Monday, 15 July 2013
01:31 | 
Posted by
༄༅།། ཨེ་མ་ཧོའི་རིག་མཛོད་། |
དེ་རིང་ནི་༧ཀུན་མཁྱེན་བླ་མ་ཚུལ་ཁྲིམས་བློ་གྲོས་མཆོག་དགུང་གྲངས་༥༢ལ་ཕེབས་པའི་སྐུའི་འཁྲུངས་སྐར་གྱི་ཉིན་མོ་ཡིན་པས། རང་དང་གཞན་གྱི་གྲུབ་མཐའ་རྒྱ་མཚོའི་ཕ་རོལ་དུ་སོན་ཅིང་། ཐུན་མོང་དང་ཐུན་མོང་མ་ཡིན་པའི་རིག་པའི་གནས་ཀུན་ལ་རང་སྤྱན་ཆུབ་པའི་མ་ཧཱ་པཎ་ཊི་ཏ་ཆེན་པོ། གངས་ཅན་མིག་གཅིག་ལྷ་མཆོག་ཕྱག་ན་པདྨོའི་ཕྲིན་ལས་ཀྱི་ཁ་ལོ་བ། མགོན་མེད་པའི་སེམས་ཅན་བྱེ་བ་དུང་ཕྱུར་དུ་མ་ཚེ་སྲོག་གི་འཇིགས་པ་ལས་བསྐྱབས་ཏེ་ཐར་བའི་ས་བོན་བསྐྲུན་པའི་སྨོན་ལམ་གྲུབ་པའི་རྒྱལ་སྲས་སེམས་དཔའ་ཆེན་པོ། འཆི་ལ་ཉེ་བའི་ཆོས་སྲིད་ལུགས་གཉིས་ཀྱི་རྩ་བ་ཡུལ་གངས་ཅན་པའི་སྐད་ཡིག་ལ་སྲོག་གི་ལྷག་མ་སྦྱིན་པའི་དོན་དམ་གྱི་སློབ་དཔོན་འགྲན་ཟླ་དང་བྲལ་བ། ནང་དམེ་དང་འཁྲུགས་རྩོད་ཀྱི་སྲོལ་ངན་ཞི་བདེའི་ལམ་དུ་བསྒྱུར་བའི་ཞི་བདེའི་དེད་དཔོན་ཆེན་པོ། ཟླ་བྲལ་ལུང་རིགས་སྨྲ་བའི་སློབ་བུ་སྡེ་སྣོད་འཛིན་པ་ཁྲི་ཕྲག་མང་པོ་སྐྱེད་བསྲིང་གནང་མཁན་གྱི་ཁ་བ་རི་བའི་སྔོན་མེད་ཀྱི་དགེ་རྒན་ཆེན་མོ། གླིང་ཆེན་ཨེ་ཤ་ཡའི་སྐལ་ལྡན་གྱི་སྐྱེ་བོས་གཙོས་གདུལ་བྱ་མཐའ་ཡས་པ་ཐར་བའི་ལམ་དུ་གཟུད་པའི་ངེས་དོན་གྱི་བཤེས་གཉེན་དམ་པ། གངས་ཅན་པའི་སྐྱེ་འགྲོ་རྣམས་རྨོངས་པའི་གཉིད་ལས་སློང་བའི་རྫུ་འཕྲུལ་གྱི་ལྷའི་རྔ་བོ་ཆེའི་སྒྲ་དབྱངས། རེ་ལྟོས་བྲལ་བའི་རང་རིགས་ཀྱི་བྱིས་པ་ཁྲི་སྟོང་དུ་མ་ཤེས་རིག་གི་ལམ་དུ་སྐྱེལ་བའི་མི་ཡི་རྫི་བོ་ཆེན་པོ། མཚན་སྙན་འཛམ་བུའི་གླིང་དུ་ཁྱབ་པའི་ས་སྟེང་གི་ཟླ་བྲལ་གྱི་ཉི་མ་འོད་ཟེར་བྱེ་བ་འབུམ་ལྡན། ཉིན་མཚན་བར་མེད་དུ་བསྟན་འགྲོའི་དོན་ལ་རྩེ་གཅིག་ཏུ་གཞོལ་བའི་གངས་རིའི་ཁྲོད་ཀྱི་སྤྱན་རས་གཟིགས་གཉིས་པ། དཔལ་ཨོ་རྒྱལ་གྱི་སློབ་དཔོན་ཆེན་པོ་པདྨ་འབྱུང་གནས་དང་ཞལ་མི་གཉིས་པ་ཆོས་རྗེ་ཡིད་བཞིན་ནོར་བུ་འཇིགས་མེད་ཕུན་ཚོགས་འབྱུང་གནས་ཀྱི་ནང་ཐུགས་ཀྱི་སྲས་མཆོག་ཀུན་གྱི་ཡང་རྩེ། བདག་ཅག་གི་འདྲེན་པ་ཆེན་པོ་དོན་གྱི་སླད་དུ་མཚན་ནས་སྨྲོས་ན་༧ཀུན་མཁྱེན་བླ་མ་ཚུལ་ཁྲིམས་བློ་གྲོས་མཆོག་གི་སྐུའི་འཁྲུངས་སྐར་ལ། གསུངས་ལས་སྐྱེས་པའི་སློབ་བུ་སྣ་ཚོགས་གཟུགས་ཅན་གྱིས་མ་ལྔ་ས་ལ་གཏུགས་པའི་ལྷ་ཕྱག་དང་བཅས་བཀྲ་ཤིས་བདེ་ལེགས་དང་། སྐུ་ཚེ་ཡུན་དུ་བརྟན་ཅིང་ཐུགས་བཞེད་ཐམས་ཅད་གེགས་མེད་ཡིད་བཞིན་དུ་འགྲུབ་པའི་སྨོན་འདུན་གྲངས་མེད་ཞུ་ཞུ་ཞུ།
Subscribe to:
Post Comments (Atom)
0 comments:
Post a Comment