༄༅།། ཨེ་མ་ཧོའི་རིག་མཛོད།

   རྒྱལ་སྲས་ཚང་།
    བདག་ནི་བན་དེ་ཕྱོགས་མི་འཛིན།།  
    བོན་པོ་ཕྱོགས་ལ་ལྡང་བ་མིན།། 
    གང་ཞིག་རིགས་པར་ལྡན་པའི་ཚིག ། 
    བཀུར་འོས་བཀུར་བ་དམ་པའི་རྟགས།།   
    
    བོན་དཀར་བཞག་ཅིང་བོན་ནག་བསྣུབས།། 
    བླ་མ་ཨོ་རྒྱན་པད་མས་མཛད།།   
    བན་ལ་བོན་འདྲེས་བོན་ལ་བན།།   
    འདྲེས་ཞེསཐུའུ་བཀྭན་ཉི་མས་གསུངས།།    
    
    བོན་ཀྱི་དཀར་པོའི་ལུགས་སྲོལ་དག།  
    ཚ་རྐོང་ནང་གི་ཚ་དཔར་བཞིན།།  
    ལྷ་ལ་གསོལ་ཅིང་འདྲེ་ཡང་འདུལ།།  
    བོད་པ་རྒན་པོའི་ཉམས་སུ་བླངས།། 
    
    གཤིན་རྩིས་བག་རྩིས་ལ་སོགས་པ།། 
    མི་ཕམ་འཇམ་དབྱངས་བོན་ནས་དྲངས།། 
    ལྷ་བསངས་བཏང་ནས་ལ་ཙེ་བསྟོད།། 
    བོད་པ་རྒན་པོའི་ཉམས་སུ་བླངས།།
    
    བོད་ཀྱི་བན་དེ་སད་མི་བདུན།། 
    དེ་ཡི་མཆོག་གྱུར་བེ་རོ་ཙ།།  
    བན་མིན་བོན་མིན་བླ་མ་ལ།། 
    ཕྱག་འཚལ་མཆོད་ཅིང་སྐྱབས་སུ་མཆི།།

    མདོ་སྒྱུ་སེམས་གསུམ་རྙིང་མའི་རྒྱུད།། 
    མདོ་ནི་དགོངས་པ་འདུས་པ་དང།།  
    སྒྱུ་འཕྲུལ་དྲ་བ་གསང་བ་སྙིང་།།   
    བྱང་སེམས་ཀུན་བྱེད་རྒྱལ་བོ་ཡིན།།  
    
    ཨ་རྫོགས་སྙན་གསུམ་བོན་པོའི་རྒྱུད།།      
    གྲུབ་ཐོབ་དགོངས་མཛོད་རི་ཁྲོད་པས།།  
    ཨ་ཁྲིད་ཐུན་མཚམས་བརྒྱད་ཅུ་བ།། 
    བྲུ་རྒྱལ་གཡུང་དྲུང་བཅོ་ལྔ་མཛད།།     
    
    བཞོད་སྟོད་དངོས་གྲུབ་གྲགས་པ་ཡིས།།  
    རྫོགས་ཆེན་ཀློང་ཆེན་གཏེར་ནས་དྲངས།།   
    གྱེར་སྤུངས་སྣང་བཞེད་ལོད་པོ་ཡིན།།  
    དུས་རབས་བརྒྱད་པར་སྙན་བརྒྱུད་སྤེལ།།    
                          
    རྫོགས་ཆེན་མ་ཧཱ་ཡོ་གའི་རྫོགས་རིམ་དང་༎
    ལྷུན་གྲུབ་ལྟ་བ་ཀ་དག་ལྟ་བ་རྣམས༎
    བཅུད་ཕྱུངས་མདོ་རུ་དྲིལ་བ་རྫོགས་པ་ཆེ༎
    ཨ་ཏི་ཡོ་ག་ཐེག་དགུའི་རྩེ་མོར་གྲུབ༎
    
    བེ་རོ་ཙ་ནས་རྒྱ་གར་དུ།།  
    སློབ་དཔོན་ཤྲཱི་སིངྷཱ་མཇལ།།
    རྫོགས་པ་ཆེན་པོའི་ཆོས་རྣམས་ཞུས།།  
    རིག་པའི་ཁུ་བྱུག་བོད་དུ་བསྒྱུར།།  
    
    སློབ་དཔོན་ཤྲཱི་སིངྷཱ་ཡང་།།   
    རྒྱ་ནག་ཡུལ་དུ་སྐུ་འཁྲུངས་ཤིང་།། 
    རྒྱ་དཀར་ཡུལ་དུ་གནས་བཅའ་ཞེས།། 
    རྒྱལ་བ་ཀློང་ཆེན་རམ་འབྱམས་གསུངས།། 
    
    མ་ཧཱ་ཡོ་གའི་རྒྱུད་སྡེར་མངའ་བརྙེས་པའི།།  
    གནུབས་རིགས་སངས་རྒྱས་ཡེ་ཤེས་ལ།།  
    ཕྱིས་སུ་སངས་རྒྱས་སྦས་པར་འབོད།།  
    བསམ་གཏན་མིག་སྒྲོན་བསྟན་བཅོས་མཛད།།  
    
    དེ་ཡི་སློབ་དཔོན་གཉན་དཔལ་དབྱངས།།   
    བསམ་གཏན་མིག་སྒྲོན་འགྲེལ་བ་ཡི།།   
    རྫོགས་ཆེན་བསྟན་བཅོས་འགའ་ཡང་བརྩམས།།    
    
    དུས་རབས་བཅོ་ལྔ་ནང་རོལ་དུ།། 
    རྙིང་མའི་གཞུང་དཔེ་བརྒྱ་ཡར་འཕེལ།། 
    རཏྞ་གླིང་བའི་དཔེ་ཚོགས་སྒྲིག། 
    རྙིང་མ་རྒྱུད་འབུམ་ཞེས་སུ་གྲགས།།  
    
    མཁས་པ་རོང་ཟོམ་ཆོས་བཟང་གི།  
    ཐེག་ཆེན་ཆོས་ལ་འཇུག་པ་བརྩམས།།    
    རྫོགས་ཆེན་གཞུང་ལ་དག་སེལ་བྱ།།   
    ཡིན་ཡང་བསྟན་བཅོས་དོན་མེད་གྱུར།། 
     
    སྐྱེ་བོ་རྫས་ལས་གྲུབ་པའི་ལུས།། 
    འོད་ལུས་འགྲུབ་པའི་ལྟ་བ་ཉིད།།  
    བོན་ཀྱི་དུས་རབས་ནམ་ཟིན་ན།།   
    དུས་རབས་བཅུ་གཅིག་ཡིན་ནམ་དཔྱད།།   
    
    སྟོན་པ་ཤཱཀྱ་ཐུབ་པའི་བསྟན་པ་ལ།།   
    རྒྱ་ཆེན་སྤྱོད་བརྒྱུད་ཟབ་མོ་ལྟ་བརྒྱུད་དང།།  
    སྙིང་བོ་ཐུགས་བརྒྱུད་གསུམ་དུ་ཡོད་པར་འདོད།།   
    སྐུ་གསུང་ཐུགས་ཀྱི་བརྒྱུད་ལ་གསོལ་བ་འདེབས།།   
    
    སྙིང་བོའི་བསྟན་པ་གནས་བརྟན་འོད་སྲུངས་གཏད།།   
    རི་བོ་བྱ་རྐང་འགོག་པ་སྙོམས་པར་བཞུགས།།  
    མ་འོངས་རྗེ་བཙུན་བྱམས་པ་མགོན་པོ་ལ།།   
    ཤཱཀྱ་ཐུབ་པའི་བསྟན་པ་འདིའོ་གཏོད།།   
    
    བོད་དུ་རྫོགས་ཆེན་གཞུང་ལ་མངའ་བརྙེས་ཤིང་།།  
    རིས་མེད་གྲུབ་མཐའ་འཛིན་པའི་སྐྱེ་བོ་ལ།།   
    རྒྱལ་བ་ཀློང་ཆེན་རྡོ་རྗེ་གླིང་བ་དང་།།
    
    རིས་མེད་རིང་ལུགས་སྐྱོང་ལ་ཆེས་དཔའ་བ།།        
    འཇམ་པའི་དབྱངས་དངོས་མཁྱེན་བརྩེ་དབང་བོ་དང་༎
    ཀུན་ཁྱབ་ཀོང་སྤྲུལ་ཡོན་ཏན་རྒྱ་མཚོ་དང་།།
    མཆོག་གྱུར་གཏེར་ཆེན་གླིང་བ་ཕྱག་གི་ཡུལ།། 
    
    བོན་མིན་བན་མིན་གྲུབ་དབང་ཤར་རྫ་བ།།  
    བཀྲ་ཤིས་རྒྱལ་མཚན་དཔལ་ལ་དད་པའི་ཡུལ།།
    གསར་མིན་རྙིང་མིན་ཏཱ་ལའི་བླ་མ་མཆོག།  
    རྒྱལ་དབང་ལྔ་བ་མི་ཕྱེད་སྙིང་ནས་འདུད།།
    
    བསམ་ཡས་བདུད་འདུལ་སྔགས་པ་གླིང་།།
    གསང་སྔགས་ལྷ་ཚོགས་ལྷ་ཁང་ཡོད།།
    རྫོགས་ཆེན་གཞུང་དོན་སྤེལ་ཕྱིར་བཞེངས།།
    རྦ་བཞེད་མཁན་པོས་གླེང་མ་མྱོང་།།
    
    བོད་རྒྱལ་སིལ་བུར་འཐོར་བའི་དུས།།
    དབའ་དང་འབྲོ་གཉིས་གྲལ་རིམ་ཕྱེས།།
    དབའ་ཡིས་རྒྱ་གར་ཆོས་ལ་དད།།
    འབྲོ་ཡིས་རྒྱ་ནག་ཧྭ་ཤང་གཅེས།།
 （འབྲོོ་བཟའ་བྱང་ཆུབ་རྗེ་ཡང་རབ་ཏུ་བྱུང་）

    རྒྱལ་བོ་གནམ་རི་སྲོང་བཙན་གྱིས།།
    བོད་ཁམས་གཅིག་གྱུར་བྱེད་པའི་དུས།།
    དབའ་ཡིས་བྱས་རྗེས་ཆེན་པོ་བཞག།
    ཡེ་ཤེས་དབང་བོ་དབའ་ཚང་འཁྲུངས།།
    
    རྒྱལ་བོ་ཁྲི་སྲོང་ལྡེ་བཙན་དུས།།
    དབའ་ཡི་བློན་པོ་གསལ་སྣང་གིས།།
    མཁན་ཆེན་ཞི་འཚོ་གདན་འདྲེན་དང་།།
    རབ་ཏུ་བྱུང་ནས་ཡེ་ཤེས་དབང་།།
    
    ཞི་འཚོ་མྱ་ངན་འདས་རྗེས་སུ།།
    བཙན་པོ་ཁྲི་སྲོང་ལྡེ་བཙན་གྱིས།།
    བཅོམ་ལྡན་འདས་ཀྱི་རིང་ལུགས་ལ།།
    ཡེ་ཤེས་དབང་བོའི་གོ་མིང་གནངས།།
    
    བོ་ངྷི་ས་ཏྭ་མཁན་ཆེན་ཞི་བ་འཚོས།།
    བོད་དུ་རྣལ་འབྱོར་སྤྱོད་པའི་དབུ་མ་སྤེལ།།
    གཞི་ནི་ཐམས་ཅད་ཡོད་སྨྲའི་སྡེ་བ་བཙུགས།།
    བོད་དུ་སད་མི་མི་བདུན་རབ་ཏུ་བྱུང་།།
    
    དེ་ཡི་ཐུགས་སྲས་ཀ་མ་ལ་ཤཱི་ལས།།
    དབུ་མ་སྣང་བ་ཞེས་བྱའི་བསྟན་བཅོས་མཛད།།
    ཆོས་ལུགས་ཁ་ཁྱེར་འགྲན་རྩོད་ཕྱོགས་རིས་ཀྱིས།།
    བསམ་ཡས་སྒྲ་བསྒྱུར་གླིང་དུ་ལྐོག་གསོད་བྱས།།

    ཡེ་ཤེས་དབང་བོས་ཆོས་ཀྱི་མདུན་ས་བཟུང་།།
    ཞང་བློན་འདུན་ས་ལས་མཐོ་གོ་གནས་དགོས།།
    རབ་བྱུང་འཚོ་རྟེན་རྐྱེན་རིས་དུད་ཁྱིམ་གསུམ།།
    ཁྲི་གཙུག་ལྡེ་བཙན་བཞི་བསྣན་དུད་ཁྱིམ་བདུན།།
    
    སློབ་དཔོན་ཆེན་པོ་བལ་བོའི་ཡུལ་དུ་སྤྱུགས།།
    བཻ་རོ་ཙ་ན་ཚ་བ་རོང་དུ་ཕུད།།
    རྒྱ་ནག་ཧྭ་ཤང་ཏུན་ཧོང་ཡུལ་དུ་བསྐྱལ།།
    ཁྲི་སྲོང་ལྡེ་བཙན་ཟུང་ཀར་མཚམས་ལ་ཕེབས།།
    
    ཁྲི་ཡི་དར་མས་མུ་མཐུད་ཤར་ཕྱོགས་བསྐྱེད།།
    རབ་བྱུང་དར་ནས་དམག་དོན་ཉམས་པ་ལ།།
    སྔགས་པ་གནོད་མེད་གྲྭ་བཙུན་ཁྱིམ་དུ་ཕབས།།
    
    ཆོས་ཀྱི་མདུན་ས་བསམ་ཡས་མཁན་པོས་བཟུང་།།
    ཆོས་ལས་ལྷག་པའི་སྲིད་ལ་ཐེ་གཏོགས་ཐེབས།།
    བསམ་ཡས་མཁན་པོ་སྐུ་ཐོག་དགུ་བ་ཡིས།།
    ལྷ་སྲས་དར་མ་ཉག་ཕྲན་མདའ་ལ་དྲངས།།
    
    མ་ཞང་ཁྲོན་པ་གསོན་པོ་དུར་དུ་སྦས།།
    བོ་ངྷི་ས་ཏྭའི་ཞལ་ལ་རྟས་འཕྲ་བརྒྱབ།།
    ཀཱ་མ་ཤི་ལས་མཁལ་མ་མཉེས་ནས་བཀྲོངས།།
    སྙིང་བོ་སྙིང་བོའི་བསྟན་པ་དར་གྱུར་ཅིག།