྤྱང་ཀིའི་ཐོག་ནས་ཕར་ཤོར།  ཨ་ཁ། ད་ཐེངས་མཐོ་དྲགས་སོང་།ངས་སླར་ཡང་གཅིག་རྡོང་བར་བྱ།  ཐེངས་འདིར་མི་མཐོ་མི་དམའ་བར་བརྡུང་བར་བྱ།  ཞེས་པ་ན།  སྤྱང་ཀི་ར་ཕོའི་རྡུང་ཤོམ་ལ་བལྟས་ནས་སྐྲག་སྟེ་དོན་དག་ཅིག་ལ་ཁ་གཡར་ནས་གཡོལ།

སྤྱང་ཀིས་ཆུ་བོ་དེར་བརྒལ་ནས་ཕྱིར་མིག་ཅིག་བལྟས་ཚེ།  ར་ཕོས་བག་ཕེབས་ཀྱི་ངང་ཆུ་འཐུང་རྗེས་རྭ་ཅོ་ཕ་བོང་ཞིག་ལ་གཏད་ནས་ཉལ་འདུག་པ་མཐོང་བས།  ཡང་ཁོར་ར་ཤ་ཟ་བའི་འགྲམ་ཆུ་འཁོར་ནས་ཕྱིར་ཡོང་བ་ན།  ར་ཕོས།  སྤྱང་ཀི་ལགས།  ཁྱོད་ཏོག་ཙམ་སྡོད་དང་།  ངས་རྭ་ཅོ་ཕ་བོང་ལ་བརྡར་རྗེས་ཁྱོད་ལ་རྩལ་སྟོབས་ཤིག་ངོམ།  ཞེས་པ་ན།  སྤྱང་ཀི་མཆོང་རྒྱུག་འདུར་གསུམ་གྱིས་རྒྱང་རིང་གི་ཡུལ་དུ་བྲོས་སོང་ངོ།  དེ་ལྟར་ར་ཕོས་རང་གི་བློ་གྲོས་ལ་བརྟེན་ནས་སྤྱང་ལྟོགས་དེའི་ཁ་ནས་ཐར་བར་གྱུར།






རྒྱུ་ནོར་གྱི་མནར་གཅོད།
གནའ་སྔ་མོར་ཞིག་ལ་ཚོང་དཔོན་བཀྲ་ཤིས་ཟེར་བ་ཞིག་ཡོད།  ཁོ་ལ་རྟ་ནོར་ལུག་གསུམ་མང་བས་རི་ལུང་བ་ཚང་མ་ཁེབས་ནས་འདུག།  ཁོའི་ས་ཞིང་ནི་ཡངས་པའི་རྩ་ཐང་ལས་ཀྱང་ཆེ།  ཁོ་ལ་གཡོག་པོ་གཡོག་མོ་སྟོང་ཕྲག་ལས་ཀྱང་བརྒལ།  ཁང་བར་ཐོག་བརྩེགས་དགུ་ཡོད་པ་དང་།  བརྗིད་ཆགས་ཤིང་ཡིད་དུ་འོང་བ་ཞིག་ཡོད་པ་རེད། ཡིན་ནའང་ཚོང་དཔོན་བཀྲ་ཤིས་ཀྱི་འདོད་པ་ནི་དུང་ཞབས་མེད་ཅིག་དང་མཚོངས་པར།  གནམ་འོག་གི་རྒྱུ་ནོར་ཚང་མ་ཁོ་ལ་ཐོབ་ན་ཅི་མ་རུང་བསམ་ནས།  ཧམ་སེམས་ཀྱི་རྒྱུ་མ་འགུལ་བཞིན་བསྡོད་ཀྱི་ཡོད་པ་རེད།



ཁོའི་ལུས་ཁོམ་ན་ཡང་སེམས་མི་ཁོམ་པར།  རྟག་ཏུ་རྒྱུ་སྒྲུབ་སྟངས་ལ་བསམ་བློ་བཏང་དྲགས་པས།  ཟས་ཞིམ་པོ་བཟའ་མི་འདོད་པ་དང་གོས་ཡག་པོ་གྱོན་མི་འདོད་པ་ཞིག་ཏུ་གྱུར་བ་དང་།  ནུབ་མོར་གཉིད་སྐྱིད་པོ་ཞིག་གྱང་ཁུག་མི་ཐུབ་པར་གྱུར།  མཐར་ཁོའི་ལུས་པོ་ཇེ་སྐམ་ནས་ཇེ་སྐམ་དུ་གྱུར་ནས་སྤྲེའུ་ཞིག་དང་མཚུངས་པར་གྱུར།



དེ་དུས་ཁོ་ཚང་གི་ཉེ་འདབས་སུ་རང་འཐག་ཞིག་ཡོད་པ་ལ།  རང་འཐག་དེ་འཐག་མཁན་གཡོག་མོ་ལོ་བཅོ་བརྒྱད་བཅུ་དགུར་སོན་པ་མ་ཐག་པ་ཞིག་ཡོད་རེད།  ཁོ་མོས་ཉིན་གང་པོར་རྩམ་པ་འཐག་ནའང་ངལ་གསོ་སྐར་ཆ་གཅིག་ལ་བྱེད་ཁོམ་མ་བྱུང་ནའང་།  ཁོ་མོར་ཐོབ་པ་ནི་ཇ་ཐུན་གསུམ་ལ་རྩམ་རྐྱང་ཞིག་ལས་མེད།  འོན་གྱང་ཁོ་མོས་གླུ་ཁོ་ན་བླངས་ནས་འདུག་པ་ལས་གཞན་བསམ་རྒྱུ་ཅང་མེད་པ་རེད། ཚོང་དཔོན་བཀྲ་ཤིས་ཀྱིས་རྟག་པར་ཉིན་རེའི་ཡོང་སྒོ་དང་འགྲོ་སོང་རྩིས་བརྒྱབ་ནས་མི་ཁོམ་པར་ཡོད་དུས།  སྒེའུ་ཁུང་ནས་གཡོག་མོ་སྐྱིད་པོ་དེ་མཐོང་གི་ཡོད་པ་དང་།  མོས་བླངས་པའི་གླུ་སྒྲ་དང་དགོད་སྒྲ་ཐོས་འོང་གི་ཡོད་པ་རེད།


ཉིན་ཞིག་ཚོང་དཔོན་བཀྲ་ཤིས་ཀྱི་སེམས་ལ།  ང་ལ་རྒྱུ་ཕྱུག་ལོང་སྤྱོད་འདི་འདྲ་ཡོད་ནའང་།  ཐོབ་བྱའི་འབྲས་བུ་སེམས་སྡུག་ཁོ་ན་རེད།  གཡོག་མོ་འདི་ལ་རྒྱུ་ཁབ་སྐུད་ཙམ་ཡང་མེད་ཀྱང་།  མོ་འདི་འདྲའི་དགའ་དགོས་དོན་ག་རེད་ཡིན་ནམ། མོའི་ནང་དུ་ངེས་པར་དུ་སོང་ནས་ལྟ་དགོས་ཞེས་ཁེར་བཤད་བྱས་ཏེ་ཁང་བའི་སྒོར་བུད། དེ་ནས་ཚོང་དཔོན་བཀྲི་ཤིས་ཀྱིས་གཡོག་མོའི་འདུག་སའི་ཁང་བའི་སྒོ་གསང་ནས་ཡར་ནང་ལ་བལྟས་ཚེ། གཡོག་མོ་དེས་ལྭ་བ་ལྷན་པ་དགུ་བརྩེགས་ཅན་ཞིག་གྱོན་པ་ཡོད་པ་དང་། ལྷམ་གྱི་སྣ་སྣེ་ཐེད་དེ་རྐང་བའི་འཛུམ་མོ་རྣམས་ཀྱི་ཕྱིར་མངོན་འདུག  ཡིན་ཡང་མོའི་སེམས་ལ་མ་སྐྱིད་པ་གང་ཡང་མེད་པར་གླུ་ཆུང་ཞིག་བླངས་ནས་བསྡད་ཡོད་པ་མཐོང་།



ཕྱི་ཉིན་ཚོང་དཔོན་བཀྲ་ཤིས་ཀྱིས་མོར་བརྟགས་ཕྱིར།  གསེར་རྡོག་འགའ་གཡོག་མོའི་སྒོ་དྲུང་དུ་བཞག་ནས་ཐག་རིང་ས་ཞིག་ནས་བལྟས་བསྡད་པ་ན།  གཡོག་མོས་གླུ་ལེན་ཞོར་དུ་ཡོང་ནས་གསེར་རྡོག་དེ་མཐོང་བ་ན།  ཡར་ལྟ་མར་ལྟ་འགའ་བྱས་རྗེས།  མི་གཅིག་ཀྱང་མ་མཐོང་བས་དངུལ་དེ་རང་གི་རུམ་ལ་བཅུག ཉིན་དེ་ནས་བཟུང་གཡོག་མོས་རང་འཐག་འཐག་དུས་དང་།  ལམ་དུ་འགྲོ་སྐབས།  དགོང་མོ་ཉལ་སྐབས་དང་ཟ་མ་ཟ་སྐབས་ནམ་ཡིན་ཡང་། ངའི་དངུས་འདི་བཙོང་ན་ཡིན་ཐང་ཅི་ཙམ་ཡོད་དམ། དངོས་པོ་ཅི་ཞིག་ཉོའམ་ལ་སོགས་པའི་བསམ་བློ་ཁོ་ན་བཏང་ནས།  གླུ་ལེན་པ་དང་གད་མོ་བགོད་པ་སོགས་མེད་པར་གྱུར། 



དེ་ནས་ཚོང་དཔོན་བཀྲ་ཤིས་གཉིད་ལས་སད་པ་བཞིན།  ཨོ།  འཇིག་རྟེན་འདི་ན་ལུས་སེམས་མི་བདེ་བར་བྱེད་མཁན་ནི་རྒྱུ་ནོར་བསམ་ནག་དེ་རེད་བསམ་ནས།  རྒྱུ་ནོར་རྣམས་དབུལ་འཕོངས་ལ་སྦྱིན་པ་བཏང་།  འཚོ་བ་སྟབས་བདེ་ཞིག་བསྐྱལ་ནས་བསྡད་པ་རེད།