Saturday 4 January 2014
22:12 | 
Posted by
༄༅།། ཨེ་མ་ཧོའི་རིག་མཛོད་། |
༄༅།།རྨི་ལམ་དང་ཚོར་སྣང་། །
ན་མོ་གུ་རུ་བྷྱ།།
རྨི་ལམ་རྣམ་དག་འོད་གསལ་སྒྱུ་འཕྲུལ་གར། །
སྣང་སྲིད་རྣམ་དག་ལྷ་ཡི་དཀྱིལ་འཁོར་དང་། །
ལྷག་བསམ་རྣམ་དག་བྱང་སེམས་རིན་པོ་ཆེ། །
ངེས་དོན་རྣམ་དག་དགེ་བས་དུས་ཀུན་སྲུངས། །
༢༠༡༤ ཤིང་ཕོ་རྟ་ལོ་ལ་རྨིས་པའི་རྨི་ལམ།
མཐིང་མདོག་ཡིད་ཀྱི་རིག་མའི་ཕྱག་རྒྱས་ངོར། །
དབྱིངས་གསལ་དག་པའི་དྲི་བ་འདྲི་ལན་དག །
རྒྱས་པར་ཙིཏྟི་དབུས་གུ་ཧྱ་རྒྱ། །
མདོར་བསྡུས་ཁ་གསལ་གོ་བདེ་འདི་སྐད་ཐལ། །
ཨེ་ཀྱེ་ཧོ། །
ཉིས་སྟོང་བཅུ་བཞིས་རྟེན་འབྲེལ་མ་རལ་ན། །
བསོད་ནམས་རླུང་རྟའི་གོམས་ཁར་གཡས་སུ་ཕྱོགས། །
དགོས་འདོད་སྡེ་བཞིའི་སྣང་བ་ཀུན་ནས་བཀྲ། །
བདེ་ལེགས་ཤིས་པའི་ཕུན་སུམ་ཚོགས་པར་འབྱུང་། །
རྟེན་འབྲེལ་ཉེས་པའི་གཞན་དབང་གྱུར་པ་ན། །
ཆགས་སྡང་རྨོངས་པའི་མུན་པ་ཡོངས་སུ་འཁྲིགས། །
ནད་འཁྲུག་འབྱུང་བཞིས་གནོད་པ་བསམ་མི་ཁྱབ། །
ཆེ་དགུའི་སྲོག་ལུས་དབང་རླུང་ཐུར་ཏུ་རྒུད། །
ཞལ་འདོན་ཚིག་བདུན་གསོལ་འདེབས་རྒྱུན་དུ་འབད། །
གུ་རུ་སིདྡྷི་མ་ཎི་ཏྰ་རེ་རིགས། །
གནད་སྨིན་ཚད་དུ་ཕྱིན་ན་བར་ཆད་སེལ། །
ཡིད་ལ་སྨོན་པའི་འདོད་པ་ཡིད་བཞིན་འགྲུབ། །
མེ་འབར་ཕྲེང་བའི་རྒྱུན་ཐག་ངང་གིས་ཆད། །
གནམ་རྒན་བཙོན་ར་ལྕགས་རིར་གས་ཆག་བྱུང་། །
དྲང་བདེན་ཞི་བདེའི་འཚོ་བ་གསོན་པོ་དཔལ། །
རྒྱལ་བསྟན་དར་རྒྱས་འགྲོ་ཁམས་ཞི་བདེས་འཚོ། །
འཇིག་རྟེན་བདེ་བའི་ཆོས་དཔལ་རིག་རྩལ་རྒྱས། །
མྱང་འདས་ངེས་འབྱུང་རྣལ་མའི་བཙན་ས་ཟིན། །
སྙིང་རྗེ་བྱང་ཆུབ་སེམས་ལ་དབང་འབྱོར་ནས། །
གསང་ཆེན་དག་མཉམ་བདེན་པར་མངོན་གྱུར་ཤོག །
ཅེས་རྨི་ལམ་ཞིག་གིས་ཚོར་སྣང་ལས་ཨེ་ཝྃ་སྨན་ཁང་ནས་ཤྲྰིས་སྤེལ་བར་དགེའོ། །
Subscribe to:
Post Comments (Atom)
0 comments:
Post a Comment