Wednesday 24 October 2012
07:00 | 
Posted by
༄༅།། ཨེ་མ་ཧོའི་རིག་མཛོད་། |
|
༄༅།།ངག་གི་དབང་ཕྱུག་ལ་བསྔགས་པ་པད་དཀར་བཞད་པའི་འཛུམ་མདངས་ལེགས་བཤད་དབྱངས་ཀྱི་
|
|
[ 2012-10-23 18:14:16 | By: amaho ]
|
|
ན་མོ་གུ་རུ་མཉྫུ་གྷོ་ཥ་ཡ།། སྲས་དང་བཅས་པའི་རྒྱལ་བ་ཡོངས་ཀྱི་མཁྱེན་རབ་ཡེ་ཤེས་ཕུང་པོའི་མདངས།། མཚན་དང་དཔེ་བྱད་གཟུགས་སུ་ཤར་བ་འཇམ་དབྱངས་མཁྱེན་པའི་གཏེར་ཆེན་པོར།། སྲིད་པའི་གཡང་སར་བར་མེད་འཕྱན་པའི་སྐྱབས་མེད་བུ་ངས་འབོད་ལགས་ན།། མི་མངོན་དབྱིངས་ནས་ཡུད་ཙམ་དགོངས་ཤིག་ལྷག་པའི་ལྷ་མཆོག་འཇམ་པའི་དཔལ།། གྲངས་མེད་ཞིང་བཞུགས་རྒྱལ་བ་འབུམ་གྱིས་མཁྱེན་རབ་བདག་པོའི་གསང་གསུམ་གྱི།། ཡོན་ཏན་རྒྱ་མཚོར་དུ་མའི་བསྐལ་བར་བསྔགས་བརྗོད་ལས་ལ་རབ་ཞུགས་ཀྱང་།། འཕགས་མཆོག་ཁྱེད་ཀྱི་མཛད་པའི་ཕ་མཐའ་ནམ་ཡང་དམིགས་སུ་ཡོད་མིན་ན།། རྨོངས་ཆེན་བདག་འདྲས་བསྙད་ནུས་མིན་ཀྱང་ངག་སྒྲིབ་དག་ཕྱིར་བསྟོད་པའི་ཚུལ།། གསེར་གྱི་རྡུལ་མང་བརྩེགས་པའི་ལྷུན་པོར་ཉིན་བྱེད་སྟོང་གིས་འཁྱུད་པ་བཞིན།། ལྟ་བས་མི་བཟོད་དམར་སེར་འོད་ཀྱི་གཟི་བྱིན་འབར་བའི་རྩེད་འཇོ་ངོམ།། དཔེ་ཡིས་མི་མཚོན་ཟུང་འཇུག་སྐུར་བཞེངས་ཡེ་ཤེས་སེམས་དཔའི་གྲགས་སྙན་ཅན།། བསྐལ་མང་གོང་ནས་མངོན་སངས་རྒྱས་ཀྱང་རྒྱལ་སྲས་སེམས་དཔའི་རྣམ་པར་འཕྲུལ།། བརྒྱད་གཉིས་ལང་ཚོའི་མཚར་སྡུག་དཔལ་འཆང་སྣང་སྟོང་མི་ཕྱེད་རྡོ་རྗེའི་སྐུ།། དག་དང་མ་དག་མུ་མེད་ཞིང་ལ་སྣ་ཚོགས་གཟུགས་ཀྱིས་རྣམ་རོལ་ཀྱང་།། ཇི་སྙེད་སྲས་བཅས་རྒྱལ་བ་ཡོངས་ཀྱིས་བསྟོད་བསྔགས་བྱེ་བའི་དབྱར་སྐྱེས་རྔ།། རབ་འབྱམས་ཞིང་གི་ཁྱོན་ལ་སྙན་པས་ལུས་ཅན་ཀུན་ཀྱང་ཁྱེད་རྗེས་ཕྱོགས།། རྣམ་དཀར་ཚོགས་ཟུང་ཉལ་འགྲོའི་གཏེར་ཆེན་ཡང་ཡང་བསྲུབས་ལས་ཉེར་འཁྲུངས་པའི།། རྨད་བྱུང་མཛེས་སྐུ་གསེར་གྱི་རི་ལྟར་ཡིད་འོང་བརྗིད་ཆགས་ཟླ་གཞོན་ལས།། མཐའ་མེད་འགྲོ་ལ་ཕན་བདེའི་དཔྱིད་དུ་བདུད་རྩིའི་ཟེགས་མ་འབུམ་འགྱེད་པ།། སྲིད་པའི་གྲོང་ཁྱེར་སྐྱེད་མོའི་ཚལ་གནས་སྐལ་བཟང་ཀུ་མུད་བཞད་པའི་གསོས།། མ་ལུས་སྲས་བཅས་རྒྱལ་བ་ཡོངས་ཀྱི་ཡོན་ཏན་མི་ཟད་བྱེ་བའི་གཏེར།། ཁྱེད་སྐུའི་ཆ་ཤས་བ་སྤུའི་འཁྲི་ཤིང་ཕྲན་བུ་རེར་ཡང་མངོན་རྫོགས་པའི།། མཚན་དཔེའི་རྩེ་དགའ་ཕྱོགས་དང་དུས་ཀྱི་རྗེས་སུ་འགྲོ་བའི་ཉིན་བྱེད་ཀྱིས།། བློ་གྲོས་སྣང་བའི་པད་ཚལ་རྒྱས་མཛད་ལེགས་བཤད་ཟེར་ཕྲེང་འབུམ་དུ་སྤྲོ།། སུམ་ཅུ་རྩ་གཉིས་མཚན་མཆོག་བཟང་པོའི་གསེར་མདོག་པད་མའི་འདབ་བརྒྱ་བཞད།། བརྒྱད་ཅུའི་གྲངས་ལྡན་དཔེ་བྱད་བཟང་པོའི་མཛེས་ལྡན་ཟེ་འབྲུའི་འོད་མདངས་འཚེར།། བཅུ་གསུམ་ཆས་གོས་རྒྱན་ཆ་བཟང་པོའི་ཡལ་འདབ་ལོ་མ་སྡུག་གུར་བཀྲ།། གནག་སྣུམ་དབུ་སྐྲའི་ཐོར་ཅོག་བཟང་པོའི་འབྲས་བཟང་སྙེ་མའི་ལང་ཚོ་དུད།། དམར་སེར་ཚོན་གྱིས་བྱུག་པ་མ་ཡིན་མཚམས་སྤྲིན་གསར་བའི་གཟི་བྱིན་འབར།། དྭངས་གསལ་རྫིང་བུར་བཀྲུས་པ་མ་ཡིན་སྟོན་མཚན་ཟླ་ལྟར་མཆོག་ཏུ་མཛེས།། གདོས་བཅས་སྒྱུ་ལུས་ཟག་ཕུང་མ་ཡིན་ཡིད་འཕྲོག་ཟུང་འཇུག་ཡེ་ཤེས་སྐུ།། འདུ་བྱེད་ཆོས་ཀྱིས་གོས་པ་མ་ཡིན་བགྲེས་རྒུད་དང་བྲལ་གཞོན་ནུའི་ཚུལ།། མཛེས་པའི་མདངས་ལྡན་མེ་ཏོག་བྱེ་བའི་ཆུན་འཕྱང་འཛིན་པའི་ཐོར་ཙུགས་རྩེར།། ཡིད་འོང་བརྗིད་ལྡན་ནོར་བུ་དུ་མས་མཛེས་པའི་རྒྱན་ ཕྲེང་འབུམ་བྱིན་པ།། མཐིང་མདོག་རལ་བའི་སྐྲ་ཞགས་ཆུན་པོའི་ཟུར་ཕུད་ལྔ་ཕྲག་སྤྱི་བོ་རུ།། རྣམ་ལྔའི་ཁ་དོག་རྒྱན་དུ་འཆང་བའི་དར་ཚོན་ལེགས་པས་མཛེས་པར་བཅིངས།། དག་གསལ་མཛེས་པའི་ཡེ་ཤེས་སྐུ་ཁྱོད་ལྟ་བས་ནམ་ཡང་ངོམས་མི་ཤེས།། དག་ཆེན་ཡེ་ཤེས་སྒྱུ་མའི་སྣང་བརྙན་མཐོང་བས་མཚན་རྟོག་ངང་གིས་ཞི།། དག་པའི་སར་བཞུགས་རྒྱལ་སྲས་ཐུ་བོར་ཡོན་ཏན་རྒྱ་མཚོའི་རྒྱན་སྤུད་ཅིང་།། དག་དང་མ་དག་སྣ་ཚོགས་གཟུགས་ཀྱིས་རྣམ་མང་འགྲོ་ལ་རྟག་པར་སྨན།། མཉེན་ལྕུག་འཁྲིལ་ལྡེམ་ཉམས་བརྒྱས་སྒེག་པའི་ཤིན་ཏུ་ཡིད་འོང་གཞོན་ནུའི་སྐུར།། མཚམས་སྤྲིན་གསར་བའི་བཀྲག་མདངས་འབུམ་གྱིས་ཉེ་བར་འཁྱུད་པའི་ལང་ཚོ་ཡིས།། ཉིན་བྱེད་སྟོང་གི་གཟི་འོད་ཀུན་ཀྱང་མོག་པོར་བྱེད་པའི་མདངས་འབར་ཞིང་།། སྲིད་ཞིའི་མཛེས་སྡུག་མ་ལུས་རྫོགས་ཁྱོད་དཔའ་ཆེན་ཡོངས་ཀྱི་རྩེ་མོར་བསྔགས།། ཀུན་ནས་མཛེས་པའི་རིན་ཆེན་སིལ་ཁྲོལ་ནོར་བུའི་དོ་ཤལ་རྒྱན་གྱིས་ཀླུབ།། ཡིད་འོང་མདངས་ལྡན་འོད་ཕྲེང་སྟོང་གིས་ཇི་སྙེད་རྒྱལ་བའི་ཞིང་ཀུན་མཛེས།། འཆར་ཁའི་ཉི་གཞོན་བྱེ་བའི་དཔལ་འཆང་ངོ་མཚར་འབུམ་ལྡན་གཞོན་ནུའི་གཟུགས།། མཛེས་ལྡན་ཡོངས་ཀྱི་ཕུལ་དུ་སོན་གང་འགྲོ་ཀུན་མིག་གི་དཔྱིད་དུ་ཆེ།། མ་རུངས་འཆིང་བྱེད་དུག་ལྔའི་རང་གཟུགས་འཁྲུལ་སྣང་འཁོར་བའི་མུན་སྟུག་ངོར།། མི་བཟད་བདུད་སྡེའི་དཔུང་ཚོགས་དང་བཅས་ངར་འཛིན་རཱུ་ཏྲའི་ས་འཛིན་དབང་།། གཉིས་མེད་ལྟ་བའི་མེ་ཆར་ཟེགས་ལྡན་སྔོ་བསངས་རལ་གྲིའི་འཕྲུལ་ཐབས་ཀྱིས།། མིང་མེད་རྩད་ནས་བརླག་པར་མཛད་ཕྱིར་ཤེས་རབ་མཚོན་གྱི་འཁྲི་ཤིང་གཡོ།། ལུས་ཅན་སྐྱེ་འགྲོའི་རེ་འདོད་མཐའ་དག་ཡིད་བཞིན་ཡོངས་སུ་སྐོང་བྱེད་ཅིང་།། རིན་ཐང་བྲལ་བའི་ཟབ་རྒྱས་ཆོས་ཚུལ་གནོད་སྦྱིན་མཛོད་ཀྱི་དཔལ་འཆང་བའི།། ལེགས་བཤད་ཟེར་བརྒྱས་བློ་གྲོས་སྣང་བའི་སྒོ་འཕར་ཕྱེ་བའི་བརྡ་རྟགས་སུ།། མཛེས་སྡུག་ཡིད་འོང་ཨུཏྤལ་གཞོན་ནུ་འདབ་མ་སྟོང་ལྡན་ཕྱག་ན་བསྣམས།། ཇི་སྙེད་ཞིང་བཞུགས་མ་ལུས་རྒྱལ་བའི་གསུང་རབ་རབ་འབྱམས་དཔག་ཡས་པ།། ཤེས་རབ་འཁོར་ལོའི་ཐུགས་ཀྱི་རྒྱན་དུ་ཡོངས་སུ་འཆང་བའི་མཚོན་དོན་དུ།། པདྨའི་འདབ་སྟེང་གླེགས་བམ་གྱིས་མཛེས་མཁས་བླུན་བར་མའི་འགྲོ་རྣམས་ཀྱིས།། འདྲི་བ་ཀུན་ལ་ཆགས་ཐོགས་དང་བྲལ་ཐེ་ཚོམ་ཡིད་ཀྱི་དྲྭ་རྒྱ་གཅོད།། གཞུང་ལུགས་འཆད་པའི་ང༷ག་གི་དབང་ཕྱུག་ང༷ག་རྣམས་བྱེ་བའི་འབྱུང་གནས་ཏེ།། སྟོང་ཉིད་རྟེན་འབྱུང་དབྱེར་མེད་སྨྲ༷་བས་རྟག་ཆད་སྨྲ༷་བའི་སྤོབས་པ་ཕྲོགས།། ཤེས་བྱའི་ཆོས་ཚུལ་གསལ་བར་སྟོན༷་པས་ཡོངས་རྫོགས་སྟོན༷་ པའི་ཁྱུ་ཡི་མཆོག།། ཡན་ལག་དྲུག་ཅུའི་ཚང༷ས་པའི་དབྱངས་ལྡན་ཚང༷ས་པ་ལས་ཀྱང་ཁྱད་དུ་འཕགས།། མཐར་འཛིན་ལྟ་བའི་རི་རབ་ལྷུན་མཐོ་མཐའ་བྲལ་མེ་ཆར་ཟེགས་མས་བསྙིལ།། ཕྱི་ནང་ལོག་སྨྲའི་ཝ་སྐྱེས་ཚོགས་ཀུན་སྟོང་ཉིད་སེང་གེའི་ང་རོས་འཇོམས།། མ་རུངས་དུག་ལྔའི་ཚང་ཚིང་སྟུག་པོ་ལྷག་མཐོང་ལྟ་བའི་མེ་ལྕེས་བསྲེགས།། རྣམ་མང་བདུད་དང་མཐའ་དམག་དཔུང་ཚོགས་མཐུ་དང་ནུས་པའི་རྩལ་གྱིས་བཏུལ།། ཁྱེད་གསུང་ལེགས་བཤད་དབྱར་སྐྱེས་རྔ་གསེང་རིས་མེད་གདུལ་བྱ་མདོངས་མཐའ་མོའི།། སྒྲ་འཛིན་དབང་པོར་ཡུད་ཙམ་སོན་ཀྱང་འཆིང་བྱེད་དུག་ལྔའི་ཟུག་རྔུ་ཀུན།། གཏན་དུ་གཞིལ་ནས་ངོམ་མེད་དགའ་བདེའི་སྣང་བ་འབུམ་ཕྲག་མང་སྟེར་བའི།། སྙན་འཇེབས་ཆོས་ཀྱི་སྒྲ་དབྱངས་སྟོང་གི་རོལ་མོ་འཁྲོལ་ལ་འགྲན་ཟླས་དབེན།། འབད་རྩོལ་ཀུན་རྟོག་རི་མོ་དང་བྲལ་བྲག་ཆའི་དབྱངས་ལྡན་ཆོས་ཀྱི་གཏམ།། སྣ་ཚོགས་འགྲོ་བའི་ཁམས་དབང་མོས་པའི་བྱེ་བྲག་དང་འཚམས་རིམ་དགུའི་ཆོས།། ཐོག་མ་བར་དང་ཐ་མར་དགེ་གྱུར་གསུང་བཟང་བདུད་རྩིའི་སྣང་བ་ཡིས།། རབ་འབྱམས་ཞིང་གི་མུ་མེད་འགྲོ་རྣམས་གཏན་བདེའི་ས་ལ་དབུགས་དབྱུང་མཛད།། དབུལ་ཞིང་ཕོངས་པའི་ཆོས་ནོར་དོན་གཉེར་སློང་མོའི་བུང་བ་བྱེ་བ་ཕྲག།། དཔའ་ཆེན་ཁྱེད་ཀྱི་མཚན་སྙན་གྲགས་པའི་དྲི་བསུང་ཞིམ་པོས་ཉེར་བཀུག་སྟེ།། ལེགས་བཤད་གཞུང་དང་ཟང་ཟིང་ནོར་གྱི་གཏོང་བ་དམ་པའི་སྦྲང་རྩི་ཡིས།། ངོམས་ཤིང་ཚིམ་མཛད་འཇམ་པའི་དཔལ་གྱིས་འགྲོ་རྣམས་ཕན་བདེའི་དཔལ་ལ་བཀོད།། སྣང་ཞིང་སྲིད་པའི་ཤེས་བྱ་མཐའ་དག་འཇིག་རྟེན་ཐ་སྙད་ཙམ་གྱི་ངོར།། རྣམ་མང་རྒྱུ་རྐྱེན་རྟེན་འབྱུང་ཚུལ་ཅན་སྒྱུ་མ་ལྟ་བུའི་རྣམ་རོལ་ཀུན།། མཁྱེན་པའི་སྤྱན་གྱིས་སྐད་ཅིག་གཅིག་ལ་ཆགས་ཐོགས་སྒྲིབ་མེད་གསལ་གཟིགས་ནས།། བསྐལ་དང་སྐད་ཅིག་མཉམ་པར་སྟོན་པའི་རྫུ་འཕྲུལ་མཆོག་ལས་སྙེལ་བ་མེད།། ཤེས་དང་ཤེས་བྱའི་མཚན་མ་ཉེར་ཞི་ཚུལ་མཐོང་ཡུལ་ལས་རབ་འདས་ཤིང་།། ཆོས་དང་ཆོས་ཉིད་མཉམ་པར་སྣང་བའི་ཟབ་གསལ་གནས་ལུགས་དེ་བཞིན་ཉིད།། ཡུལ་དང་ཡུལ་ཅན་དབྱེར་མི་ཕྱེད་པའི་ཡེ་ཤེས་ཟབ་མོས་མངོན་གཟིགས་ནས།། སྲིད་དང་ཞི་བ་མཉམ་པར་གཟིགས་པའི་ལྟ་བའི་དབྱིངས་ལས་གཡོ་བ་མེད།། ཇི་ལྟ་ཇི་ལྟར་གནས་ལུགས་མཐའ་བྲལ་ཆོས་དབྱིངས་ཤིན་ཏུ་རྒྱ་ཆེ་བ།། དེ་ལྟ་དེ་ལྟར་ཟུར་ཕུད་ལྔ་པའི་མཁྱེན་རབ་ཡེ་ཤེས་ཡོངས་སུ་རྒྱས།། ཇི་ལྟ་ཇི་ལྟར་མཐའ་ཡས་འགྲོ་རྣམས་བཟོད་མེད་དུཿཁས་ཆེར་མནར་བ།། དེ་ལྟ་དེ་ལྟར་སེམས་དཔའ་མཆོག་གི་ཚད་མེད་སྙིང་རྗེའི་གོ་ཆ་བརྟན།། མི་ཟད་ཡོན་ཏན་བྱེ་བ་རྒྱ་མཚོའི་ཕ་མཐར་ཡང་དག་སྔོན་ནས་སོན།། མི་ཤེས་རྨོངས་པའི་ཉོན་མོངས་བྱེ་བ་མཉམ་ཉིད་ལྟ་བས་དྲུང་ནས་ཕྱུང་།། མི་བརྗེད་གཟུངས་ཀྱིས་མཁའ་ཁྱབ་ཞིང་གི་ཆོས་རྣམས་མ་ལུས་རབ་ཏུ་བཟུང་།། མི་འཇིགས་སྤོབས་པའི་གཏེར་ལ་དབང་འབྱོར་རབ་འབྱམས་ཆོས་ཚུལ་ཐོགས་མེད་སྨྲ།། རྣམ་ཀུན་འགྲོ་ལ་བྱམས་དང་བརྩེ་བའི་རྩ་བ་བཟང་པོ་རབ་ཏུ་བརྟན།། ཕུལ་བྱུང་ཐབས་མཁས་བྱང་ཆེན་སྤྱོད་པའི་ཡལ་འདབ་ལོ་མ་སྡུག་གུར་བཀྲ།། ཟབ་གསལ་དབྱིངས་ཀྱི་དེ་ཉིད་གཟིགས་པའི་མཁྱེན་ཟུང་ཡེ་ཤེས་ཡོངས་འདུའི་ལྗོན།། བྲལ་སྨིན་ཡོན་ཏན་བྱེ་བ་རྒྱ་མཚོའི་འབྲས་བཟང་ལང་ཚོ་གཡུར་དུ་ལྡེམ།། རྣམ་ལྔའི་ཡེ་ཤེས་མཁའ་ལྟར་ཡངས་པས་དུས་གསུམ་ཆོས་ལ་གཟིགས་པ་འཇུག།། དམིགས་མེད་སྙིང་རྗེ་མཚོ་ལྟར་ཟབ་པས་མཐའ་མེད་འགྲོ་རྣམས་ཐུགས་བརྩེས་འཁྱུད།། མཐུ་སྟོབས་ནུས་པ་གློག་ལྟར་མྱུར་བས་ངན་སོང་གཡང་ལས་འགྲོ་ཀུན་འདྲེན།། དགོས་འདོད་གསེར་ཤིང་ལྗོན་ལྟར་སྩོལ་བས་རྟག་ཁྱབ་ཕྲིན་ལས་ལྷུན་གྱིས་གྲུབ།། སྟོབས་བཅུ་མངའ་བའི་སྲས་ཀྱི་ཐུ་བོ་འཕགས་ཆེན་འཇམ་པའི་དཔལ་ཞེས་པའི།། མཚན་མཆོག་ལན་གཅིག་རྣ་བར་སོན་པས་སྲིད་དང་ཞི་བའི་ཁྱོན་འདི་ཡི།། ཉེས་ཚོགས་རྒུད་པའི་འཁྲུལ་སྣང་ཀུན་དང་ཉོན་མོངས་མ་ལུས་མཐར་བྱེད་ཅིང་།། དགེ་མཚན་བྱེ་བའི་དཔལ་ཡོན་ཀུན་སྩོལ་ཡང་དག་ཡེ་ཤེས་སྣང་བ་སྟེར།། སྤྲོས་པའི་ཀུན་རྟོག་དབྱིངས་སུ་ནུབ་ཀྱང་མཐའ་ཡས་འགྲོ་ལ་དགོས་འདོད་བསྩལ།། སྒྲ་ཚིག་བརྗོད་པ་ཀུན་དང་བྲལ་ཡང་ཡན་ལག་དྲུག་ཅུའི་རྒྱལ་རྔ་བརྡུངས།། གཟུང་འཛིན་མཚན་མས་རིང་དུ་དབེན་ཡང་ཤེས་བྱའི་ཆོས་ཚུལ་མངོན་པར་གསལ།། སྲས་བཅས་རྒྱལ་བའི་ཡབ་ཏུ་གྱུར་ཀྱང་རྒྱལ་སྲས་དཔའ་ཆེན་གཞོན་ནུའི་ཚུལ།། ཚད་མེད་སྙིང་སྟོབས་གོ་ཆ་བརྟན་པོ་ཐུགས་ཀྱི་རྒྱན་དུ་ལེགས་འཆང་ནས།། རྨད་བྱུང་ཐབས་མཁས་འཕྲུལ་དང་འགྲོགས་པའི་འཕགས་ཆེན་སྤྱོད་ཕྱོགས་རྒྱ་མཚོ་ཡི།། མཁའ་ཁྱབ་ཞིང་གི་གདུལ་བྱའི་མོས་ངོར་རྟག་ཁྱབ་ལྷུན་གྲུབ་མཛད་རྗེས་མཆོག།། རྒྱལ་ཀུན་ཕྲིན་ལས་གཅིག་ཏུ་བསྡུས་ཀྱང་ཁྱེད་ཀྱི་མཛད་པར་འགྲན་མ་ལགས།། སྨྲ་བའི་སེང་གེའི་མཚན་སྙན་རབ་གྲགས་གྲགས་པའི་བ་དན་མཁའ་ལས་བརྒལ།། མཁྱེན་རབ་ཡེ་ཤེས་འོད་སྟོང་ལྡན་ཞིང་ཞིང་ཁམས་བྱེ་བའི་མུན་པ་བསལ།། བརྒྱད་ཁྲི་བཞི་སྟོང་ཉོན་མོངས་ལས་རྒྱལ་རྒྱལ་བའི་གོ་འཕང་མཆོག་ཏུ་བརྙེས།། མུ་མེད་ཞིང་གི་རྒྱལ་བས་རབ་བསྔགས་བསྔགས་འོས་ཡོངས་ཀྱི་ཕུལ་དུ་སོན།། སྲིད་ཞིའི་ཁྱོན་ན་ཇི་སྙེད་དགེ་མཚན་ཁྱེད་སྐུའི་དཔལ་དུ་ལེགས་འཆང་ཞིང་།། མཚན་སྙན་གྲགས་དཀར་ཕྱོགས་སུ་སྙན་པས་ས་གསུམ་གཡོ་ཞིང་འདར་བར་བྱས།། སུམ་རྩེན་གྲོང་གི་གསེར་མངར་ཅན་དང་ནབས་སོ་སྐྱེས་སོགས་ཆེ་རྒུས་ཀྱང་།། ཁྱོད་ཞབས་རལ་བའི་རྒྱན་དུ་བསྙེན་ལ་རྣམ་མང་འབད་པས་ལུས་སེམས་བྲེལ།། ཨེ་མ་ཞིང་འདིའི་དྲེགས་ལྡན་ཡོངས་ཀྱི་མཐོན་མཐིང་རལ་བའི་ཅོད་པན་རྩེར།། རྩིབས་སྟོང་འཁོར་ལོའི་རེ་ཁཱས་མཚན་པའི་ཞབས་ཟུང་ཆུ་སྐྱེས་གསར་བའི་རྡུལ།། ཉེ་བར་བཀོད་པའི་གཟི་བྱིན་སྟོང་གི་ཕན་བདེ་སྣང་བའི་མུ་ཁྱུད་ཀྱིས།། སྲིད་ཞིའི་ཁོར་ཡུག་ཟླུམ་པོར་འཁྱུད་ཅིང་ཞི་བསིལ་ཐར་བའི་སྒོ་འཕར་ཕྱེས།། མགོན་ཁྱོད་བསམ་འཕེལ་ནོར་བུ་མཆོག་དང་བུམ་བཟང་ཡོངས་འདུའི་ལྗོན་བཟང་བཞིན།། སྐྱེ་རྒུའི་ཡིད་ཀྱི་གདུང་བ་ཀུན་སེལ་རེ་བའི་འདོད་དོན་གང་སྨོན་ཡང་།། གེགས་མེད་བདེ་མྱུར་འགྲུབ་པར་མཛད་པའི་བདེན་གཏམ་རྣ་བར་སོན་མ་ཐག།། རབ་དགའི་འོ་མཚོ་རླབས་ཕྲེང་འཕྱུར་ཞིང་ལུས་སྐྱེས་འཁྲི་ཤིང་དབང་མེད་གཡོས།། དེ་ལྟའི་ཚད་མེད་གསང་གསུམ་ཡོན་ཏན་ཡང་ཡང་ཡིད་ལ་རབ་བྱས་ཏེ།། དད་གསུམ་ཆུ་འཛིན་ཡིད་མཁར་བསྐྲུན་ཅིང་བསྔགས་ཚིག་ཕྲེང་བའི་སྤྲིན་གྱི་སྒྲས།། འགྲོ་ཀུན་གྱིས་བགྱིས་ཐོག་མེད་སྡིག་ལྟུང་ལྷག་མེད་དག་པའི་མཐུན་འགྱུར་བཅས།། གཟུངས་སྤོབས་བློ་ཡི་སྒོ་འཕར་ཕྱེས་ཤིང་མཁྱེན་ཟུང་ཡེ་ཤེས་སྣང་བ་སྩོལ།། ཞེས་རབ་རྒྱན་ས་ཡོས་ཟླ་ཚེས་དགེ་བ་ལ་བྲིས་པ་འདིས་ཀྱང་ཚེ་རབས་ཀུན་ཏུ་ལྷ་མཆོག་ཟུར་ཕུད་ལྔ་པས་རྗེས་སུ་འཛིན་ཅིང་བྱིན་རླབས་ཡེ་ཤེས་ཀྱི་སྣང་བ་དང་འབྲལ་བ་མེད་པའི་རྒྱུར་གྱུར་ཅིག། |
Subscribe to:
Post Comments (Atom)
0 comments:
Post a Comment