Saturday, 27 October 2012
10:35 | 
Posted by
༄༅།། ཨེ་མ་ཧོའི་རིག་མཛོད་། |
༄༅། །འཛམ་གླིང་གེ་སར་རྒྱལ་པོའི་བསངས་གསོལ་ཀུན་བཟང་མཆོད་སྤྲིན།
།
ཨེ་མ་ཧོ། །
ཀ་དག་རིག་པའི་ངོ་བོ་ཀུན་བཟང་ལས། །
ཁ་བའི་སྒྱུ་འཕྲུལ་རང་བཞིན་དཀྱིལ་འཁོར་དུ། །
ག་བུར་མདངས་བཞིན་ཐུགས་རྗེའི་རོལ་གར་ཉིད། །
ང་ཡི་སྐྱབས་གཅིག་སེང་ཆེན་རྒྱལ་པོ་གསལ། །
ཅ་ཅོའི་ཚིག་ཙམ་མིན་པར་བསྙེན་སྔགས་བཟླ། །
ཆ་ལུགས་ཀུན་འཛོམས་ཕྱག་མཆོད་སྤྲིན་ཆེན་པོས། །
ཇ་ཆང་འདོད་དགུར་དངོས་འབྱོར་ཡིད་སྤྲུལ་འབུལ། །
ཉ་རྒྱས་ཟླ་ལྟར་མཆོག་ཐུན་དངོས་གྲུབ་སྩོལ། །
ཏ་ཐྰ་ག་ཏའི་བསྟན་པ་རིན་པོ་ཆེ། །
ཐ་དག་འཛིན་སྐྱོང་སྤེལ་ནུས་གཟི་བྱིན་ཕོབས། །
ད་ལྟའི་སྙིགས་ལྔའི་འགྲོ་བ་མ་ལུས་པའི། །
ན་རཀ་སྡུག་བསྔལ་དོང་ནས་སྤྲུགས་པར་མཛོད། །
པ་ར་མི་ཏའི་བྱང་ཆུབ་སྤྱོད་པ་དང་། །
ཕ་མའི་རྒྱུད་སྡེའི་བསྐྱེད་རྫོགས་སྒོམ་པ་ལ། །
བར་ཆད་མི་འཐུན་འགལ་རྐྱེན་ཀུན་སེལ་ནས། །
མ་ལུས་འགྲོ་ཁམས་འདྲེན་པའི་དཔལ་སྩོལ་ཅིག།
ཙྭ་རི་སྦས་ཡུལ་ཞིང་ཁམས་གང་བཞུགས་ཀྱང་། །
ཚ་གྲང་མནར་བའི་འགྲོ་ལ་མྱུར་དགོངས་ཏེ། །
ཛ་དྲག་དམ་ཅན་རྒྱ་མཚོར་རང་བསྐུལ་བས། །
ཝ་ལེར་རྟགས་དང་མཚན་མ་མངོན་སུམ་སྟོན། །
ཞྭ་དཀར་བསྟན་པའི་བདག་པོ་གེ་སར་རྗེས། །
ཟ་བེར་སྐུ་ཆས་འཁོར་གསུམ་གོ་བགོས་པའི། །
འ་ཅག་ཚེ་གཅིག་སྒྲུབ་པའི་བདེན་བྱིན་མཆོག །
ཡ་མཚན་བསླུ་མེད་བཅོལ་བའི་ཕྲིན་ལས་མཛོད། །
ར་བ་གངས་དཀར་ཞིང་དུ་དཔའ་རྫོང་བཅོས། །
ལ་ལུང་བསྟན་སྲིད་སྐྱོང་བའི་དཔའ་རྟུལ་རིགས། །
ཤ་ཞེན་སྲིད་པའི་གཡང་ཀུན་མྱུར་སྐྱོབ་ནས། །
ས་བཅུ་ལམ་ལྔའི་ཡོན་ཏན་མཐར་ཕྱིན་མཛོད། །
ཧ་ཅང་མི་ཕྱེད་དད་པས་རབ་བསྐུལ་བས། །
ཨ་ཏིའི་ཟབ་དོན་རྒྱ་མཚོའི་སྙིང་ཐིག་གི། །
གཟུངས་སྤོབས་རིག་པའི་གཏེར་ལ་དབང་འབྱོར་བས། །
དོན་གཉིས་ཡིད་བཞིན་འགྲུབ་པའི་དངོས་གྲུབ་སྩོལ། །
ཨོཾ་གུ་རུ་མ་ཎི་ར་ཛ་སིདྡྷི་ཧྰུྃ།
ཞེས་ཅི་ནུས་སུ་སྲོག་སྡོམ་གཟེར་བཞི་ལྡན་པའི་ངང་ནས་བཟླས། དབྱངས་གསལ་རྟེན་སྙིང་ཡིག་བརྒྱས་མཐར།
ཨེ་མ་ཧོ། །
ཀ་དག་རྒྱལ་ཀུན་སྤྱི་གཟུགས་པདྨ་འབྱུང་། །
ཁ་བའི་བསྟན་སྲུང་འཛམ་གླིང་སེང་ཆེན་རྒྱལ། །
ག་བུར་བཞིན་ལྟར་མཛེས་པའི་དཔའ་བོའི་སྐུ། །
ང་ཡི་རྩ་གསུམ་ཀུན་འདུས་ཁྱེད་ལ་བསྟོད། །
ཀྱེ་ཀྱེ།
རབ་འབྱམས་རྒྱལ་ཀུན་གསང་གསུམ་ཡེ་ཤེས་ཀྱི། །
རིགས་ཀུན་ཁྱབ་བདག་འཛམ་གླིང་སེང་ཆེན་དང་། །
གླིང་དཀར་དཔའ་རྟུལ་དྭངས་སྨན་ཚོགས་རྣམས་ལ། །
གསོལ་ལོ་མཆོད་དོ་བཅོལ་བའི་ཕྲིན་ལས་མཛོད། །
ཨོཾ་ཨྰཿཧྰུྃ་ཧྲྰིཿཧོ།
ཞེས་ཅི་ནུས་བསགས་ཞིག་བསང་གསོལ་གཏོར་མཆོད་སོགས་འབུལ་ནས།
སྨོན་ལམ་ནི།
ཨེ་མ་ཧོ། །
རིན་ཆེན་བྱང་ཆུབ་སེམས་མཆོག་རྒྱུད་ལ་སྐྱེས། །
བདེ་ཆེན་ཕྱག་རྒྱ་མཆོག་གི་དངོས་གྲུབ་ཐོབ། །
རྫོགས་ཆེན་རིག་འཛིན་རྣམ་བཞི་མཐར་ཕྱིན་ནས། །
སངས་རྒྱས་ཡེ་ཤེས་འགྲུབ་པར་བྱིན་གྱིས་རློབས། །
ཞེས་པ་འདི་ཡང་རབ་རྒྱན་ཆུ་འབྲུག་སྨྲིན་ཟླའི་གཟའ་ཚེས་དགའ་བར་འཛམ་གླིང་གེ་སར་རྒྱལ་པོ་ལ་མི་ཕྱེད་པའི་དད་གུས་ཅན་སྐུ་ཚེ་གང་བོར་འཛམ་གླིང་གེ་སར་རྒྱལ་པོ་ཁོ་ན་སྒྲུབ་པར་མཛད་པའི་སློབ་བུ་བླ་མ་དམིགས་བརྩེས་ཡང་ཡང་བསྐུལ་བའི་རྐྱེན་ལས་དག་སྣང་གསང་བའི་ཆོས་སྡེ་ལས་བིརྱ་དྷྰ་ར་ཤྲྰི་ཨ་ནནྟ་བཛྲས་ཕབས་པ་དགེའོ།
།
Subscribe to:
Post Comments (Atom)
0 comments:
Post a Comment