Wednesday 23 April 2014
00:07 | 
Posted by
༄༅།། ཨེ་མ་ཧོའི་རིག་མཛོད་། |
འཛམ་གླིང་སྤྱི་བཤད།
འཛམ་གླིང་སྤྱི་དང་རྒྱ་གར་གྱི་གཏམ་དཔྱིད་ཉི་འཕུད་བྱེད་སིནྡྷུ་ཝ་རའི་ཕྲེང་བ་ཞེས་བྱ་བ་བཞུགས་སོ།།
རྩོམ་པ་པོ་ཨེ་ཝྃ་རིག་པ།༄༅།།ངག་གི་དབང་ཕྱུག་ངག་ལ་ཞུགས་པ་ཡིས། །ངག་དབང་ལྷ་མོའི་ངག་སྙན་འགྱུར་བའི་སྒྲས། །ངག་གི་བརྗོད་པ་ངེས་པའི་དོན་དུ་ཤར། །ངག་གི་དཔལ་སྦྱིན་ངོ་མཚར་བླ་མ་ལྷ། །སྙིང་གི་ཐིག་ལེའི་འདབ་སྟོང་གཡོ་བའི་སྦུབས། །ལེགས་པར་མཆོད་དེ་མི་བདེན་སྣང་བ་འདི། །ངེས་མེད་སྒྱུ་མ་ལྟ་བུའི་རོལ་པ་ནི། །ངག་འཆལ་སྨྲ་བ་ང་ཡི་ངག་ལས་སྟོན། །
ད་ལྟ་རབ་བྱུང་བཅོ་ལྔ་པ་ཟད་ལ་ཕྱོགས་པ། རྔ་ཆེན་གྱི་ལོ་སྟེ་ཆུ་ཁྱི་༼༡༩༢༢༽ཤར་བའི་དུས་སུ་ཐོས་པ། རྒྱ་གར་གྱི་ཡུལ་དབུས་ནི་མ་ག་དྷ་ཡིན་ལ། ཤར་ན་པི་ཀན་ཏ་ནི་ཟ་ཧོར་རྒྱལ་པོ་དགེ་བ་དཔལ་ཞེས་ཇོ་བོ་རྗེའི་ཡབ་ཀྱི་ཕོ་བྲང༌། མཁན་ཆེན་ཞི་བ་འཚོ་དང༌། ཨ་ཏི་ཤ་ཁུ་དབོན་གྱི་འཁྲུངས་ཡུལ་བྷང་ག་ལ། དེའི་བདག་པོ་ནི། ད་ལྟ་ཕྱི་ཡི་རྒྱལ་པོའི་གླིང་བར་བྷེ་ལག་སྟེང་ངམ་རྔ་ཡབ་གཞན་ནམ་སྟེ་པྲྀ་ཡང་ཀུའི་གླིང་ཡིན་ནམ་ཞེས། པཎ་ཆེན་དཔལ་ལྡན་ཡེ་ཤེས་ཀྱིས་བཤད་དེ། དེ་ནས་ཐོན་པའི་རྒྱལ་པོ་རྒྱ་ནག་སོབ་བམ། གཡིང་ཀྭང་ངམ་གཡིང་ཀུའམ། བོད་པས་དབྱིན་ཇི་ཞེས་འབོད་པའི་རྒྱལ་པོ་ལ། ས་དཀར་རྒྱལ་པོར་ཡང་བརྗོད། གཞུང་རྐྱང་ཐོ་བ་རེའི་ཕོ་བྲང་ལྟེ་བ་བྷོ་ལག་སྟེང་ཡིན། ཁམས་ལ་བློན་ཆེན་དགུ་ཡི་སྤྱི་དཔོན། ཀར་ལི་ཤར་ར་ན་ཡོད་པ། ལ་རི་རྒྱལ་ཚབ་ཆེན་པོ་ཞེས། མི་ལོ་ཇི་རི་ནི་བོད་ཀྱི་སྲིད་སྐྱོང་ལྟ་བུའོ། །
དེའི་འོག་རྒྱ་གར་གྱི་རྒྱལ་པོ་སུམ་བརྒྱ་ཙམ་ཡོད་ཅེས་སོ། །དེ་ནང་བུ་ཏྲམ་ཟ་ཡི་རྒྱལ་པོ་ལ་འབུམ་དམག་གཅིག་ཡོད། དེ་ཕྱི་གླིང་ཁྲི་སྟོན་རྒྱལ་ས་ཆེན་པོ་པ་ཊ་ལི་པུ་ཊ་ཞེས་སྔོན་གྱི་དུས་སུ་གྲགས། རྒྱལ་པོ་མྱ་ངན་མེད་ཀྱི་ཕོ་བྲང་གི་ཤུལ། མ་ཐུ་ར་སྟེ་བཅོམ་བརླག་དང་ཐག་ཉེ་བ་དེར། བྷོ་ལི་འམ། དྷི་རྡི་ལི་སྟེ། རབ་བྱུང་བཅོ་ལྔ་པའི་ས་བྱ་ལོར་བྱས་པ་ཡིན། དེ་དུས་བུ་ཏྲམ་ཟའི་རྒྱལ་པོས་རྗེ་པ་ལ་བཀུར་བསྟི་གུས་འདུད་ཡེ་མ་བྱས་པས། འཁྲུགས་པ་ཕྲན་བུ་བྱས་ཀྱང་བུ་ཏྲམ་ཟའི་རྒྱལ་པོས་ཡེ་མ་དོ་བས། རྟེན་འབྲེལ་མི་ཤིས་པར་འགྲོ་སྙམ་ཕེ་རིང་རྒྱལ་པོས་ཁོག་ཆེན་ཡིན་ཁུལ་གྱིས་བཞག་པ་ཡིན་འདུག་ཀྱང༌། སེམས་ལ་བདེ་པོ་བྱུང་མེད་སྐད། བུ་ཏྲམ་ཟའི་རྒྱལ་པོ་མི་རྒོད་ཀ་བིལ་དང་གྲོགས་པོ་ཡིན། ཕི་ལིང་ལའང་ཧ་ལམ་ཞིག་ལས་ཁ་ཉན་པར་མི་བྱེད། ཞེ་ལ་མི་དགའ་བས། ཕི་ལིང་ལའང་ངོ་ལོག དམག་བྱ་བ་འདོད་པ་ཡོད་སྐད། ས་གནས་ཐམས་ཅད་བསྡོམས་ན་འབུམ་བརྒྱར་ཉེ་བ་ཡོད། དེ་ཐམས་ཅད་ལ་དུས་རྒྱུན་དུ་དམག་ཕོགས་ཡོད་པ་སྟེ། རྒྱ་གར་ནུབ་དེར་ཁྲི་སྟོན་བྱེད་པའི་རྒྱུ་མཚན་ཡུལ་དེར་ཤིན་ཏུ་སྐྱིད་པོ་ཡིན་སྐད་དང༌། སྔར་དྷྲི་ལིས་ཞེས་རྒྱ་གར་ཤར་ནུབ། མུ་པུརྨ་ར་བཅས་དབང་བྱས་པ་ཡིན། གསར་དུ་ལ་ཧོར་པ་བཅས་ཀུན་དབང་བྱས་པ་ཡིན།
ད་ལྟ་དེ་དག་སྔོན་རྒྱལ་པོ་སྟོབས་ཆེན་བྱུང་བ། རྒྱལ་པོ་ཕལ་བར་གྱུར་ཏེ། དབྱིན་ཇིའི་འོག་ཏུ་འཛུལ་དགོས་བྱུང༌། ས་དེ་ཤེས་པ་ཡིན་པའི་རྒྱུ་མཚན་གྱིས་གནས་དེར་ཁྲི་སྟོན་བྱས། རྒྱལ་པོ་བརྒྱས་ཀྱང་རང་རང་གི་འབྱོར་བ་ལྟར། ཁང་པ། གསེར། དངུལ། ཤེལ། དཀར་ཡོལ་སྣ་ཚོགས་ཀྱིས་མཐའ་བསྐོར་དུ་བརྒྱན།
༈ རྡུལ་མི་ལྡང་དོན་དུ་ས་ལ་སྤོས་དཀར་ཏིལ་མར་བསྲེལ་བ་སྤོས་སྣུམ་བྱུགས་ནས་བཞགས། ག་པུར་ཐང་ཆུ་སི་ཧླ་དང༌། གུར་གུམ་གྱིས་ཆག་ཆག་བཏབ། ཡུལ་སོ་སོའི་ཤིང་དང༌། མེ་ཏོག་མི་འདྲ་བ་སྣ་ཚོགས་པ་བཙུགས། ཕྱི་གླིང་རྒྱལ་པོ། གུར་ཤེལ་གྱི་ཀ་བ་ཉེར་བརྒྱད་པ་ཕུབ། མཚན་གློག་གི་ཞུན་མར་སྦར་བས། ཤེལ་གྱི་ཀ་བ་ནང་མེ་ཏོག་སྣ་ཚོགས་སྐྱེས་པའི་དབུས། རྒྱལ་པོ་ལྷགས་པ་མི་འདྲ་བ་གསེར་ཞུན་ཁ་དོག་ཅན། གོས་གོན་པའི་མཐའ་རྒྱ་གར་རྒྱལ་པོ་བཅུ་ཡི་བུ་བཅུས་འཁུར་དགོས་པ་གོན། རྒྱལ་ཁག་གི་བུ་མོ་བཅུས་ཁུར་རོགས་དགོས། ས་ཆེན་ལ་དབང་བྱེད་པར་མཚོན་དོན་ཡིན་སྐད། རྒྱལ་པོ་གསེར་ཁྲི་ལ་བསྡད། བློན་པོས་ཤེལ་གྱི་དབྱུག་པ་དུ་ཚགས་གཟུགས་འདྲ་བ་ཐོགས་ནས་ཁྲོམ་མང་དབུས། བཀོད་པ་འདྲ་བ་བཤད་སྲོལ་གདའ་སྐད། ཁྲི་སྟོན་བྱེད་པའི་དུས། ཉིན་ཚ་བ་ཆེ་བས་ཉལ། མཚན་ཅུང་བསིལ་བས་མཚན་བྱེད་སྐད། རྒྱལ་པོ་སུམ་བརྒྱ་དེ། དེ་ནང་བོད་པ་འབྲུག་རྒྱལ་དང༌། འབྲས་ལྗོངས་པ་གཉིས་ཡོད་པར་གྲགས།
དབྱིན་ཇི་རྒྱལ་པོ་ལ་དམག་ཤིན་ཏུ་མང་བར་བཤད་འོང་རུང༌། བཤད་ཚོད་མི་བདེན། སྔོན་ཐོག་མ་ལ་དམག་འབུམ་ཚོ་བརྒྱ་ཡོད། ད་ལྟ་འཇར་མིན་དམག་འབུམ་ཚོ་བདུན་བཅུ་བྱུང་བས། དབྱིན་ཇིས་ཀྱང་འགྲན་ནས་དམག་མང་དུ་བཅུག་པས་དམག་སྒར་ཆེ་ཤོས་ལ་འབུམ་ཚོ་སུམ་བཅུ་ལྷག བཞི་བཅུར་ཉེ་བ་ཡོད་ཟེར། སྔར་ཕྱི་གླིང་གིས་རྒྱ་གར་བ་ནི་གླེན་པ་ལུག་དང་འདྲ། འཕྲུལ་གྱི་རིགས་མི་ཤེས་ཟེར་བརྙས་པ་ལ། ཕྱིས་རྒྱ་གར་བས་རིག་གནས་སྦྱངས་པས། ཕྱི་གླིང་མི་ལོ་ཇི་རིང་ཡང་བུད་ཆོག་རྒྱུའི་ཡོན་ཏན་ཅན་འོང་ན་ཡང༌། མི་ཡི་ལད་མོ་ནེ་ཙོས་ཀྱང་ཤེས་འོང་ཟེར་ནས་ཀླ་ཀློ་ཁོ་རང་གི་མི་རྒྱུད་ཡིན་ངེས་ཅན་མ་གཏོགས། རྒྱ་གར་བས་སྲིད་སྐྱོང་ལ་མི་དགའ་ནས་ངོ་ལོག་འདོད་པ་ཡོད་སྐད། རང་ཅག་མཚམས་པ་བཅུ་སྡེ་དང༌། བཤད་གྲྭ་བ་མི་ཉི་ཤུ་སུམ་བཅུ། ཕྱི་མའི་དོན་དུ་ཆོས་ཕོགས་སྦྱོར་བ་ལའང་དཀའ་བ་ཆེ་ཙམ་མཆིས་ན། ཚེ་ཐུང་རྨི་ལམ་གྱི་སྣང་བ་འདྲ་བ་འདི་ཁོ་ནའི་དོན་དུ། སྲོག་དང་ལོངས་སྤྱོད་མང་པོ་དོན་མེད་ཆུད་ཟོས་སུ་བཏང་ན་ཀྱེ་མ་ཧུད།
དབྱིན་ཀྭང་ངམ་གཨིན་ཀུའམ། དབྱིན་ཇིར་འབོད་པའི་རྒྱལ་པོ། རྒྱལ་ས་རྩ་བ་བྷེ་ལད་སྟེང་ངམ་རྒྱ་མཚོའི་གླིང་བར། དེ་དང་ཀ་ལམ་གར་ཏ་སོགས་ན་ཡོན་ཏན་སློབ་གྲྭ་ཤིན་ཏུ་མང་པོ་ཡོད།
དེ་ན་རིག་གནས་དང་པོ་ཡི་གེའི་བྲིས། ༡༽
དེ་ནས་འཕྲི་བསྣོན་བསྒྱུར་བགོ་སོགས་རྩིས་ཀྱི་རིག་པ། ༢༽
སྙན་ངག་དང་སཾ་ཀྲི་ཏ་ལ་སྐད་དོད་མཚམས་སྦྱོར་ཙམ་ལས་བྱིང་གྲུབ་པ་སོགས་ཡོད་པ་ལམ་ཙམ་པ་དང༌། ༣༽
སྨན་འཚོ་བྱེད་ཀྱི་གཞུང་འཛམ་གླིང་གི་དྲང་སྲོང་མང་པོའི་ལུགས་དང་སྤོར་ཆུག་ལུགས་བསྡུས་པ། ༤༽
ལུགས་ཀྱི་བསྟན་བཅོས་ཚད་མ་ཕམས་ལོ་སོ། ༥༽
ཕམས་ཟེར་བ་ཕྱིས་མཁས་པ་ཞིག་གིས། མི་ཐམས་ཅད་རྩ་ལས་སྐྱེས་པའི་བྱུང་བ་ཡིན་པའི་སྒྲུབ་བྱེད་བཀོད་པ་ཡོད་སྐད། ༦༽
གཡུལ་འགྱེད་པའི་ལུས་དང་མེ་མདའ་སོགས་དམག་རྩེད་སྦྱོང་བ། ༧༽
ས་ཡན་སི་ཟེར་བ་རྩལ་ལག་མི་འདྲ་སྣ་ཚོགས་རྩོམ་རྒྱུད་དང༌། རྒྱང་མཐོང་མི་འདྲ་བ་སྣ་ཚོགས། རྒྱ་མཚོའི་ཐོག་འགྲོ་རྒྱུའི་གྲུ་རྫིངས། གནམ་གྲུ་མེ་ཆུ་འཐབ་པ་ཤིང་རྟའི་འཕྲུལ་འཁོར་སོགས། རིགས་པའི་རྩལ་སྦྱོང་བ་འཕྲུལ་གྱི་རིག་གནས་དང༌། ཇི་སྐད་དུ། འདི་ཡིས་སྲིན་བུའི་གྲངས་མཁྱེན་པ། །ངེད་ལ་འགའ་ཡང་ཉེར་མཁོ་མེད། །ཅེས་པ་ལྟར་ཕ་རོལ་ལ་གནོད་ཅིང་དབང་དུ་སྡུད་པའི་ཐབས་ཁོ་ན་དང༌། འཛམ་གླིང་གི་ཡུལ་གྱི་ཆགས་ཚུལ། ཆུ་ཡི་འབབས་ཚུལ། གླིང་དང་ཡུལ་ཐ་དད་དེ། ས་རྒྱ་ཆེ་ཆུང༌། མི་གྲངས་དང༌། དེ་དག་ན་ནོར་རྫས་ཅི་ཡོད་སོགས་དང༌། འཛམ་གླིང་གི་ས་བཀྲ་སྤར་དུ་རྒྱག་ཚུལ། གོ་ལའི་འདོད་ཚུལ། དེ་རྣམས་སུ་འགྲོ་བའི་གོམ་གྲངས་ཚུན་ཞིབ་མོར་བརྩིས་པའི་རིག་པའི་གནས། ༨༽ གཅིག་སྟེ། གཉིས་ཁོང་གིས་གསལ་པོ་མི་དྲན་ཏེ། རིན་ཆེན་སོགས་བརྟག་པ་བརྒྱད་གཅིག་ཡིན་སྙམས་ཞེས་སོ། །རྒྱལ་སྲིད་དང་ཁྲིམས་ཀྱི་བསྟན་བཅོས་གཅིག་ཡིན་པ་འབྲས་ལྗོངས་པ་ཞིག་གིས་ཟེར། ལེགས་པོར་ཤེས་པའི་རྒྱ་གར་བ་སོགས་ལ་དཔོན་ཆེ་ཙམ་དང་བྷ་ལིར་ཊར་སོགས་གོ་ས་འབྲིང༌། ཁོ་རང་ཚོའི་རྒྱུད་ལ་གོ་ས་ཆེན་པོ་སྟེར།
ཕྱིས་མི་རབས་ལྔ་དྲུག་སྔ་རོལ་ཏུ་བྱུང་བ། མཁས་པར་རྩི་བར་ཞིག་གིས་གོ་ལའི་རྣམ་བཞག་ཆེན་པོ་ཞིག་བརྩམས་པ། ད་ལྟར་རྒྱ་གར། རྒྱ་ནག རྒྱ་མཚོའི་གླིང་བར་ཕལ་ཆེར་དུ་དར། གོ་ལ་བྱ་ཡི་སྒོ་ང་འདྲ་བའི་ཤེལ་ལས་བླུགས་པའི་དཔེ་རིས་ཀྱང་ཡོད། སྣོད་གོ་ལ་ཉིན་ཞག་རེ་ལ། བླ་འོག་ཏུ་ཚར་རེ་བསྒྱུར་ནས། མགོ་འོག་ཏུ་ལོག་པ་ན་མཚན་མོ་འཆར་བ་དང༌། སྟེང་དུ་ན་ཉིན་མོ་འཆར་ཅེས་ཟེར།
དེ་དུས་རི་གླིང་སོགས་མི་འཇིག་པ་ནི། ལག་རྩལ་ཅན་གྱིས་ཕོར་བ་ཆུས་བཀང་བ་བླ་འོག་ཏུ་བསྒྱུར་བ་དང་ཆུ་མི་བོ་བ་ལྟ་བུར་འདོད། དེ་འདྲའི་གོ་ལ་འཁོར་བའི་སྣང་ངེས་སུ་འཛམ་གླིང་འདིའི་མཐའ་བསྐོར་ནས། ཁོ་རང་ཚོ་ཕྱིན་པ་ནི། ས་འོག་ཏུ་མུན་པའི་ནང་ནའང༌། རིན་ཆེན་སོགས་སྒྲོན་མེ་ལ་བརྟེན་ནས་ཟླ་བ་ཁ་ཤས་དང༌། ཁྱད་པར་སྒོ་ང་འདྲ་བའི་རྩེ་ན་ཟླ་བ་བཞི་ཙམ་སོང་ཡང༌། འཁྱགས་རོམ་ཤིན་ཏུ་རྩུབ་པས་ཡེ་འགྲོ་མ་ཐུབ་པས། གོ་ལ་དེ་སྟེང་འོག་ནས་བསྐོར་བ་འགྲོ་འདོད་དང༌། འཁོར་འདོད་ཡོད་ཀྱང་ད་སྔར་འགྲོ་མ་ཐུབ་སྐད།
འཇིག་རྟེན་ཁམས་གྲངས་མེད་ཡོད་པ་བདེན་པ་འདྲ། སྐར་མ་གྲངས་མེད་འདུག རྒྱང་ནས་སྐར་མར་རྒྱང་མཐོང་ཁྱད་འཕགས་ཀྱིས་བལྟས་པས། གོ་ལ་རེད་འདུག་པས། གོ་ལ་འདི་འདྲ་གྲངས་མེད་འདུག་ཅེས་བཤད་སྐད། ནང་པ་སངས་རྒྱས་པས་གོ་ལ་ནི་རི་རབ་ཀྱི་ངོས་གླིང་བཞིའི་ནམ་མཁའ་ལ་ཡོད་ཅིང༌། དེ་འང་སྐར་མ་གྲངས་མེད་པ་དེ་ཚོ་དང་ཐམས་ཅད་མཉམ་དུ་ཡོད་པར་འདོད་པས། ཁྱེད་ཅག་ད་ཨེ་ཐུབ་བལྟ་རྒྱུ་ལ་ཀླ་ཀློའི་རྒྱལ་ཁག་ཐམས་ཅད་ལ་འདྲེན་རྒྱུ་ཡིན་སྐད། དབྱིན་ཇིས་སྔར་འཛམ་གླིང་མ་གཏོགས་མི་འདུག ནང་པ་སངས་རྒྱས་པས། རི་ཡི་རྒྱལ་པོ་རི་རབ་ལ། གླིང་བཞིས་གླིང་ཕྲན་བསྐོར་བ་མི་བདེན། རི་རབ་མི་འདུག་ཅེས་པར། ཕྱི་རྒྱ་མཚོའི་ནང་དུ་མང་པོ་ཕྱིན་པས། གླིང་ཕྲན་བདུན་མཐོང་ནས། ཤར་གླིང་ལ་སོགས་པ་གླིང་བདུན་འདུག རི་རབ་ད་ལྟ་མི་འདུག་ཟེར། སྐར་མ་གྲངས་མེད་པ་དེ་ཚོའི་ནང་དུ་སླེབ་མ་ནུས་པས། རི་རབ་མཐོང་སར་མ་སླེབ་པ་དང༌། གླིང་བཞི་ཡོངས་རྫོགས་མ་མཐོང་བར་ཤེས་ཤིང༌། རྒྱ་མཚོའི་གླིང་བར་གླིང་ཕྲན་དུ་འཁྲུལ་བ་ནི། འཛམ་གླིང་གི་གླིང་ལག་གླིང་ཕྲན་མང་པོ་ཡོད་པར། དྲན་པ་ཉེར་བཞག་ནས་གསུངས་པ་ཡོད་པས། ཁྱོད་ཀྱིས་མཐོང་བ་ལས་གསལ་བའི་མཐོང་བ་ཡོད་དེ། གྲངས་མེད་པའི་གོ་ལའམ། འཇིག་རྟེན་དཔོག་པ་ལ་འཁྲུལ་བ་མེད་པ་ལྟར་རོ། །
མ་མཐོང་ཕྱིར་ན་མེད་པ་མིན་ཏེ་གོ་ལ་སྒོ་ང་འདྲ་བའི་རྩེ་འཁྱགས་རི་གངས་རི་ལ། སྟེང་འོག་བསྐོར་ནས་འགྲོ་ན་མཐོང་འདོད་དང་ཤེས་འདོད་བཞིན་ད་ལྟ་རྒྱ་ནག་པེ་ཅིང་དུའང་གོ་ལའི་ཁ་སྦྱར་ཟེར་བའི་ཀླ་ཀློའི་གོ་ལའི་འདོད་ཚུལ་དེ་བསྒྱུར་བ་དར་ཡོད་པ་དང༌། སོག་ཡུལ་དང་ཨ་མདོ་སོགས་ནང་པ་འགའ་འང༌། དེ་འདྲའི་གོ་ལའི་རྣམ་བཞག་ལ་ཡིད་སྨོན་ཤོར་བ་དང༌། ཚ་གན་ནོ་མིན་ཧན་གྱི། འཛམ་གླིང་ལམ་ཡིག་སོགས་ཀྱང་བརྟག་པར་བྱ། གཞན་མཐའ་མིའི་གཏམ་རྗེས་བཅད་པ་ནི། ཡན་ལག་བརྒྱད་ལྡན་གྱི་བདུད་རྩིའི་མཚོ་འགྲམ་དུ་བ་ཚྭ་ཅན་གྱི་ཁྲོན་པ་འབྲུ་བ་བཞིན། སངས་རྒྱས་ཐམས་ཅད་མཁྱེན་པའི་གསུངས་ཚད་མ་དོར་ནས། འཇིག་རྟེན་པའི་བློ་ངན་རྒད་པོའི་གཏམ་ལ་དགའ་བ་རྣམས། ལྷ་སྐལ་ཆད་དེ་འབྱུང་པོ་སྒྲུབ་པ་ལྟ་བུའོ། །ཁྱོད་རང་གིས་ངག་འཆལ་སེང་གེ་བྲི་བའང་དེ་བཞིན་ནོ་ཟེར་ན། འདི་ནི་མི་མཚུངས་ཏེ་བསྟན་པ་ཡོད་མེད་སོགས་རྟོག་པ་དང༌། ཉམས་མཚར་གྱི་ངག་འཆལ་སྒྲུང་ལྟར་རང་གར་བྲིས་པ་ལས་སངས་རྒྱས་ཀྱི་བཀའ་མི་བདེན་རྨི་ལམ་དུའང་མི་བསམ་པའི་ཕྱིར་རོ། །
གཞན་ཡང༌། ས་འཁོར་བ་ནི་མངོན་སུམ་དང་འགལ། དེའི་སྣོད་འཁོར་བ་ནི་སྒོང་ཤུན་ལྟ་བུ་ས་ཡི་ཕྱི་རོལ་ཏུ་ཡོད་པ་དེ་རགས་པ་སྒྲིབ་ཐོག་ཅན་ནམ། སྒྲིབ་ཐོག་མེད་པ་རྒྱུ་ཅི་འདྲ། རྩེར་གངས་རི་ཡོད་པ་ཡིན་ན་སྒྲིབ་ཐོག་ཅན་ཡིན་དགོས། དེ་ཡིན་ན་ཉི་ཟླ་ནང་དུ་ཡོད་དམ་ཕྱི་རོལ་ཏུ་ཡོད། སྒོ་ང་འདྲ་བ་དེ་དེའི་ནང་ནས། དེའི་དབྱིབས་བརྟག་ན་འཁྲུལ་རྒྱུ་ཡིན་ལ། ཕྱི་རོལ་རྒྱང་རིང་ནས་བལྟས་ན་ཡང་དེ་བས་ཆེས་ཆེར་འཁྲུལ་པས་སོ། །
ཡང་ཉི་མ་དང་ཟླ་བའི་དཀྱིལ་འཁོར་ནང་དུ་འགྲོ་མི་ནུས་བཞིན། དེ་སྐེད་པའི་ཐད་ན་ཡོད་པའམ། དེ་ཡན་གྱི་རི་རབ་ཡོད་མེད་སོགས་མི་ནུས་པའི་ཕྱིར། སྒོ་ང་འདྲ་བའམ་མི་འདྲ་བ་སོགས་མི་ནུས་ཏེ། ཉི་ཟླ་སྒྲིབ་མི་སྒྲིབ། མི་སྒྲིབ་ན་ནང་དུ་ཡོད་པ་འགྱུར་ལ། དེ་ཡོད་ན་སྣོད་དེ་བླ་འོག་ཏུ་འགྲོ་བ་ཐལ་ལ། དེ་ཡི་ཚེ་ཉི་ཟླ་ཡང་རེས་འོག རེས་སྟེང་དུ་འགྲོ་བར་ཐལ་བ་སོགས། ཉི་ཟླ་མི་སྒྲིབ་ན་ཉི་ཟླ་ཕྱི་རོལ་ཏུ་ཡོད་ལ་སྒོ་ང་འདྲ་བ་འདི་བརྡོལ་ནས་ཉི་མས་འོད་འཇུག་པ་འམ། སྒོ་ང་འདྲ་བས་ཉི་མའི་གོ་ལ་དང་བར་ན་ཡོད་པ་མཐོང་དགོས་པ་སོགས་མངོན་སུམ་དང་འགལ་ལོ། །དེས་ན་རྒྱ་མཚོའི་ནང་དུ་སོང་ཕྱིན་པས། ཕྱོགས་བསླད། མགོ་རྨོངས་ཏེ། སྒོང་ང་འདྲ་བའི་འཇིག་རྟེན་ནི། སྨིག་རྒྱུ་འམ། འོད་དམ། རླབས་སམ། འཁྲུལ་རྒྱུས་བསླད་པ་ཞིག་ཡིན་པར་འདུག་གོ །
གོ་ལའི་སྟེང་གངས་ཀྱི་རྩེ་ལ་མི་ཐར་ཞེས་པ་ནི། ཤམ་བྷ་ལའི་ཆུ་བོ་སི་ཏའི་ཉེ་བར་ཕ་རོལ་གྱི་གངས་རི་ཆེན་པོ་ལམ་ཡིག་ཏུ་བྱུང་བ་དེ་ཚོ་མིན་གྲང་སྟེ་སླད་ནས་གསལ་བར་འགྱུར་རོ། །
ད་ལྟ་ཕྱི་གླིང་ཨིན་ཇི་ལ་རྒྱལ་པོའི་གླིང་བར་གྱི་ཡུལ་ཕྲན། འཛམ་གླིང་ཤར་དང༌། ནུབ་ཏུ་ཆེས་དམའ་བས། ལུང་པ་ལ་ལ་ནི་ཉི་མ་ཤར་སྐབས། ལ་ལར་ནུབ། ལ་ལར་ཉིན་གུང༌། ལ་ལར་མཚན་གུང་ཡོད་པས། རྒྱ་གར་གྱི་སྙན་ངག་མཁན་འདྲས། ཨིན་ཇི་རྒྱལ་པོར་བསྟོད་པ་བཏང་སྐབས། ཁྱོད་ཀྱི་ལུང་པ་ཉི་མ་མི་ནུབ་པའི་རྒྱལ་པོ་ཞེས་བསྔགས་པར་བྱེད་སྐད། རྒྱ་གར་ཧིནྡྷུའི་ལུགས་འཛིན་པ་ཨ་ཤོ་ཏ་བྷོ་རྡི་ཞེས་སྙན་ངག་མཁས་ཕྱིར་སྙན་ངག་བརྩམས་པས། ༼རྒྱ་གར་གྱི་སྙན་ངག་མཁན་ཌ་སྒོར་ལ་ནོ་བེར་རྩོམ་རིག་བྱ་དགའ་ཐོབ་པ་དེ་མིན་ནམ། སྒྲིག་མཁན་གྱི་མཆན། ༽རྒྱལ་པོ་གཞུང་གིས་སྒོར་འབུམ་བྱ་དགར་ཐོབ་བོ་སྐད། ཡེ་ཤུའི་རྟགས་རྒྱལ་པོའི་ཞྭ་ཡི་གོང་དུ་ཁྲམ་རིས་རྒྱ་གྲམ་དུ་གཏོད་པ་ལྟ་བུ་དེའོ། །ཨིན་ཇི་རྒྱལ་པོས་རྒྱ་གར་གྱི་ས་ཐོག་མར་འཛིན་པའི་སྐབས་ཆིངས་དོན། ཨངྒི་དང་སོ་ན་གྲུབ་མཐའ་རང་རང་གི་ཆོས་ལུགས་སྔར་ནས་ཅི་དར་བྱེད་ཆོག་རྒྱུ་ལས། བསྒྱུར་བཀོད་མི་བྱེད་རྒྱུའི་ཁས་དད་ཡི་གེ་བྲིས་ཡོད་པས། རྒྱལ་པོ། བློན་པོ་སོགས་ཞེ་ཕུགས་ཡེ་ཤུའི་ཆོས་ལ་དགའ་ཡང༌། ཆགས་སྡང་ཆེན་པོ་མེད་པའི་ཟོལ་གྱིས། ད་ལྟ་གཞུང་རྐྱང་གིས་འཇིག་རྟེན་ན་ལུགས་སྔར་གྱི་ཅི་ཡིན་ལས། ཆོས་ཐད་ནས་ཡེ་ཤུའི་རིང་ལུགས་རྒྱལ་པོ་དཔོན་དང་བློན་པོ་སུས་འཛིན་ཀྱང༌། རྒྱ་གར་བའི་ཧིན་དྷུས་རྩོད་པ་བྱེད་ཆོག་པས། ཡེ་ཤུའི་ལུགས་ཀྱི་ཆོས་བཤད་པ་མཐོང་ན། དེ་མ་ཐག་མུ་སྟེགས་ཧིན་དྷུ་མཁས་པ་ཚོ་སོང་ནས་རྩོད་པས་ཚར་གཅོད་སྲོལ་འདུག་ཟེར། རྩོད་པས་ཚར་བཅད་སྐབས་ཡེ་ཤུའི་ལུགས་འཛིན་ཚོ་ལ་རིགས་པ་མེད་པར། རང་གར་སྨྲས་པ་ཡིན་པས་ངོ་འགྱུར་ཏེ་ཁྲོས་ནས་བསྡད་པ་ལས། ལན་འདེབས་རྒྱུ་མི་འདུག རིགས་པ་ཧིན་དྷུ་རྒྱལ་འོང་ཟེར། ལར་ཡང་ཡེ་ཤུའི་ལུགས་དེ་ལ་འཕྲུལ་གྱི་རིག་གནས། མི་གྲངས། ས་རྒྱ་ཆེ་ཆུང་སོགས་དོན་ཆུང་ལ་མཁས་པ་མ་གཏོགས། དོན་ཆེན་འཐད་ཅིང་འོས་པའི་རིགས་པ་མེད་ལ་རིགས་པ་ལ་མི་མཁས་པ་ཞིག་ཀྱང་ཡིན་པར་འདུག
མེ་སྒྱོགས་དང༌། གནམ་གྲུ་དང༌། ཆུ་ཡི་ནང་དུ་གྲུ་རྫིང་སོགས། དབྱིན་ཇི་ལས་ཀྱང༌། འཇར་མིན་ནམ། རྒྱར་མིན་མཁས་ལ་དེ་དག་ནང་པ་སངས་རྒྱས་པའི་དུས་འཁོར་དང་ཕྱི་རོལ་པའི་རིག་བྱེད་ལས་བཏོན་ཏེ། ཕྱི་ནང་གི་གཞུང་མང་པོ་ལས་བརྐུས་བསྡུས་བྱས་སྐད་དོ། །དཔེར་ན་བོན་གྱིས་ཇི་ལྟར་རོ། །
དེ་ལ་རིག་པ་གསར་པ་མང་པོ་བསྣན་པ་ཡིན་འདུག ཨིན་ཇིས་མནའ་ཁུར་ན། བུ་ཌོ་ཟིན་རྒྱལ་པོ་འབུམ་དམག བལ་པོ་རྒྱལ་པོ་འབུམ་དམག་སོགས་འབུམ་དམག་ཡོད་པའི་རྒྱལ་པོ་ཁ་ཡལ་ཡོད། བྱེ་ལག་སྟེང་ངམ། བྷེ་ལད་སྟེང་ན་ཕྱི་གླིང་ལུགས་མི་རྩིས་ལ་ཕབ་སྲོལ་ཡོད། རྒྱུན་མི་འབུམ་ཕྲག་སུམ་ཅུ་སོ་གསུམ་ཡོད། དེ་ནའང་ནང་པ་སངས་རྒྱས་པའི་ཆོས་ཞུ་པ་སྟོང་ཕྲག་བརྒྱད་ཡོད། དགེ་སློང་ཡང་རེ་རེ་ཙམ་ཡོད། ཡེ་ཤུའི་ལུགས་འཛིན་དག་རང་རིགས་ཀྱི་ཆོས་མི་བྱེད་པར་སངས་རྒྱས་ཀྱི་ལུགས་ལ་ཞུགས་ཟེར་ནས་མི་དགའ་བར་བྱེད། རྒྱ་གར་བས་ཆད་དུ་རུབ་ཀྱི་དགེ་སློང་སྟེ་རིགས་ལ་མི་དགའ་བར། སྡེ་ཚན་གཞན་དུ་བྱེད་འདུག་ཟེར། དེ་ན་མི་གཅིག་སྐྱེས་སྟོབས་ཀྱི་ཤེས་རབ་ཆེ་བས། བྷེ་ལད་ན་ཡོད་པའི་མི་དེ་ཐམས་ཅད་ཀྱི་མིང་ཤེས་ལ། དེ་རིང་མི་སུ་སྐྱེས་དང༌། དེ་རིང་མི་སུ་ཤི་ཤེས་པའི་མི་གཅིག་ཡོད། བྷེ་ལད་འོག་ཏུ་བྷཾ་གྷ་ལའི་གྲོང་ཀ་ལི་ཀ་ཏ་ལ་མི་འབུམ་ཕྲག་བཅུ་གཉིས་ཡོད་སྐད་ཀྱང༌། རྫས་སྦྱོར་བཅུད་ལེན་གྱི་མཐུ་དང༌། སྨན་མཁས་པས་དང་ཟས་སྦྱོར་སོགས་རན་ཅིང་ཚོད་འཛིན་པས་མི་ལོ་བརྒྱ་དང་ཉི་ཤུ། སུམ་ཅུ་ཐུབ་པའི་མི་རེ་རེ་ཙམ་རྒྱུན་དུ་འབྱུང་སྐད།
ད་ལྟ་མི་ལོ་བརྒྱ་དང་ཉི་ཤུ་པ་གཅིག་ཡོད། སློབ་དཔོན་སློབ་མའི་སེམས་བརྗེ་ནུས་པ་སྟེ། གྲོང་འཇུག་ཐུབ་པ་ཞིག་ཀྱང་ཡོད། དེ་ཧིནྟུ་ཀླ་ཀློ་གཉིས་དང༌། ཀླ་ཀློ་ཡེ་ཤུ་གཉིས་ལུགས་མི་འདྲ་སྟེ་ཕྱི་རོལ་པའི་ལུགས་ཡིན་ནམ། ས་ཡན་སི་སྟེ་འཕྲུལ་གྱི་རིག་གནས་ཀྱིས། ལོ་བཞི་བཅུར་ཉི་མ་ལ་བལྟས་པས་ཉི་མའི་དཀྱིལ་འཁོར་དུ་རི་ཡོད་པ་ཙམ་མཐོང་སྐད་པའི་མི་གཅིག་ཀྱང་ཡོད། རྒྱ་གར་གྱི་ནུབ་དང་ཐག་ཉེ་བ་ན་བྷོམ་བེ་ཞེས་པའི་གྲོང་ཁྱེར་ཆེན་པོ་ཡོད། འདི་ན་ཕ་ལམ་དང༌། པདྨ་ར་ག ཨིན་ཊ་སྙིལ་སོགས་རིན་པོ་ཆེ་ཆེས་མཆོག་རྣམས་ཤིན་ཏུ་མང་བར་དོན། ཡུལ་གཞན་ལས་གོང་ཡང་སླ། འདི་ན་མི་འབུམ་ཚད་བརྒྱད་ཡོད། ལ་རི་རྒྱལ་ཚ་བ་ཆེན་པོ། དབྱར་ཀ་བསིལ་བ། མེ་ཏོག་སོགས་ཤིན་ཏུ་སྤྲོ་བ་བོད་ཀྱི་ས་དང་ཉེ་བ་ལ་དབྱར་མཐོང་བྱེད་སྐད། གངས་རི་ཏེ་སེ་ནས་ཞག་བཅོ་ལྔ་ཙམ་གྱིས་སླེབས་པ། ཁུ་ནུ་དང་ཡང་ཐག་ཉེ། མངའ་རིས་དང་ཡང་ཐག་ཉེ་བ། དེ་ནི་ཤིང་མེ་ཏོག་དང་འབྲུ་སྣ་ཚོགས་པ། པ་ཀུན་ཨརྒ་དང་རྡོ་བཅལ་སོགས་ཤིན་ཏུ་སྤུས་དག་བཀོད་ལེགས་ཀྱིས་ཉམས་སྤྲོ་སྤྲོ་ལྟར་བྱས་པའི། པིལ་ཟེར་བ་ཡུལ་ལེགས་པོ་ཡོད་སྐད།
ཡང་བྷཾ་ག་ལ་པ་ཕལ་ཆེ་ད་ལྟ་དབྱར་འབྲས་ལྗོངས་རྡོ་རྗེ་གླིང་ལ་འོང་ནས་བསྡད། ནང་པ་སངས་རྒྱས་པ་ཁྱིམ་པ་མང་པོ་དང༌། རབ་ཏུ་བྱུང་བ་ཉུང་ངུ་བཅས་ཡོངས་དྲིལ་སྟོང་ཕྲག་བཅོ་ལྔ་ཙམ་ཀ་ལི་ཀ་ཏ་ན་ཡོད་སྐད། དེ་ནང་ཁྱིམ་གནས་དགེ་བསྙེན། བྷུ་རྡ་ཞེས་པ་མཁས་པ། མདོ་འཆད་པའི་དུས་སིང་ག་ལ་སོགས་ཀྱི་དགེ་སློང་གིས་ཀྱང་ཆོས་ཞུ། བྷཾ་ག་ལ་ཀ་ལི་ཀ་ཏ་བོད་པའི་མི་གཞིས་ཆགས་པའང་སྟོང་ཕྲག་ལྔ་ཙམ་ནང་པའི་དགེ་སློང་སིང་གྷ་ལར་ཐུག་པ་བཅོ་ལྔ་ཙམ་ལྷ་ཁང་ཞིག་ན་ཡོད་ཟེར།
ཀ་ལི་ཀ་ཏའི་ཐག་ཉེ་ན་ནང་པའི་དགོན་ཁག་བཅུ་གཅིག་ཙམ་ཡོད། ཨ་ཤོང་གྷ་རིའམ་ཨ་སཾ་གྱི་ཡུལ་གནས་པདྨ་བཀོད་དང་ཐག་ཉེ་ན་ནང་པ་སངས་རྒྱས་པའི་དགོན་པ་དང༌། དགེ་འདུན་རབ་ཏུ་བྱུང་པ་འགའ་ཙམ་འདུག་སྐད། ཀསྨིར་ཏེ་ནུབ་ཕྱོགས་ཁ་ཆེའི་རྒྱལ་པོ། བོད་པས་ཟིང་པ་རྒྱལ་པོར་འབོད་པ་དེ་ཡང་ཨིན་ཇི་ལ་ད་སྐབས་ངོ་ལྟ་བར་ཡིན་འདུག
ཀ་ལི་ཀ་ཏ་ན་རྒྱ་གར་བ་ཕྱི་རོལ་པའི་མེ་ལྔ་བསྟེན་པ་ཁ་ཤས་མེ་ཤིང་མ་རྙེད་ནས། ལ་རི་རྒྱལ་ཚབ་ཀྱི་སྒོ་དྲུང་དུ། ཤིང་རྟ་འཁོར་ལོ་བཟོ་བཀོད་ཅན་ཡོད་པ་བཤིགས་ནས་མེ་ལྔ་བསྟེན་པས། བཙོན་དུ་བཅུག་རྒྱུ་མཚན་དྲིས་པ་ན་མེ་ལྔ་བསྟེན་པ་གོམས་པས་མེ་མེད་ན་མི་ཚུགས་པས་ཡིན་ཞེས་ཟེར་བར། འོ་ན་ཏན་ཏན་ཡིན་ནམ་དྲིས། ཡིན་ཞེས་པ་ན། ཤིང་བསྡུས་ཏེ་མེ་ཡི་དབུས་སུ་བསྲེགས་པ་ཙམ་བྱས་ཀྱང་མ་ཚིག་སྐད། དེ་དག་ལ་གྲུབ་ཐོབ་འདྲ་བར་བརྩི་འོང་ཟེར་གཞན་ཡང་མ་ཐུབ་སྟེ། བཅོམ་བརླག་གི་སི་ཧ་ར་བན་ཅེས་པའི་ནགས་ཚལ་དུ་མུ་སྟེགས་རལ་པ་ཅན། བསམ་གཏན་སྒོམ་པ་མངོན་ཤེས་ཅུང་ཤར་བ་མང་དུ་ཡོད་སྐད།
ཇོ་ནང་རྗེ་བཙུན་པས། འཕགས་ཡུལ་དུའང་ད་ནི་དུས་དབང་གིས་ཕྱི་རོལ་པ་ལའང་བསམ་གཏན་གྲུབ་པ་མེད་གསུངས་འདུག་ན་ཡང༌། དེང་དུས་ཀྱི་གཏམ་གསར་པ་འདི་འདྲ་འདུག ཧིན་དུ་ཕྱི་རོལ་པ་ལ་མཁས་པ་གྲགས་ཆེན་དེང་དུས་ཀྱང་མང་པོ་ཡོད། རྒྱ་གར་སྤྱི་ཁྱབ་ལ་བསམ་པ་ཆེན་པོ་ཡོད་པ། མི་སྐྱ་མཁས་པ། ལ་ལོ་དོར་ཡེ་ཟེར་བ། སཾཀྲྀཏ་ཡིན་པ་མི་ཤེས་ཟེར། ཨརྻ་མུ་ནེའི་ལུགས་ཀྱི་མཁས་པ་ཡོད། ལ་ཧོར་གྱི་ཡུལ་དུ་ཆོས་ཞུ་སྟོང་ཕྲག་གསུམ་ནས་བརྒྱད་ཙམ་བར་ལ་ལོངས་ནས་ལེགས་སྦྱར་སྐད་དུ་ཆོས་བཤད། ཡེ་ཤུའི་གྲུབ་མཐའ་དགག སྔར་རྒྱ་གར་སྐྱིད་པོ་ཡིན་ཚུལ་ད་ལྟ་རྒྱ་མཚོའི་གླིང་ཕྲན་ནས་འོངས་པ་མི་ཁོང་ཚོས་རང་རེར་སྡུག་པོ་བཏང་སྟེ་མནར་སྦྱང་བྱས་ཚུལ་སོགས། སྔོན་རབས་དང་འབྲེལ་བའི་ལོ་རྒྱུས་མང་དུ་བཤད་པས། རྒྱ་གར་གྱི་མི་མང་པོས། མིག་ནས་མཆི་མ་བཏང༌། གྲོལ་ཞོར་ཕི་རིང་གི་རྫོང་དཔོན་པའི་ཁང་པའི་ཤེལ་སྒོ་ཚོར་རྡོ་གཞུས་ཏེ་བཅག་པ་སོགས་བྱུང་བས། དབྱིན་ཇིས་ཁྲིམས་ངན་ལ་སྦྱར་ན་ཁོང་གི་སློབ་མ་འབུམ་ཐེར་མང་པོ་ཡོད་པས་མ་བདེ། འོན་ཀྱང་སྦར་མའི་ཡུལ་དུ་གནས་དབྱུངས་ལོ་གཉིས་བྱས། དེ་སྐབས་ཀྱང༌། ཡེ་ཤུའི་ལུགས་འགོག་པའི་རིགས་པ་མང་པོས་བརྒྱན་པའི་བསྟན་བཅོས་ཆེན་པོ་གཅིག་བརྩམས། དབྱིན་ཇིའི་ཁྲིམས་ལུགས་ལ་མཁས་པས་དཔོན་པོ་མང་པོས་ཁྲིམས་ཀྱི་རྒྱུ་མཚན་བཤད་པ་གང་གིས་ཀྱང་ནག་འགོས་སུ་བཏུབ་པས། ཅི་བྱར་མེད་དེ། སླར་བྷ་ལད་སྟེང་འོང་དེར་དབྱིན་ཇིའི་མཁས་པ་སྟོང་ཕྲག་གཅིག་དབུས་ཞུ་བ་ཕུལ་སྟེ་ཅི་བདེར་བཏང༌།
ད་ལྟ་ཨ་མྲྀ་ཥའི་༼ཨ་མེ་རི་ཁ་ཡིན་ནམ༽ཡུལ་དུ་ཡོད་ཟེར། ཡང་ཡུལ་བྷ་ར་ན་སིའམ། ཀྭ་ཤི། ཝ་ར་ནྭ་སིར། ཤན་ཏི་ཀུ་མཱ་རི་ཤསྐྲཾ་མཻ་ཤྲི་བ་ཀུ་ཡཱ་ར་ཤཏྲཾ་རེ་ཞི་བའི་གཞོན་ནུ་བསྟན་བཅོས་མཁན་ཅེས། སྒྲ་པ་ཎི་པར་ཤིན་ཏུ་མཁས་པར་གྲགས། ལོ་བཞི་བཅུ་ཙམ། མུ་སྟེགས་ཚངས་སྤྱོད་པ་ཡིན། རྒྱ་གར་ཤར་ནུབ་ཏུ་མཁས་གྲགས་ཆེ། ཨརྻ་མུ་ནི་འདས་ནས་ལོ་སུམ་བཅུ་ཙམ་ན་བྱུང་བ་སྟེ་མིང་དངོས་སྭ་ར་སྭ་སྟི་དཱ་ཡ་ནཱི་མེ་དབྱངས་ཅན་ཐུགས་རྗེ་མཐའ་ཡས་ནི་མུ་སྟེགས་ཧིན་དུའི་ཕྱིས་བྱུང་གི་མཁས་པའི་ནང་ནས་མཆོག སྔོན་གྱི་དུས་ཀྱི་རིག་བྱེད་ཁོ་ན་ཚད་མར་འཛིན། གསར་བྱུང་མུ་སྟེགས་ཀྱི་དྲང་སྲོང་གི་ལུགས་མང་པོ་རྣམས་འགོག་པ་རིག་བྱེད་ལས་ལུང་བསྟན་པ་སོགས་ཀྱིས་སངས་རྒྱས་བཅོམ་ལྡན་འདས་ལ་དད། འོན་ཀྱང་ནང་པ་སངས་རྒྱས་པའི་བདག་མེད་ལ་སྐྲག་ནས་ཅུང་ཟད་འགོག་ཁུལ་བྱེད། ཁོ་རང་གིས་པརམརྠ། དོན་དམ་པའི་བདེན་པ། ཟིབཏམ། གང་ཟག་གི་བདག པྲཀྲིཏ། རང་བཞིན་གྱི་བདག་ཡོད་དམ་རྡུལ་ཡོད་ཅེས་ཁས་ལེན། དེ་དག་གིས། ཨལཏགྲི། སྟེ་བདག་ཡོད་པ་ཁོ་རང་ཚོའི་ལུགས་དང༌། ནལཏིག སྟེ་བདག་མེད་པ་ནང་པ་ལ་ཟེར། འོན་ཀྱང་ཕྱིས་ཡེ་ཤུའི་དང༌། མུ་སརྨར་གཉིས་ངན་ཆེ་བས། ཧིན་དུས་ནང་པ་ལ་དགའ་ཞིང་ཉེ་བོ་བྱེད་དོ། །ཧིན་དུའམ་ས་ན་རྷཱ་ན་ནི་ཕྱི་རོལ་པའི་ཕྱོགས་དེས། ནང་པ་སངས་རྒྱས་པ་ཐམས་ཅད་ལ་མགོ་རྣ་གཅིག་པ་ལྟ་བུ་ད་ལྟ་བྱེད་དོ། །
ཨརྻ་མུ་ནི་ལ་སློབ་མ་འབུམ་ཕྲག་ལྷག་ཡོད་པའི་ནང་མཆོག མུནྤུ་རཾ་དང༌། ཧནྤུ་རཾ། གཉིས་ད་ལྟ་ཡང་ཡོད། སྔ་མས་ཕ་གཞིས་དང་སྒོར་སྟོང་ཕྲག་བདུན་ཅུ་ཐོབ་རྩར་བཞག ཀ་ལི་ཀ་ཏ་ན་མི་སུམ་བརྒྱ་ཙམ་གྱི་སློབ་གྲྭ་རྒྱུན་དུ་བཙུགས། བུ་ལོ་གསུམ་བཞིར་སྨན་པ་བཙལ་ནས་བལྟས། རིགས་པ་གསལ་ན་སློབ་གྲྭར་བཙུད། སློབ་གྲྭ་མ་རྫོགས་བར་ཕ་མས་མི་འཁྲིད་རྒྱུའི་གན་རྒྱ་བླངས། ལོ་རེར་སྒོར་བརྒྱ་རེ་སྟེ། ཁྱོན་ལོ་བཅོ་ལྔ་ལ་བརྒྱ་སྒོར་བཅོ་ལྔའི་ཕོག་སྟེར། མི་ཚང་ཕྱུག་པོ་འདྲས་རང་གི་བུ་ལ་རང་གིས་ཕོགས་སྟེར། དེ་དག་གི་སྒྲིགས་ལ་འཇུག་སྲོལ་ཀྱང་འདུག་ཟེར། པ་ཎི་པ་ལོ་བཅུ་གཉིས་ཙམ་སྦྱོང་མཁན་ཡོད། སློབ་གྲྭ་དེ་ནས་དོན་ནས་ཁྱིམ་འཛིན་ཟེར། ཡི་གེ་ནི་ནཱ་ག་ར་ཡིན་སྐད། ཐམས་ཅད་དེ་ནས་ལེགས་སྦྱར་དུ་བཤད།
རྒྱ་གར་བྱང་དང་ནུབ་ནས་སེར་སྐྱ་ས། དབང་ཕྱུག་པ། གཅེར་བུ་པ་སོགས་མང་བ་ལས་ཡུལ་དབུས་ཕལ་ཆེར། ཨརྻ་མུ་ནིའི་རྗེས་སུ་འབྲང་བ་མང༌། རྒྱ་གར་ཊེ་ཟའི་རྒྱལ་པོ་སྒྲ་མ་རྒྱལ་པོ་དང༌། ཀསྨིར་སོགས་ཤར་ནུབ་ལྷོ་བྱང་གི་རང་དམག་མང་པོ་ཡོད་པའི་རྒྱལ་པོ་རེས་འགའ་ལས། མི་སྡེའི་ལག་ཏུ་མཚོན་ཆ་འཆང་མི་ཆོག་རྒྱུ་དབྱིན་ཇིའི་ཁྲིམས་ཡིན། དེ་ལྟར་ན་ཡང་ཁ་མི་འཆམ་པ་མ་གཏོགས། ཁ་འཆམ་ན་དབྱུག་པ་དང་ཁུ་ཚུར་གྱིས་ཀྱང་ཕེ་རིགས་བཏོན་ནུས། ཞེས་ཧིན་དུའི་མཁས་པ་རྣམས་ཟེར་སྐད། ད་ལྟ་རྒྱ་གར་ལྷོ་ངོས་ཀྱི་ནགས་ཚལ་ཆེན་པོ་ཞིག་གི་ས་འོག་ཏུ། ཁང་པ་བཅོས་ཏེ་དེའི་ནང་དུ་མཚོན་ཆ་ཁྱད་པར་ཅན་མང་པོ་བྱེད་དུ་འཇུག་སྟེ། མ་ཧཱ་ཤནཱའམ། གྷན་ཏི་རཱ་ཎ་ཞེས་པ་གྲུབ་ཐོབ་འདྲ་བ། མུ་སྟེགས་པའི་ཡོན་ཏན་ཆེན་པོ་ཡོད་པ། ༼བདག་ཉིད་ཆེན་པོ་གན་དི་རེད༽ད་ལོ་བོད་ལ་འོང་གྲབ་བྱེད་པ་དེ་ལ་ཁྲི་དམག་གཅིག་ཡོད། དམག་ཕོགས་ལ་སྒོར་འབུམ་ལྔ་བརྒྱ་སྟེ་རྡིལ་ཚད་འབུམ་ཐེར་གསུམ་ཙམ་ཡོད་པ། ལོ་སྔ་མ་འདིར་ཕེ་རིགས་ཀྱིས། མེ་སྒྱོགས་ཆེན་པོ་ཁོ་ལ་ཁ་གཏད་དེ་བརྒྱབ་ཀྱང་ཁོ་ཡི་ལུས་ཀྱང་གཏོར་མ་ནུས། དེས་རྒྱ་གར་ཤར་ནུབ་ཀུན་བསྡུས་ཏེ། དབྱིན་ཇི་མཐར་བསྐྲད་གཏོང་འདོད་དེ་ཞི་བའི་ཐབས་ཀྱིས་འདོན་པ་འམ། དྲག་པོའི་ཐབས་གང་རུང་གིས་འདོན་དགོས་ཟེར་ཡོད་སྐད།
ཧིན་དུའི་སྡེ་ཚན་ཆེ་བས། ལོ་རེར་སྐྱེ་དམན་རབ་ཏུ་བྱུང་བ་འབུམ་ཕྲག་གཅིག་ཡོད་སོང༌། ཟེར་བ་སོགས་ཀྱི་གཏམ་འདུག་སྐད། མ་གྷ་རྡ་ན། ས་བདག་བྱེ་བྲག་པ་ཇོ་ཧོ་ཀི་རཱ་ཛ་ཞེས་པའི་རྒྱལ་པོ་དེའང་མུ་སྟེགས་ལུགས་ཡིན། སིང་གྷ་ལ་སོགས་ནས་ནང་པ་འདྲས་རྡོ་རྗེ་གདན་གྱི་ས་དེ་ཉོས་ནས་ཕྱིར་བླངས་ཏེ། ཡུལ་དབུས་མ་གྷ་དྷར་ནང་པར་འཛུགས་དགོས་ཟེར་གི་ཡོད་པའི་སྐབས་ཡིན་སྐད། ༼འདི་ནི་སིང་ག་ལའི་དགེ་བསྙེན་དྷརྨ་པཱ་ལའི་སྐོར་ཡིན་སྙམ སྒྲིག་མཁན་གྱི་མཆན།༽ཡུལ་དབུས་སུ་ནང་པའི་དགེ་སློང་མེད། རྡོ་རྗེ་གདན་དུ་འགུར་ལོག་བླ་མ་དང་སོག་པོ་དགེ་སློང་ད་ལྟ་བོད་པ་རེ་ཟུང༌། བྷུ་མ་དང༌། སིང་གྷ་ལ་པ། དགེ་སློང་རྣམས་ལ་ཡུལ་དེའི་སྦྱིན་བདག་གིས། ཟས་གོས། གྲུ་གླ་སོགས་མཐུན་རྐྱེན་སྦྱར་ནས་བྱོན་པ་མང་དུ་འོང༌། ཀ་ལི་ཀ་ཏ་ན། ནང་པ་སངས་རྒྱས་པའི་བཀའ་བསྟན་འགྱུར་ཐུབ་དབང་ལི་སྐུ་སོགས་ཐོག་སླེབ། མི་ཡི་ལུས་ཚད། གཡང་ཀྲི་ལས་བྱས་པ། རྡོ་ཀ་མ་རུ་པ་ལས་བྱས་པ། ཙན་དན་ལས་བརྐོས་པ་སོགས་མང༌། དགྲ་བཅོམ་པ་མང་པོའི་སྐུ་རྡོ་དཀར་ལས་བྱས་པ། ཝ་ར་ན་སིའི་སེར་སྐྱའི་གྲོང་སོགས་ས་འོག་ནས་དོན་པ་དང༌།
བོད་ཀྱིས་བླ་གཞུང་གིས་བྱིན་པ་དང༌། དར་མདོ་ནས་ཉོས་པ་ཐང་ཀ་སོགས་ལྷ་རྟེན་མང་པོ་ཡོད། ཕེ་རིགས་གཞུང་རྐྱང་གིས། མཚར་འདོད་དང༌། ཤེས་འདོད་ཀྱིས་རིགས་འདྲ་བསྡུ་འདོད། དེ་ན་ཡོད་པའི་ནང་པའི་མི་མང་པོས་མཆོད་ཡུལ་དུ་ཡང་བྱེད། དབྱིན་ཇི་འདི་རྒྱལ་ཁབ་ཆེ་བ་དང༌། ཁྲིམས་ཡིག་ལེགས་པར་ཡོད་པ་དང༌། རྒྱ་གར་གྱི་སྲོལ་བཟང་པོ་བཅོས་པ་དང༌། དཔོན་པོ་ཐམས་ཅད་ཡོན་ཏན་སློབ་སྦྱོང་མཐར་ཕྱིན་པའི་མཁས་པ་ཡིན་པ་དང༌། རྒྱ་གར་དང་གྱོད་ཚང་དོན་གྱི་ནང་དུ་ཐེབ་པའི་རྒྱུ་མཚན་ལས། འཕྲལ་གྱི་ཁྲིམས་ཤིན་ཏུ་དྲང་པོ་ལྟ་བུ་ཡོད་ཀྱང༌། ཕུགས་གཡོ་སྒྱུ་ཆེ། ཕ་རོལ་གནོད་པ་ཁོ་ནས་གཞན་གྱི་དཔལ་འབྱོར་ལ་བརྔམ་པ། དཔལ་འབྱོར་ཇི་ཙམ་ཡོད་ཀྱང་ཆོག་ཤེས་གཏན་ནས་མི་ཤེས་པ་ཡིན་པས། རྒྱ་གར་བས་མི་དགའ་བས། སྡེ་དང་དཔོན་ཡིན་ཀྱང་རིགས་མི་བསླད་དེ་གཉེན་ཉེ་དུ་བྱེད་སྲོལ་གཏན་ནས་མེད་པ་དང༌། དཔོན་པོ་སོ་ཡབ་ཞིག་ཡིན་རུང༌། བཙོག་པར་བརྩིས་ཏེ། རྒྱ་གར་དངོས་གཞིའི་ཁང་པའི་ནང་དུ་གཏན་ནས་འོང་འཇུག་སྲོལ་མེད་པས། དཔོན་པོ་ཁོ་རང་ཚོ་ཡང༌། ཁང་པའི་སྒོར་སྡོད་འོང༌།
བོད་པ་འདྲ་བ་ཕེ་རེང་ལ་དགའ་བོ་བྱས་ན། རྒྱ་གར་བས་བྲམ་ཟེ་རྒྱལ་རིགས་རྗེའུ་རིགས་རྣམས་ནི་དེ་ལ་སྙིང་ན་བ་དང་མི་དགའ་བ་ཆེར་མེད་པ་ལྟ་བུ་བྱེད་འོང༌། ཕུགས་རང་འདོད་ཆེ་བས། རིགས་གཅིག་ཡིན་ཀྱང་ཛྙར་མིན་༼འཇར་མན༽སོགས་རྒྱལ་ཁག་གཞན་དང་ཡང་མི་མཐུན་སྐད། བོད་ཁྲུས་གཙང་སྦྲ་ཆེར་བྱེད་པ་དང༌། བ་གླང་དང་མཛོ་གཡག་སོགས་ཀྱི་ཤ་ཟོས་ན་ལེགས་པོ་བྱེད། ལུག་ཤ་ཟོས་ན་སྐྱོན་དུ་མི་བརྩི་གཞན་བ་གླང་གི་ཤ་སོགས་ཟོས་ན། བཙོག་བལྟས་ནས་ནང་དུ་འོང་མི་འཇུག རྒྱ་གར་བའི་མི་ཡ་རབ་རྣམས་དེ་ལྟར་ཚུགས་ཐུབ་ཀྱི་རྒྱུས་ཆེན་པོ་ཡོད་ཅིང༌། མ་རབ་འགའ་ཕེ་རིང་ནས་ལས་ཀ་འདྲ་བྱེད་ངོ་སྲུང་གཅམ་བུ་བྱེད་པ་ཡོད་ཀྱང༌། དེ་དག་གི་འང་རིགས་བསླད་སྲོལ་ནི་མེད། རྒྱ་གར་བས་བོད་པ་ལ་རྒྱུ་མཚན་དེ་སྐོར་ཞིབ་ཏུ་ཟེར་འདོད་ཡོད་ཀྱང༌། ཕེ་རོང་གི་དོགས་པས། རྒྱ་གར་བའི་མཁས་པ་བོད་དུ་འགྲོ་བ་སྔར་བཀག་པར་བྱས་སྐད།
བོད་ཀྱི་བཀའ་བསྟན་འགྱུར་གྱི་ཡི་གེ་ནི། དབྱིན་ཇི་མ་ཟད། རི་པིང༌།༼འཇར་པན༽ ཛྙར་མིན་༼འཇར་མན༽སོགས་མཐའ་མིའྀ་རྒྱལ་ཁག་ཕལ་མོ་ཆེར་ཡོད་པར་གྲགས། ཀུན་སློང་སྐྱོན་ཅན་ཕལ་ཆེར་མཚར་འདོད་ཀྱིས་ཡིན་པ་ལ། དད་པ་སྐྱེ་བ་རང་གིས་བཀག འོན་ཀྱང་དེ་དག་ལ་སྔར་མུ་སྟེགས་ཀྱི་སྟོན་པ་ལྟར་རིགས་པས་དཔྱད་པ་ནི་མི་འོང་འདྲ་བས་རིགས་ལམ་གྱི་འཇིགས་མི་དགོས་པ་གདའ། ཀ་ལི་ཀ་ཏ་ནས། གྲུ་རྫིང་ཆུ་སྒར་འདྲིལ་ལམ། འཁོར་ལོས་སིང་གྷ་ལར་ཉིན་གཅིག་གིས་སླེབ། སྦར་མ་ན་ཉིན་གཉིས་ཀྱིས་སླེབ་སྐད། དབུས་རྡོ་རྗེ་གདན་དུ་ཤིང་རྟ་རིལ་བུ་སྒར་འདྲིལ། མེ་ཆུ་ཁ་འཐབ་ཀྱིས་ཉིན་ཞག་གཅིག་གིས་སླེབ་སོང༌།
རྒྱ་གར་ཤར་བྷཾ་ག་ལར། བྱང་ཤར་བྷྲ་མ། ལྷོར་ཛ་གར་ནཱ་ཐ། ནུབ་ན་ཛ་ལན་ད་ར་ལ་ད་ལྟ་གཞའ་ལན་རྡ་ར་ལྟ་བུ་ཟེར། དེ་ནས་བྲཻ་ལཽར་པུ་རི། ནུབ་བྱང་ཟ་ཧོར་ནས་ཨ་མྲི་པུ། ར་བ་པུ། བྱང་ན་ཀུ་ཤུ་ནཱ་ག་ར་སྟེ་གྱད་ཡུལ་རྩྭ་མཆོག་གྲོང་དང་ཤིང་གི་རི་སོགས་ཡོད། ཀ་ལི་ཀ་ཏ་ནས་ཤིང་སྒར་རྒྱུག་གིས་ཉིན་ཞག་བཞི་ལ་ལྷོ་ཇ་གརཱ་ན་ཐར་སླེབ། བོད་ཀྱི་གངས་རིའི་ལྷོ་ངོས་སུ་ཁུ་ནུ་ཡོད། སྟོད་བོད་ལ་ཤས། སྨད་རྒྱ་ལ་ཤས། ལྷོ་འབྲུག་འབྲས་ལྗོངས་སོགས་དབྱིབས་འདྲ། ཁུ་ནུ་ནས་ཞག་གཅིག་གིས་ཀུ་ལུ་ཏར་ཕྱིན། མངའ་རིའི་གར་ཤའི་ལྷོ་ནས་ལ་ཆེན་པོ་ར་གོང་ཟེར་བ་བརྒྱབ་པས་ཀུ་ལུ་ཏར་སླེབ། དེ་ནས་ནུབ་ཏུ་མ་རུ་དོང་སོང་མཎྚི་ཟེར། གངས་རིའི་ནུབ་ནས་ཁ་ནུབ་བསྟན་དེ་ནས་ལྷོར་བལྟས་གངྒཱའི་ཆུ་མགོ་གཅིག ས་ཛ་བྷ་ཞེས་རྒྱ་གར་ནུབ་བྱང་ནས་ཆུ་རྔ་དོན་པ་རྣམས་ཀྱི་ཆུ་གཅིག་ཏུ་དྲིལ་བ་ལ་གངྒཱ། དེ་འང་ནུབ་ནས་ཤར་དང༌། ནུབ་ནས་ལྷོར་བབས་པས་ཡ་མུ་ན་གཉིས་སུ་གྱེས་པ་ཡིན་སྐད།
ཆུ་ཆེན་པོ་དོང་གཅིག་ཏུ་འདུས། ཐང་ཤིན་ཏུ་བདེ་བ་ནས་བར་དུ་གཉིས་སུ་གྱེས་པ་གཅིག་ཤར། གཅིག་ལྷོར་འགྲོ། ཆུ་ལྔ་པོ་དེའི་མགོ་ངོས། ཁ་ཆེ། བྲཻ་ལོད་པུ་རི་སྟེ་ཐོ་གར་གྱི་ཡུལ་དང་ཉེ་བ་རྣམས་ཡོད། བྲཻ་ལོད་པུ་ཏིར་ཐེག་ཆེན་སྤྱོད་འཇུག་བཤད། སྔགས་དང་མ་ཧཱ་པན་རྡི་སྟེ་རྫོགས་ཆེན་ཡང་དར་ཅེས་ཟེར་མཁན་ཡོད།
རྒྱ་གར་པ་ཛབ་ཀྱི་བླ་མ་ཞིག་གིས་ཟེར། ཁུ་ནུ་དང༌། གརྴ་ན་ངོར་དང་རྙིང་མ་བཀའ་བརྒྱུད་འབྲུག་པ་ཡོད། རྙིང་མ་པད་གླིང་ལུགས་དང༌། འོན་ཀྱང་དགེ་རྙིང་བཀའ་གསུམ་ཕལ་ཆེ་སེར་ཁྱིམ། ཡང་ཁུ་ནུ་ནས་ཉིན་བཅུས་མཚོ་པདྨ་ལ་སླེབ། ཡུལ་འདིར་སློབ་དཔོན་པདྨའི་སྒྲུབ་གནས་ཀྱང་ཡོད། ཟ་ཧོར་ན་མཚོ་པདྨ་ནི་སློབ་དཔོན་རིན་པོ་ཆེ་གསོན་བསྲེགས་བྱས་པའི་མེ་དཔུང་མཚོར་བསྒྱུར་པའི་རྫུ་འཕྲུལ་བསྟན་ས་དེར། མངའ་རིས་རྒྱ་གར་ཁམས་པ་རྡོ་བརྐོས་སྒར་བ་ལྟ་བུ་དབྱར་མངའ་རིས་སུ་སོང༌། དགུན་མཚོ་པདྨར་འགྲོ་བ། ད་ལྟ་འཇོང་ཡུལ་སྤྲོང་ལོང་སྒར་ཞེས་དབྱར་འཇང་པ་ཡོང༌། དགུན་དཱ་ལའམ། བྱ་རྐང༌། ཨ་བ་ཤི་ཥ་ལ་འགྲོ་མཁན་དེ་ཚོ་དབྱིབས་འདྲ་བ་རྒྱ་མ་བོད་མང་པོ་ཡོད། དེ་ཚོས་རྙིང་མ་མང་དུ་བསྟེན།
ཡུལ་དེའི་རྒྱལ་པོ་ནི་ཧིན་དུའི་ལུགས་འཛིན་ཡིན། ཡུལ་དེའི་གྲོང་གི་མཆོག་ཨ་མྲྀ་པ་འམ། ཨ་འབག་དུ་ཟེར་བ་དེར་འབྱོར་བ་ཆེན་པོ། ལྷ་ཁང་ཞིག་ཏུ། ཨོ་རྒྱན་པདྨའི་བཞུགས་ཁྲི་ཟེར་བ་ཡོད། བརྟགས་ན་ཨོ་རྒྱན་སྤྲུལ་པ། གུ་རུ་ཎ་ནའི་རེད་ཟེར། ༼དགེ་ཆོས་ཀྱིས་གཏམ་རྒྱུད་གསེར་ཐང་དུ་གསུངས་པའི་གུ་རུ་ན་ནག་ཟེར་བ་དེང་སྐབས་ཀྱི་པན་འཇབ་མི་རིགས་རྒྱ་བོ་ཚོའི་སྟོན་པ་དེའོ།།སྒྲིག་མཁན་གྱི་མཆན།༽བོད་ནས་འདི་ནི་ཨོ་རྒྱན་རིན་པོ་ཆེའི་ཡིན་པར་འཁྲུལ། ཕུགས་ཨོ་རྒྱན་པདྨའི་སྤྲུལ་པ་ཡིན་ནའང་ཅི་ཤེས་མ་གཏོགས། དངོས་གནས་ལ། ལོ་༦༠༠ཙམ་གྱི་སྔོན་དུ་སོང་བའི་མུ་སྟེགས་པའི་སྟོན་པ་ཞིག་ཡིན་སྐད།
ད་ལྟ་དེའི་ལུགས་འཛིན་ཤིན་ཏུ་མང༌། སྐྲ་མི་བྲེགས་རལ་པ་ཅན། ཁ་སྤུ་མི་བྲེགས་རྒྱ་བོ། མགོ་ལ་མཚོན་ཆའི་འཁོར་ལོ་སྐྲ་ནང་དུ་བསྡུས་ནས་འཆང༌། དེ་འཕངས་ན་མི་གསོད་ཐུབ། དེ་མཚོན་ཆ་ཡིན་པས་འཆང་མི་ཆོག་ཅེས་དབྱིན་ཇིས་ཁྲིམས་བྱས་ཀྱང་ཁར་མི་ཉན་སྐད། འདི་ཚོ་ལ་ཚོགས་འཁོར་དང་ཆ་འདྲ་བ་ཞིག་སྣང༌། ཡུལ་འདི་ན་དེང་སང་བལ་བོའི་རོལ་མོ་རྒྱ་མདུད་མ་འདྲ་བ་ཤིན་ཏུ་རྙིང་པ་ཆེན་པོ་དངུལ་ཏོ་ལའི་སྟེང་དོང་ཙེ་བརྒྱ་རེ་ཙམ་སྤྲད་པས་མདོ་ཁམས་སུ་རྡིལ་ཚད་གཉིས་གསུམ་རེ་རི་བར་བྱེད་པའི་རོལ་མོ་དེ་འདྲ་གཙང་རྒྱལ་རྩེ་ནས་གཅིག་མཐོང༌།
༈ བྷར་མའི་ཡུལ་ན། ད་ལྟ་རྒྱལ་པོ་ཆེན་པོ། གསེར་གྱི་གོས་དང་ཅོད་པན་ཅན་ཡོད། བྷར་མའི་ཡུལ་འདི་ལོངས་སྤྱོད་ཆེ། མེ་སྦྲུལ་ལོར། དབྱིན་ཇིས་འཛམ་གླིང་གི་དབུས་ཀྱི་རྒྱ་གར་གཙུག་ལག་རྙིང་པ་དང་རྒྱལ་པོའི་ཕོ་བྲང་རྙིང་པ་རྣམས་ནས་ནོར་བུ་རིན་ཐང་མེད་པ་འདྲ་ཁ་ཤས་དོན་པའི་རེ་བས་ས་བསྔོགས་པས། སེར་སྐྱའི་ཕོ་བྲང་ནས་ནོར་བུ་རིན་པོ་ཆེ་འགའ་དོན། རྡོ་རྗེ་གདན་གྱི་ཉེ་ངོས་ནས་ཀྱང་དོན། སེར་སྐྱའི་གནས་ཤིག་ཏུ་ས་བརྐོས་པས་ལྕགས་ཀྱི་འཁོར་ལོ་འཁོར་བ་མཐོང༌། ཆུའི་རྒྱུན་བཅད། དེའི་འོག་ནས་རིང་བསྲེལ་ཤེལ་བུམ་གང་བ་ལོན། དེ་ལ་ཁ་ཡིག་ཟངས་དང༌། གསེར་གྱི་གླེགས་བུར་ཡོད་པ་རྙེད། དེ་ད་ལྟ་བྷར་མའི་རྒྱལ་པོས་དངུལ་དོང་ཙེ་ཏོ་ལ་འབུམ་ཁ་ཤས་ཀྱིས་བླུས་ཏེ། བྷར་མར་ཁྱེར་ནས་མཆོད་རྟེན་བཞེངས། ལྷ་ཁང་ཁྱད་དུ་འཕགས་པ་ངོ་མཚར་བ་འདུག་པ་དེར་མཆོད་པ་སྣ་ཚོགས་ཕུལ་ཟེར། བྷར་མ་ན་དགེ་སློང་ཁྲི་ཚོ་ལྔ་ཡོད་སྐད། དེ་ཐམས་ཅད་ཀྱིས་སྡེ་སྣོད་རིན་པོ་ཆེ་ཐམས་ཅད་པུ་ཏི་ཀཿཉི་ཤུ་རྩ་གཅིག་ཏུ་བསྡུས། དེའང་དུས་ཐ་མའི་མི་ལ་འཆད་ཉན་དཀའ་བས་པོད་བདུན་དང༌། དེའང་གསུམ་ལ་བསྡུས་ནས་འཆད་ཉན་བྱེད་ཟེར།
བྷར་མ་རྒྱལ་པོས་བྱང་ཆུབ་ཤིང་ལའང་གསེར་ཤིན་ཏུ་འཐུག་པོ་བྱུགས་གདའ་ཟེར། སིང་གྷ་ལ་ཡི་ཡུལ་དུ་ཁྱིམ་པ་ཐམས་ཅད་ནང་པ་སངས་རྒྱས་པ་ལ་མཆོད་པའི་དགེ་བསྙེན་ཕོ་མོ་ཤ་སྟག་ལ་མུ་ཏིག་དང་གླང་པོ་ཆེ་སོགས་འབྱོར་བ་ཆེ། གནས་དེར་དགེ་སློང་ཁྲི་ཚོ་གསུམ་ཙམ་ཡོད། ཁྲིམས་དག་གཙོ་བོར་ཐེག་དམན་ཉན་ཐོས་སྡེ་པ་ཡིན། ཡུལ་དེའི་དགེ་བསྙེན་ཁྱིམ་གནས་དྷརྨ་པ་ལ་༼རྒྱ་གར་གཞུང་ལ་རྡོ་རྗེ་གདན་དང་ཝ་ར་ཎ་སིའི་ཆེད་དུ་རྩོད་པ་རྒྱག་མཁན་གྱི་དགེ་བསྙེན་མཛད་པ་རླབས་ཆེན་དེ་ཡིན་ནམ སྒྲིག་མཁན་གྱི་མཆན། ༽ཞེས་པའི་བསྟན་བཅོས་སུ་སྟོང་ཉིད་གཞི་སྦྱོར་བཀོད་འདུག བཤད་པ་ལ་དཔག་ན་ཐེག་ཆེན་ཀྱང་ཡོད་དམ། གླིང་དེར་དེ་བཞིན་གཤེགས་པའི་ཚེམས་མཆེ་བ་བཞུགས་པའི་མཆོད་རྟེན་དེར་དུས་བཟང་ལ་འོད་ཟེར་འཕྲོ་བ་ཡོད། དེ་སོགས་རྟེན་ཁྱད་པར་ཅན་མང༌། སིང་ག་ལ་ནས་རྒྱ་མཚོ་ནས་ཕར་ལངྐ་དང་སྤྲེའུ་འཐབ་པའི་ཡུལ། རྒྱ་མཚོའི་འགྲམ་རྒྱུད་དུ་རྡོ་ཟམ་དམར་པོ་ཡོད། སིང་ག་ལའི་ཡུལ་དེར་བསྟན་པ་ལ་དད་པ་ཆེ། དགེ་སློང་ཐམས་ཅད་ལ་འཚོ་བ་བསོད་སྙོམས་ཉིན་བཞིན་ཕུལ། དགེ་སློང་སྟོང་ཕྲག་དྲུག་གདུགས་ཚོད་ལ་དྲངས་ཏེ། ཟས་ཕུལ། ཆོས་གོས་རྣམ་སྦྱར་གྱི་རྒྱུ་རས་ཟོང་རྒྱ་ནག་གོས་ཆེན་དང་གོང་འདྲ་བ་འབུལ་ནུས་པའི་ཁྱིམ་བདག་སྟོབས་ཆེན་ད་དུང་ཡོད་འོང་སྐད།
སིང་ག་ལའི་ཁྱིམ་གནས་ཀྱི་དགེ་བསྙེན་དྷརྨ་པ་ལ་ཞེས་བྱ་བ་ཤིན་ཏུ་མཁས་པ་ཞིག་ཡོད། དེས་རྡོ་རྗེ་གདན་དུ་མགྲོན་ཁང་བཞེངས། མགྲོན་ཚུགས་བཙུགས། ཝ་ར་ནཱ་སིར་མི་སུམ་ཅུ་ཙམ་སྟོན་པའི་རྣམ་ཐར་དང༌། མཛད་པ་སྐྱེས་རབས་སོགས་འཆད་པ་རིག་གནས་སོགས་སློབ་གྲྭ་ཤིན་ཏུ་ལེགས་པ་བཙུགས། འདིས་འཛམ་གླིང་མཐའ་ཡི་གླིང་ཕྲན་ཕལ་ཆེར་དུ་བྱོན། ཨ་མྲྀ་ཥ༼ཨ་རི༽ ཛྙར་མིན།༼འཇར་མན༽ ཕ་རན་སི། སར་སྦི་ཡ། ཧོ་ལན། རྡར་རྩིས། བྷེལ་འཇམ། ཨོ་ཌོ་སོགས། རྒྱ་མཚོའི་གླིང་བར་མང་པོར་སངས་རྒྱས་པའི་དགོན་སྡེ་མང་དུ་བཙུགས། དགུང་ལོ་ལྔ་བཅུར་ཉེ་བ་ད་ལྟ་སིང་ག་ལར་བཞུགས་སམ་སྙམ།
ལར་རྒྱལ་བའི་ཕྲིན་ལས་ནི་བསམ་གྱིས་མི་ཁྱབ་པའི་ཕྱིར་ཀླ་ཀློའི་ཡུལ་དུ་ནི་ཀླ་ཀློའི་སྐད་ཀྱིས་སོ་ཞེས། ཐེག་པ་གསུམ་བྲི་བར་དྲི་མེད་འོད་ལས་ཀྱང་གསུངས། འདི་དག་ཀླ་ཀློ་ཡིན་ཡང་ནང་པ་སངས་རྒྱས་པ་ལ་དད་པ་ཐོབ་པའང་རེ་རེ་ཙམ་འབྱུང་བས་ན་མི་ཁམས་ཀླ་ཀློའི་ཁྲོད་ནས། ཁམས་པ་རེ་ཟུང་སྲིད་པ་དང༌། རང་རེ་ཆོས་དར་བའི་སར་སྐྱེས་པ་རྣམས་ཀྱང༌། ཁམས་པའི་ནང་ནས་མི་ཁམས་པ་བསྒྲུབས་ཏེ་མི་ལུས་ཙམ་པོ་བ་བྱས་ནས། བྱུར་པོ་ཆེ་བྱེད་པ་ནི། ཡ་ང་ལ་ཡི་མུག་གོ།
ཡང༌། ཛྙཱར་མན་ནས་སྐུ་འཁྲུངས་པའི་དགེ་སློང་ཛྙཱ་ན་ཏི་ཀ་སྟེ། ཡེ་ཤེས་ཐིག་ལེ་ཞེས་བྱ་བ་བཙུན་ཅིང་མཁས་པ་ཞིག་ཀྱང་ད་ལྟ་ཡོད། ༼འདི་ཡང་གཏམ་རྒྱུད་གསེར་ཐང་དུ་བྱུང༌། སྒྲིག་མཁན༽དེའི་བསྙེན་པར་རྫོགས་པའི་ཡུལ་ནི་སིང་ག་ལ་ནས་ཡིན། དེས་ཕ་རན་ས་དང༌། དབྱིན་ཇིའི་བྷེ་ལད་སྟིང༌། སར་ཞིས་ལ་སོགས་པ་མཐའ་མི་མང་པོ་བསྙེན་པར་རྫོགས། མ་བྷ་རྡཱ་འོང་ཝོར་གཅིག་ལ་དབྱིན་ཇི་བཅུ་དྲུག་ཙམ་རབ་ཏུ་བྱུང་སོང་ཟེར། ལར་ནི་སྐྲ་སེར་ལ་སོགས་པ། མཛེས་པའི་བར་ཆད་དུ་འགྲོ་འམ་སྙམ་སྟེ། ཉན་ཐོས་སྡེ་པ་གཞན་གྱི་གཞུང་ལ་བསྟན་པ་ཡིན་ནམ་མ་འཚལ། ཛྙཱར་མིན་ཕྱུག་པོ་ཞིག་གིས། སིང་ག་ལར་ཐག་ཉེ་བའི་གླིང་ཕྲན་ཞིག་ལ་སྒོར་འབུམ་བྱིན་ཏེ་ཉོས་ནས་དགེ་སློང་དེར་ཕུལ། དེ་ཡི་ཡུལ་དུ་དགེ་སློང་མང་པོ་ཚུགས་སྐད།
༈ ཡང་སིང་ག་ལ་དང་ཐག་ཉེ་བར། སི་ཡམ་ཞེས་བྱ་བའི་ཡུལ་དུ་ནང་པ་སངས་རྒྱས་པའི་དགེ་འདུན་རབ་བྱུང་དགེ་སློང་ཤས་ཆེ་བ་སྟོང་ཕྲག་གསུམ་ཙམ་ཡོད་པའི། སྟོང་ཕྲག་བཅུ་གཉིས་ལ་རྒྱལ་པོས་བླ་ནས་འཚོ་བ་སྦྱར། ཅེས་ཀྱང་ངོ༌། །རི་པིན་གྱི་ཡུལ་ན་དགེ་སློང་སྟོང་ཕྲག་བདུན་ཅུ་དོན་ལྔ་ཡོད་ཟེར། འདི་ཚོ་རྒྱ་གར་གྱི་བབ་ཀྱི་ཡི་གེར་བྲིས་འདུག་ཟེར། རི་པིན་གྱི་གྲྭ་པ་གཅིག་ད་ལྟ་སེ་རར་འདུག་ཟེར། རི་པིན་ན་ཁྲིམས་ཡུལ་ལུགས་ཀྱིས་ཅུང་ལྷོད་པ་རེད་ཟེར་མཁན་ཡོད་ཀྱང་ཁྲིམས་དག་པོ་མང་བ་ཙམ་ཡོད་འདྲ་ལ། དེའི་བསྙེན་རྫོགས་ཀྱི་རྒྱུན་སོགས་རྒྱ་ནག་ནས་དེར་སོང་བ། ཡུལ་དེར་ཐེག་ཆེན་ཕ་རོལ་ཏུ་ཕྱིན་པ་མང་དུ་དར། དེའི་དགེ་་་་་་༼མ་དཔེར་དགེ་སློང་དང་དགེ་ཚུལ་དགེ་བསྙེན་གང་ཡིན་མི་འདུག ཞྭ་སྒབ་པའི་་་སྲིད་དོན་རྒྱལ་རབས་་་ནང་འཇར་པན་པ་ཞིག་གིས་བོད་ནས་རྒྱལ་དབང་བཅུ་གསུམ་པར་ཞུས་ཏེ་བཀའ་བསྟན་གདན་དྲངས་ཚུལ་ཞིག་ཡོད་པ་དྲན་པས། ཕལ་ཆེར་མི་དེ་ཡིན་ནམ་སྙམ། སྒྲིག་མཁན་གྱི་མཆན།༽ཀོའུ་ཇི་ཞེས་པ། སཾ་སྐྲྀ་ཏ་བསླབས་ནས་རྒྱ་གར་དུ་ལོ་བརྒྱད་བཞུགས། ཀ་ལི་ཀ་ཏ་ནས། རྒྱ་དཔེ་ཡིག་རྐང་མང་པོ་བསྣམས་སོང༌། ཁྱད་པར་དཔེ་རྙིང་གནད་ཆེན་བལ་ཡུལ་ནས་མང་པོ་བསྣམས། བོད་དུའང་གཞུང་སའི་ཕྱག་ནས་བཀའ་འགྱུར་ཞུས། རི་པིན་ལ་ཕེབ་སོང་ནས་འདས་ཚར་སྐད།
ཡུལ་འདིར་འོད་དཔག་མེད་མང་པོ་བཞེངས་པས། ཆེ་བ་ཁྲོ་ལས་རི་ཆུང་ཙམ། ཆུང་བ་གསེར་དངུལ་ས་ལེ་སྦྲམ་གསེར་ཞག་ཉི་ལེ་བའི་ལི་དམར་ལས་བྱུགས་པ། ཙན་དན་ལ་བརྐོས་པ། བ་སོ་ལ་གནས་བརྟན་བཅུ་དྲུག་བྲག་རི་མ། གཡང་ཊིའུ་རྡོ་ལས་བྱས་པ། སྒོར་སྟོང་རི་བའི་གནས་བརྟན་བྲག་རི་མ། གོས་ཆེན་དཀོར་ཀེ་དྲས་ཏེ་ཐང་ཀ་བྲིས་པ་དང༌། འཐགས་ཐང༌། དཀར་ཡོལ་ལས་བྱུང་པའི་ཉེ་སྲས་མཛེས་སྡུག་མཚུངས་པ་མེད་པ་སོགས་བཟོ། ལྷ་ཡི་བྲིས་ཚུགས་བཟོ་གཉིས་ལེགས་པའི་ཕུལ་དུ་སྣང། ༼རྩེ་ཁྲུ་ག་ལྟ་་་་་མ་དཔེར་འདི་འདྲ་ཞིག་འདུག་ལ་ནང་དོན་མ་གོ༽དཀར་ཡོལ་གྱི་སྤྱན་རས་གཟིགས་ཕྱག་གཡོན་ཡི་དྭགས་ལ་འོ་རྒྱུན་བུམ་པ་ནས་འབེབས་པ། འོ་རྒྱུན་མུ་ཏིག་གི་ཕྲེང་བ་ཅན་བྲག་རིའི་ཐོག་བཞུགས་པ་ཤིན་ཏུ་ལེགས་པ། འབྲས་ལྗོངས་སྲིད་སྤྲུལ་བཅའ་ཀ་སྒོར་བཞི་བརྒྱ་རི་བ་ངེད་ནས་གཙང་རྒྱལ་རྩེའི་འཕྲེང་རིང་གཞིས་ཀའི་སྤྲོ་ཁང་དུ་མཐོང༌།
རྒྱ་ནག་ཏཱ་མིང་གི་བཟོ་དང་འདྲ་བ་ལས་ཀྱང་ཅུང་ལེགས་ཚད་དུ་འདུག རི་པིན་ནི་མི་ཕུགས་རྒྱ་ནག་ལུགས། ཕེ་རིང་དབྱིན་ཇི་ལ་ཁ་མཐུན། ཚ་དྲོད་སྙོམས་བཅའ་ཀ་སྤུས་དག འཕྲུལ་དང་དམག་གཞན་གྱིས་ཡེ་མི་དོ་ཟེར། དབུས་གངས་རི་ཅན་ཡུལ་སྐྱིད།
༈ རྒྱ་གར་ལྷོ་ངོས་གླིང་ཕྲན་ལྟ་བུ་ཛྙཱར་མིན་ལུང་པའང་སྟོད་གངས་རི་ཅན། སྨད་དབྱར་དགུན་གྱི་ཁྱད་ཆེར་མི་འོང༌། ཡུལ་སྐྱིད་ཤོས་ཤིག་ཏུ་རྩི། ཀརྤུལ་ལམ་ནག་ཀ་བིམ་གྱི་ལུང་པའི་མགོ་གངས། སྨད་མེ་ཏོག་དང༌། ཤིང་ཏོག་རྣམ་པ་སྣ་ཚོགས་ཅན་ཡོད། ཀ་བིམ་གྱི་བྱང་རྒྱབ་ཨོ་རྒྱན་གྱི་ཡུལ། རགས་པ་ཙམ་ཀུ་ལུ་ཏཱ་ཨོ་རྒྱན་གྱི་སྐོར་ཨོ་རྒྱན་པའི་ལམ་ཡིག་ཏུའང་སྣང༌། དེའི་ནུབ་བྱང་ངོས་སུ། ཕེ་རེང་པ་ཡི་གྲོང༌། དེའི་ཚུར་ཏཱ་ཟིག་གམ་སྟག་གཟིག་ཀླ་ཀློའི་ཡུལ། མོ་ཏཱ་ནལ་དང༌། མ་ཁའི་མཆོད་ཁང་སོགས་ཏརྐི་དང་ཏུརྐི་དང་ཐུ་རུ་ཀ་སྟེ་ཏུ་རུ་ཀ་རྣམས་མིང་གི་རྣམ་གྲངས། དེ་ནས་ཚུར་སྟོད་ཧོར་ལ་མིང་རུམ་པ་ཅ་ཟེར། ཁ་ཆེ་ལ་ཀ་སྨིར་ཟེར། བྱང་ཤར་དུ་མགོ་དཀར་དང༌། ཨོ་རོ་སུ། དེ་ནས་པ་རྦིས་པ། མོན་ཊམ་ཀི་གུ་རོ། འདི་རྒྱ་ནག་གི་བྱང་ཤར། དེ་ནས་རི་པིན་ནི་རྒྱ་ནག་ཤར་ངོས་ཀྱི་རྒྱ་མཚོའི་གླིང་ཕྲན་ནོ། །
རྒྱ་ནག་ཤར་ལྷོར། རྒྱ་གར་ཤར་སྟོད་བྷོ་ལད་སྟེང༌། ༼འདི་རུ་ཅུང་ནོར་འཁྲུལ་ཡོད་སྙམ་སྟེ། ཕ་རན་སི་ནི་རྒྱ་གར་དང་ཐག་མི་ཉེ་བ་ཡོངས་གྲགས་སོ།། སྒྲིག་མཁན་གྱི་མཆན།༽དེ་ནས་ཕ་རན་སི། དེ་ནས་སིང་ག་ལ་ཡོད་པའི་རྒྱབ་ངོས་ལྟ་བུ་བྷེལ་འཇམ། དེ་ནས་རྒྱ་གར་ཤར་ལྷོར་བྷེ་ཌེལ་ཏེ་ལོ་གཅིག་ལ་ཟླ་བ་དྲུག་བདུན་སར་འགྲོ་བའི་ས་ཡོད་ཅེས་ཟེར། ཨོ་སེ་ཊེ་ལེ་དང་ཛྙཱར་མིན་དང༌། དེ་ནས་ཨ་མྲྀ་ཥ། ལྷོ་གསེར་གླིང་ངམ་སུ་ཝ་ར་ན་སི། དེ་ནས་ཌ་མི་ཌམ་སྟེ་འགྲོ་ལྡིང་དང་ཟངས་གླིང༌། ནུབ་ཏུ་ལིང་ཀ་དང༌། དེ་ནས་ཚུར་ནོར་བེ་ཞེས་པ་དང་ཧོ་ལན། འདི་ནས་རྔ་ཡབ་ལ་ཐུག་ཅིང༌། གོང་གི་དེ་ནས། ཨོ་རྒྱན་ལྷོ་ངོས་ཡིན་པར་འདུག་ཟེར།
ཁ་ཆེ་ཀསྨི་རའི་རྒྱལ་པོ་ལ། བོད་པ་མངའ་རིས་པས་ཟིང་པ་རྒྱལ་པོར་འབོད། ནང་པ་ལའང་དགའ་བར་བྱེད། ཁོ་རང་གི་གྲུབ་མཐའ་ངོ་མ་ཧིན་དུ་ཡིན་པས། ཧིན་དུའི་གྲུབ་མཐའ་ལ་སློབ་གྲྭ་གསར་དུ་བཙུགས། ཁོའི་མངའ་རིས་ནི། མུ་སུུརྨན། རྒྱ་ཆེ་བས་མུ་སུརྨན་སློབ་གྲྭའང་བཙུགས། དབུས་འབྲུག་བོད་ཆེན་ཆོས་འཁོར་ཞེས་གངས་དཀར་ལུང་པ་ན་ཡོད་པ་དེའི་བླ་མ་ལ་དྭགས་སྟག་ཚང་རས་པར་ནང་པའི་སློབ་གྲྭ་ཚུགས་ན་མཐུན་རྐྱེན་ཁོང་གིས་བྱེད་ཟེར། སྔར་ལ་དྭགས་རྒྱལ་པོ་བོད་ལ་གཏོགས་ཀྱང་གཞུང་དང་རྩོད་པ་མང་མཐར་ད་ལྟ་ཁ་ཆེ་རྒྱལ་པོའི་འོག་ཏུ་སོང༌།
མངའ་རིས་ཟངས་དཀར་ཞེས་མངའ་རིས་དང༌། ཁ་ཆེའི་མཚམས་ཀྱི་ཡུལ་དེ་ན། ནཱ་རོ་པའི་སྒྲུབ་གནས་བྱང་པུཥ་ཧ་ལ་མེ་ཏོག་མདངས་འཕྲོག་གི་དགོན་པ། དེ་ནས་ནུབ་ཏུ་ཞག་མང་ཙམ་ཕྱིན་པ་ན། ལ་ལྭ་པའི་རྡོ་གདུགས་རྣམས་གྲུབ་ཐོབ་ཨོ་རྒྱན་པའི་ལམ་ཡིག་ལྟར་ཡོད། ལ་དྭགས་ན་ཨོ་རྒྱན་གུ་རུ་རིན་པོ་ཆེས་ཕྱག་མཁར་བཙུགས་པ་ལས་མངའ་རིའི་ཁམ་བུ་ཞིམ་པོ་འདིའི་ཐོག་མའི་འབྱུང་ཁུངས་ཡིན་ཟེར་བ། མངའ་རིའི་ཁམ་བུ་གཞན་ལས་རོ་བྲོ་བ་གཉིས་ཀ་ཞིམ་པ་འགྲན་གྱི་དོ་མེད་སྡོང་པོ་ཆེན་པོ་གཅིག་ཡོད་སར་མིས་མི་ཐར་བའི་བྲག གཡངས་ཀྱི་ངོས་ལ་ཡོད་པ། བྲག་གི་རྩ་བར་ཤིང་ཏོག་བྲུལ་འོང་བ་ལས་བསྒྲུགས་ཏེ་ས་བོན་གྱི་རྒྱུར་བྱེད་པ་ཡོད་ཟེར།
རྒྱ་གར་གརྴའི་ཡུལ་གྱི་ཆོས་ལུགས། བྱར་འབྲུག་ཡིན་པ་བླ་མ་བཀྲིས་བསྟན་འཕེལ་ཞེས་བོད་ཀྱི་རིག་གནས་ལ་མཁས་པ་ཞིག་ཡོད་པ། ཁ་ཆེ་ཟིང་བའི་རྒྱལ་པོ་དེས་ཧིན་དུའི་སློབ་གྲྭར་གདན་དྲངས་ཏེ། དེས་བོད་ཀྱི་རིག་གནས་བསླབས་སོང་ཟེར། དེས་ཧིན་དུའི་ཡི་གེ་འང་ཤེས། ལྷ་ས་ལ་འོངས་པའི་ཁ་ཆེ་ཚོས་ཇོ་ཁང་ལ་སྐོར་བ་གཏན་ནས་མི་བྱེད་པ་དང༌། ལོག་སྐོར་བྱེད་པ་དེ་ཚོས་ནི། མུ་སུརྨན་ཆོས་ལུགས་ཡིན་པ་ལས། སངས་རྒྱས་ལ་དད་པའི་ཁ་ཆེ་འང་ཡོད་པ་རེད་ཟེར།
༈ ཡང༌། ཨ་མྲི་ཥ་༼ཨ་མེ་རི་ཀ སྒྲིག་མཁན་གྱི་མཆན༽ན་མི་གཅིག་ཤེས་རབ་ཆེ་བས། ཡི་གེ་མཐོང་ཚད་བློ་ལ་ཟིན་པ་ཡོད་ཅེས་སོ། །
ད་ནི་ཆོས་ལུགས་ཚོ་ཇི་ལྟར་ཡིན་པ་ལ། རྒྱ་གར་པས་བུད་དྷི་ཤ་ཞེས་པའི་ནང་པ་སངས་རྒྱས་པ་ནི། མ་གྷ་དྷ་སོགས་དབུས་ན་ཆེར་མེད་པ་ལས། མཐའ་རྣམས་སུ་ཤིན་ཏུ་མང་བས་སངས་རྒྱས་པའི་སྡེ་ཚན་ཤིན་ཏུ་མང་བར་བྱེད། འོན་ཀྱང་གྲངས་ཀྱིས་བཏབ་པ་ནི་བབས་ཀྱི་ཡི་གེར་མི་འདུག་ཟེར། ཕྱི་གླིང་ངམ། ཕེ་རོང་གིས་འཛམ་བུའི་གླིང་འདིར། མི་རིགས་གནས་ས་ལ་ཡོ་རོབ་དང༌། ཨེ་ཤེ་ཡ་གཉིས་སུ་འབྱེད། དང་པོ་ནི་ཡེ་ཤུ་མ་ཤུ་ཀའི་ཆོས་ལུགས་ཡིན། ཡེ་ཤུ་བྱུང་བའི་ཡུལ་རྒྱ་གར་གྱི་ཤར་ལྷོར་མཐའི་རྒྱ་མཚོའི་གླིང་ཕྲན་གཅིག་ཡིན། ༼འདི་ནི་ནོར་བ་སྟེ། ཡེ་ཤུའི་སྟོན་པ་རྗེ་སི་སིའི་འཁྲུངས་ཡུལ་ནི་རྒྱ་གར་གྱི་ནུབ་ཕྱོགས་དཀྱིལ་ཤར་ས་ཁུལ་གྱི་ཨེ་ཟི་རེལ་རྒྱལ་ཁབ་ཡིན་པ་ཡོངས་གྲགས་རེད། སྤྲུལ་སྐུ་ཡེ་ཤེས་ཀྱི་མཆན། ༽ཕ་རན་སི་དང་ཉེ་བ་རེད་ཟེར་བ་དང༌། ཕ་རན་སི་ཁོ་རང་རེད་ཟེར་བ་གཉིས་འདུག དེའང་སྔ་ཕྱི་གཉིས་བྱུང་བ་ཡིན། ཕྱི་མ་དེ་སྔ་མའི་ཆོས་ལུགས་ལ་ཆགས་སྡང་ཡོང་བས། སྔ་མའི་སྡེ་ཚན་གྱིས་གཟུགས་པོར་ལྕགས་གཟེར་གདབ་པ་སོགས་བྱས་པས། ད་ལྟ་ཁོ་ཡི་གཟུགས་ལུགས་སུ་བླུགས་པ་ལ་ལྕགས་གཟེར་གདབ་པ་སོགས་ཡིན།
ལུང་དེ་འཛིན་པ་ཨ་མྲྀཥ། ཛྙཱར་མིན། ཨོ་སོ་ཊེ་ལེ། བྷེལ་ཇཾ། ཕ་རེན་སི། དབྱིན་ཇི། མོན་ཊོ་ལོ་ཉོ་བུ་རོ། སར་སྦི་ཡ། ཧོ་ལེན། སུས་ཌན་ནམ་སི་བྷེལ་ཌེ། ནོར་བྷེ་སོགས་རྒྱ་མཚོའི་གླིང་བར་གྱི་ཀླ་ཀློ་མང༌། ཨེ་ཤ་ཡ་ནི་རྒྱ་གར། རྒྱ་ནག བལ་པོ། རི་པིན། བོད། སོག་པོ་བཅས་ལ་ཟེར། ཏ་ཡི་གོ་ཏ་ཡིན་ཟིན། མུ་སུརྨན་ནི་དེ་ཀུན་ནང་མ་འདུས་ཀྱང༌། ཡོ་རོབ་ལ་ཕྱོགས་གཏོགས་གྲས་ཡིན། ཡེ་ཤུའི་ལུགས་ལ་མུ་སུརྨན་ནས་མི་དགའ་ཆེན་པོ་བྱེད་འོང་ཡང༌། ཡེ་ཤུའི་ལུགས་འཛིན་གྱིས་མུ་སུརྨན་དང༌། ཧིན་དུ་གཉིས་ཀྱི་ནང་ནས་ཕྱི་མ་ལ་སྡང་འོང༌། ཡེ་ཤུའི་ལུགས་ལ་གྲུབ་མཐའ་ཤེས། ཆོས་འཆད་པ་ལོག་པར་མི་གཡེམ་པ། སྐྱེ་དམན་དུག་ལོག་ནག་པོ་གོན་པའི་གྲྭ་དེ་བླ་མ་ལྟ་བུ་བརྩི་ཟེར། ཡེ་ཤུའི་ལུགས་འཛིན་ནི་འཛམ་གླིང་ན་ཆེས་མང༌། གོང་གི་གླིང་ཕྲན་དེ་དག་ཏུའང༌། གསེབ་ཚགས་སུ་སངས་རྒྱས་པའི་རང་ལུགས་ཕྲན་བུ་རེ་མང་དུ་དར་བ་ཡོད་ཟེར་བས་རྒྱལ་བའི་ཕྲིན་ལས་བསམ་མི་ཁྱབ་པ་ལ་དད་དོ། །
རྒྱ་གར་གྱི་ཧིན་དུ་འམ། ཕྱི་རོལ་མུ་སྟེགས་པ། མིང་གཞན་སཱ་ནཱ་རྡ་ན་ལ། དབྱེ་བ་ཉི་ཤུ་རྩ་གཉིས་ཡོད་ཅེས་དང༌། རྒྱ་གར་ནུབ་ངོས་སུ། མུ་སུརྨན་སྟེ། ཐུ་རུག་གམ། ཏུ་རུ་ཀ་ཀླ་ཀློའི་ལུགས། ད་ལྟ་བོད་པ་ཨ་མདོ་པས། ཧོན་ཧོས་སམ། མགོ་དཀར། ཟ་ལར། ཟ་ལད་ཅེས་པ་རྣམས་སུ་འདོགས་པ་དེའི་ལུགས་ལ་དབྱེ་བ་དྲུག་ཡོད། སྔར་རྡོ་རྗེ་གདན་ལ་དགྲ་བྱེད་པའི་སོག་པོ། ཏཱ་སིག་ཅེས་དང༌། ཁྲོམ་དགེ་བར་དམག་གི་རྒྱལ་པོ་དང༌། བོན་ནག་གི་སྟག་ཟིག་འོལ་མོ་ཟེར་བའི་འཁྲུལ་གཞི་ཡུལ་འདི་ཡིན་པ་དང༌། ལྷ་བླ་མ་ཡེ་ཤེས་འོད་གར་ལོག་གིས་བཟུང་མཁན་དང༌། སྟོད་ཧོར་གྱི་དམག་དཔུང་འདིའི་བྱེ་བྲག་ཅིག་ཡིན་པས་འདི་རྣམས་རང་གིས་བསད་པའི་ཤ་མ་གཏོགས་གཞན་གྱིས་བསད་པའི་ཤ་མི་ཟ་བ་དང༌། ཕག་གི་ཤ་གཏན་མི་ཟ་བ་དེ་རྣམས་ཡིན། སོག་པོ་ནི་རྒྱ་ཡུལ་སོགས་ཕལ་ཆེར་མང༌། འདི་དག་གི་ལུགས་གཙང་མར་འཛིན་པའི་རྒྱལ་པོ་སྟོབས་ཆེ་བ་དེ། མོ་ལ་ཏཱ་ན། ཕ་རིའི་ས། ཏུམ་པ་ཙ། ཀ་བིལ་རྣམས་ཡིན། ཧེ་ཅིས་སམ། ཁ་ཆེ་ཀསྨིར་ཡང་དེའི་ལུགས་མང༌། མོ་ལ་ཏཱ་ནི། ཤམྦྷ་ལའི་ལམ་ཡིག་ཏུ། ཤམྦྷ་ལའི་ཆུ་ཤཱི་སོགས་དང་ཉེ་བར་གསུངས། གྲུབ་མཐའ་གཞན་ལ་ཧ་ཅང་སྡང་བ་མ་རུང་པ་ཞིག་ཡིན་པས། ཡེ་ཤུའི་ལུགས་ཀླ་ཀློ་ཅུང་འཇམ་པོ་དང༌། མུ་སུརྨན་ཀླ་ཀློ་རྩུབ་མོར་བྱེད། སྔ་མས་གྲུབ་མཐའི་ཚོགས་སྲིད་ཀྱི་ལུགས་སམ། རྒྱལ་པོའི་ལུགས་ལ་ཡེ་མངོན་གྱུར་མི་བྱེད་ལ། ཕྱི་མས་གྲུབ་མཐའི་ཆགས་སྡང་དང༌། རྒྱལ་སྲིད་ཀྱི་དཔུང་ཕྱེད་གཅིག་དྲིལ་དུ་བྱེད་པས་སོ། །རྒྱ་གར་ཧིན་དུའི་ནང་གསེས། གུ་རུ་ཎ་ནའི་ལུགས་ལ། འབུམ་གཅིག་ཡོད་ཟེར།
༈ ཡང༌། འཛམ་གླིང་གི་རྒྱལ་ཁག་ཐམས་ཅད་ལས། མ་ཧཱ་ཙི་ན་སྟེ་རྒྱལ་ཁམས་གཅིག་ཏུ་མི་གྲངས་རྒྱ་ནག་ཆེས་མང༌། ས་རྒྱ་སྡེ་རྒྱ་གཉིས་ཀ་ཆེ་བ་ཨོ་རོ་སུ་ཡིན་པས་རྒྱལ་ཁག་ཨོ་རོ་སུ་ཆེ། རྒྱ་མཚོའི་ཐོག་ཏུ་གྲུ་གཟིངས་འཆའ་བ་དང༌། གཡོ་སྒྱུའི་མགོ་སྐོར་དབྱིན་ཇི་མཁས་ཤིང༌། གླིང་ཕྲན་དང་ལུང་ཕྲན་དེ་ཚང་མ་ལ་འཛམ་གླིང་གི་ཡུལ་དབུས་ས་མཆོག་རབ་རྣམས་དེ་ཚང་གིས་ཟིན། ཀོ་སྐྱ་ནང་འཛུལ་ཏེ་འཕྲུལ་འཁོར་གྱིས་གནམ་ལ་འཕུར་བའི་གནམ་གྲུ་དང༌། མཚོ་ནང་དུ་ཉ་ཡི་གཟུགས་ལ་བརྟེན་ནས་ཆུ་གཏིང་ནང་དུ་རྒྱུག་པའི་གྲུ་ཡི་འཕྲུལ་འཁོར། མེ་མདའ་དང་མེ་སྒྱོགས་རི་སྙིལ་ནུས་སོགས། འཕྲུལ་གྱི་རིག་གནས་དང༌། དམག་ལ་འཇར་མིན་འགྲན་གྱི་དོ་ཟླ་མེད་པར་རྩི། མི་གྲངས་ཉུང་ཡང༌། དམག་འཐབ་ལའང་མཁས། བཅའ་ཀ་ཡང་སྤུས་དག་པོ་ཁོ་ན་ཡོད་ཅིང༌། གླིང་ཕྲན་སྐྱིད་ས་དང་མཚར་བ་ནི་རི་བིན་ལ་བརྩི། འཛམ་བུའི་གླིང་འདི་ཕལ་ཆེར་དུ་ཁང་བཀོད་ལ་ཟླ་མེད་ཅིང༌། རྒྱལ་པོའི་ཕོ་བྲང་ལ་འགྲན་པའི་ཟླ་མེད་པ་ནི། བྷེལ་ཇམ་རྒྱལ་པོར་བརྩི། རང་ཚོད་ཟིན་པ། ནོར་རྫས་ལོངས་སྤྱོད་ཤིན་ཏུ་ཆེ་བ། རིན་ཆེན་མང་བ། ཡུལ་སྐྱིད་པ་ཨ་མྲྀ་ཥ་༼ཨ་མེ་རི་ཀ སྒྲིག་མཁན་གྱི་མཆན།༽ལ་བརྩི། ཨ་མྲྀ་ཥའི་ཚོང་པ་གསུམ་བསྡོངས་ན་འཛམ་གླིང་ཉོ་ཐུབ་འོང་ཞེས་གཏམ་དུ་གྲགས།
༈ རྒྱ་ནག་གི་ཕེ་རེང་དབྱིན་ཇི། གཡིང་ཀང་ངམ། ཞ་ཀན་ཟེར་བ་དང༌། ཀ་ལི་ཀྭར་ཟེར་པ་སོགས་འདུག་ཀྱང་སུ་ལ་ཟེར་བ་ར་མ་འཕྲོད། ༼འདི་ཕལ་ཆེར་ཧོང་ཀོང་ཡིན་པ་འདྲ་སྟེ། རྒྱ་སྐད་དུ་ཞང་ཀང་ཞེས་འབོད་པས་སོ།། སྒྲིག་མཁན་གྱི་མཆན༽
༈ ཕ་རན་སི་མི་སྡེ་འཕོས་པའི་རྒྱལ་པོ། ཨ་མྲྀཥ་མི་སྡེའི་རྒྱལ་པོ་ལོ་གསུམ་ན་བརྗེ། ཛྙཱར་མིན་རྒྱལ་བརྒྱུད་ཅན་ཡིན། དབྱིན་ཇི་རྒྱལ་བརྒྱུད་ཅན་ཡིན། ཨོ་རོ་སུ་རྒྱལ་བརྒྱུད་ཅན་ཡིན་ཀྱང་རྒྱལ་པོ་བསད་ནས་མི་སྡེས་རྒྱལ་པོ་བྱེད། དཔེར་ན་རྒྱ་ནག་གོང་མ་ཀྲུང་ཧ་མིང་གོས་ཏཱ་ཙུང་ཐུང་བསྐོས་པ་ལྟར། རི་པིན་རྒྱལ་བརྒྱུད་ཅན་ཡིན། བྷེལ་ཇམ་དབྱིན་ཇི་རྒྱལ་པོའི་དབང༌། མི་སྡེ་ཡོན་ཏན་ཅན་མཁས་པ་སྟོང་ཕྲག་ཁ་ཤས་ཡོད་པ། བློན་པོ་ཤེས་ལྡན་དག་གིས་འཛིན། མི་སྡེའི་དབང་རྒྱལ་པོས་འཛིན་ནོ། །
ཛྙཱར་མིན་སོགས་འཁྲུག་པ་བྱེད་ཚུལ་ནི་སརྦིས་ཡིས་རྒྱལ་ཁབ་ཆུང་བ་ཡིན། དེ་ནས་མི་མང་པོ་ཨོ་སེ་ཌེལ་གྱི་གླིང་དུ་ཚང་མ་སོང་བས་གཞིས་ཆགས། ཞིང་རྨོས། གྲོང་ཆེན་དུ་གྱུར། པརྦིས་རྒྱལ་པོ་ཨོ་སེ་ཌེལ་ལུང་པ་གཏད་མོ་ལ་ཕྱིན་པས། ཁོ་རང་གི་མི་སྡེ་འབངས་ངོ་ལོག་གིས་ཨོ་སེ་ཌེལ་ལུང་པར་བསད། པརྦིས་ཡས་ཨོ་སེ་ཌེལ་ལུང་པར་མི་སྟོང་བསྙེགས་པས་ཁྱོད་རང་གི་འབངས་རེད་ཅེས་མི་སྟོང་མ་བྱིན། མི་སྡེ་དེ་དག་ཀྱང་མ་སྤྲད་ནས་རྒྱལ་ཁབ་ཆུང་བ་ལ་བརྙས་པས། ཨོ་རོ་སུ་དང་སརྦིས་ཡ་ཉེ་སོར་ཡོད་པས། ཨོ་རོ་སུས་རྒྱབ་གཉེར་བྱེད་པར་རྩོམ་པ་ན། ཛྙཱར་མིན་གྱིས་ཨོ་སེ་ཌེལ་གྱི་རྒྱབ་གཉེར་བྱས། དེ་དག་གི་དམག་བྷེལ་ཇམ་གྱི་ས་ཐོག་ཏུ་ཚོགས་པར་རྩོམ་སྐབས། བྷེལ་ཇམ་གྱིས་ཕ་རན་སི་དང༌། དབྱིན་ཇིའི་ལུང་པ་གནོད་འོང་བས་ཁོ་བས་ཞག་བདུན་དུ་བཀག་པར་ཁས་བླངས། ཛྙཱར་མིན་དབྱིན་ཇི་སེམས་ལ་མི་འབབ་པས་སྔ་མ་ལོ་བཞི་བཅུ་ཙམ་ནས་དམག་གྲ་བསྒྲིགས་པ་ཡིན་པས། ཞག་བདུན་རྗེས་བྷེལ་ཇམ་གྱི་རྒྱལ་པོ་ཕོ་བྲང༌། བྷེལ་ཇམ་གྱི་དམག་བཅས་ཕ་རན་སེར་བྲོས། དེར་རྒྱལ་ཁབ་མང་པོ་བསྡོངས་ནས་བཀག་ཀྱང༌། ཛྙཱར་མིན་འཕྲུལ་ཆེ་བས་ཆེས་ཆེར་རྒྱལ། ཕ་རེན་སིའི་གླིང་ཕྱེད་ཛྙཱར་མིན་ནས་བཟུང༌། དེ་སྟེ་ལོ་བདུན་ཙམ་ཕལ་ཆེར་འཁྲུགས། ད་ལྟ་ཆིངས་དུས་སྐབས་ཡིན་སྐད།
དེ་འང༌། ཨར་རོ་བུ་བར་སྐབས་ཤིག་ན་ནང་ཞིག གཞན་སརྦིས་ཡང༌། མཽ་ཌཽ་ཉི་གུ་ཏོ། དབྱིན་ཇི། ཕ་རན་སི། ཨེ་ཌིལ་ལག་སོགས་རྒྱལ་ཁག་བཅོ་ལྔ་ཕྱོགས་གཅིག་དྲིལ། ཛྙཱར་མིན་ནམ་རྒྱར་བིན་ལ་པུ་རྡོ་རྗེ། ཨོ་སེ་ཌེ་ལེ། རུམ་པ་ཅ་རྣམས་བསྡོངས་པ་ལ་མ་དོ། མི་ཤི་ཆེ་སྐབས། ཆུ་ཚོད་རེ་རེ་ལ་མི་འབུམ་ཐེར་གསུམ་རེ་ཙམ་ཕར་ཚུར་གཉིས་ཀའི་མགོ་ནས་བརླགས། ཉིན་ཁ་ཤས་དང༌། སྟོན་དགུན་སོགས་ཟླ་བ་ཁ་ནས་རེ་མ་གཏོགས་པར་འཐབས་ཀྱང་ལོ་བདུན་ལས་ཕལ་ཆེར་ཛྙཱར་མིན་རྒྱལ། རྒྱ་མཚོའི་ཆུ་ནང༌། ཤེལ་གྱི་ཉ་གཟུགས་གཤོག་གུར་དང༌། རྔ་འགྱུར་ཐམས་ཅད་ཉ་ཇི་ལྟ་བ་བཞིན་བྱེད་ནུས་ཀྱི་གྲུ་ནང་དུ་མི་སྟོང་ཕྲག་མང་པོ་གབ་སྒྱོགས་ཆེན་པོ་བཟུང་བ། དབྱིན་ཇི་ཕེ་རེང་གིས་རྒྱང་མཐོང་ནས་བལྟས་ཀྱང༌། ཉ་ཡིན་པར་འཕྲུལ། ཉེ་བར་སླེབས་ནས་སྒྱོགས་ཀྱི་མཐུས། རྒྱ་མཚོའི་སྟེང་ན་དབྱིན་ཇིའི་གྲུ་མང་པོ་ཁ་སྦུབ་ཏུ་བཏང་ནས། མི་ཤིན་ཏུ་མང་པོ་གསོད་པར་བྱས། ཆུ་ནང་དུ་མེ་མི་ཤི་བའི་རྫས་དབྱིན་ཇིར་མེད་པར། ཛྙཱར་མིན་གྱིས་བྱེད་ནུས་པ། ཡང་དབྱིན་ཇིའི་གནམ་གྲུས། མེ་ལི་ལྔ་བཅུའི་ནམ་མཁའ་ལ་འགྲོ་བར་ནུས། དེའང་ཡོར་གྱིས་འོང་བ་ལས་མགྱོགས་པར་འགྲོ་མི་ནུས། ཛྙཱར་མིན་གྱིས་གནམ་གྲུ་མེ་ལི་བརྒྱ་ཡི་བར་ལ་འགྲོ་ནུས། དེ་ཡན་རླུང་གིས་དབུགས་ནང་དུ་བཀག་པས་སྤུ་གྲི་རེག་ཆོད་ཀྱིས། ལུས་བྱེ་མའི་ཆིངས་བུ་ལྟར་ཞིག་པར་བྱེད་པའི་རླུང་ཡོད་པས་འགྲོ་མི་ཐུབ། དེ་མིན་ན་འགྲོ་བའི་གྲུ་ཆེན་པོ་མེ་ལི་གསུམ་ཙམ་ལ་སླེབས་པ། དམག་ཉིས་སྟོང་ཙམ་ཤོང་བ། བློན་པོ་ཇི་བི་ལིས་དྲན་པ། འཇབ་རུག་བྱས་ནས་མྱུར་བར་ཕྱིར་བྲོས་ནུས་པ། ཆུང་བ་མི་གསུམ་བཞི་ཤོང་བའི་བར་ཆེ་ཆུང་མང་པོ་ཡོད། དེའང་ཁྲུ་སུམ་སྟོང་མེ་ལི་བྱེད། རྒྱ་གར་ན་དེང་སང་མེ་ལི། རྒྱ་ནག་གིས་ལེ་དབར།
བོད་ཀྱིས་ཀྱང་རྒྱ་གར་གྱི་ལད་མོ་རྡོ་ཐོ་བོ་བརྩིགས་པར་ཡི་གེ་བྲིས་ནས་འདུག མེ་མདའ་སྐད་མི་འབྱིན་པར་ཕོག་པ་དང༌། ཆུ་ཡི་ནང་དུའང་ཕོག་པ་རྣམས་ཛྙཱར་མིན་ནས་ཤེས། སྔར་རྒྱ་གར་བས་སན་སི་འཕྲུལ་གྱི་རིག་པ་མ་བསླབས་ཀྱང༌། ད་ནི་རིག་པ་དེ་ཤེས་པས་ལོ་རེའི་ནང་དུ་བཟོ་སྣ་མི་འདྲ་མང་པོ་འཆོས་པས། དབྱིན་ཇིས་རྒྱ་གར་བ་རྣམས་མི་ཐུབ་དོགས་པས་ད་ཡོད་ལས་མི་ཆོག་རྒྱུའི་ཁྲིམས་དང༌། ཁྱད་པར་དུ་མཚོན་ཆ་སྟ་གྲི་ཙམ་ཡང༌། རྒྱ་གར་གཞུང་དུ་ཉར་ཚགས་མི་ཆོག་རྒྱུ་བྱས་ཀྱང༌། ཧིན་དུའི་གན་དྷི་རཱ་ཛ་སོགས་མི་ཤེས་ལྡན་དག ས་འོག་ཏུ་ཁང་པ་བཙལ་ནས་དེར་མཚོན་ཆ་བཟོ་གི་ཡོད་པ་རྣམས་ལ་དབྱིན་ཇིས་འགོག་མི་ཐུབ་པ་རེད་ཟེར། ༼འདི་ཡང་བདེན་པ་མིན་པ་སྟེ། འཛམ་གླིང་ཡོངས་གྲགས་སུ་གན་དྷི་ནི་ཞི་བའི་ལམ་སྟོན་ཞིག་ཏུ་གྲགས་པ་ལས། མཚོན་ཆ་བཟོ་སྐྲུན་བྱས་པའི་ལོ་རྒྱུས་མི་སྣང༌། སྒྲིག་མཁན་གྱི་མཆན། ༽
ཛྙཱར་མིན་གྱིས་བྷེ་ལད་སྟེང༌། ནམ་མཁར་འཇབ་མེ་སྒྱོགས་མི་དགོས་པའི། བསང་ཁང་འདྲ་བའི་ཁྲོ་ཡི་རིལ་བུ་མང་པོ་འཕེན་པ། མར་སླེབས་དུས། རྡེའུ་གས་ནས་རྡེའུའི་ཆར་བབས། རྫས་དུད་མེ་ལྕེ་མེ་སྟག་གིས།་ཁང་པ་མང་པོ་གཏོར་ནས། དེ་བྱུང་ན་བྲོས་ཕྱིར་བྷེ་ལད་སྟེང་ས་འོག་ཏུ་འཛུལ་འགྲོ་བའི་དོང་བརྐོས། དེ་ནང་གློག་གི་ཞུན་མར་བཅོས། ཡུལ་ཆེན་ཡོད་པ་སྡོད་ཆོག་པར་བྱས། ནམ་མཁའ་ལ་ཁ་གཏད་དེ། སྒྱོགས་འཕེན་མ་རག་པས་ལྕགས་ཀྱི་ལྕགས་ཀྱུའི་མདུང༌། གནམ་གྲུ་བཟུང་བའི་འཕྲུལ་འཁོར་རྣམས་བྱས་ནས། ཐུན་སྐོར་སྲུང་གིས། རྒྱང་མཐོང་རྒྱག་པའི་གནམ་གྲུ་ཆུང་བ་བཅོམ་ནས་བསྡད་ཡོད་སྐད་རེད། དེས་ཛྙཱར་མིན་ལན་གཅིག་གཉིས་ཙམ་ཐུབ་ཀྱང་རྗེས་སུ་བྱ་འཕུར་བ་ལྟ་བུ་འམ། གློག་འཁྱུགས་པ་འདྲ་བའི་གནམ་གྲུ་ནས་ཐོག་བརྒྱབ་པ་ལྟ་བུ་འདུག སྦྱོར་རྫས་ངན་པ་བདུགས་པས། ལུང་པ་ཁྱབ་པའི་མོད་མི་མང་པོ་རང་དགར་གཉན་རིམས་ཀྱིས་འཕྲལ་དུ་ཤི་འགྲོ་བའི་མེ་མདའ་དང་རྫས་སྦྱོར་སོགས་བྱས་པས། དབྱིན་ཇི་འུ་ཐུག་པ་བྱས་སྐད།
དེ་ནས་ནོར་བྷེ་དང༌། རི་བིན། ཨ་མྲྀཥ་སོགས་རང་གར་བསྡད་པའི་རྒྱལ་ཁབ་འགའ། ཆིངས་སྒྲིགས་རོགས་ལབ་དགོས་པ་བྱུང་རེད་ཟེར། མཐའ་ཡི་གླིང་ཕྲན་ཕེ་རེན་དང་ཀླ་ཀློའི་རྒྱལ་ཁབ་དེ་ཐམས་ཅད་ཡུལ་མཐའ་བསྐོར་བ་འགྲོ་འདུག་གང་ལ་ངང་ཚུལ་གཅིག དོན་ཆུང་ལ་སྙིང་སྟོབས་ཆེ་བར་བྱེད་པ་ལའང་གཅིག་ཅིང༌། འོན་ཀྱང་འདི་ཐམས་ཅད་ཀྱིས་རྒྱང་མཐོང་སོགས་ནས། རྒྱང་ན་མཐོང་ཡང་ནང་ན་ཉེ་བར་འགྲོ་མི་ཐུབ་པའི་གླིང་བདུན་འདུག་པས་གོང་བཤད་ལྟར་སྔར་བཅོམ་ལྡན་འདས་ཀྱི་གསུང་ལ་ཡིད་མི་ཆེས་ཀྱང༌། ད་ནི་ནང་པ་སངས་རྒྱས་པའི་ལུགས་ལ། གླིང་བཅུ་གཉིས་ཡོད་པར་བཤད་པའང་བདེན་འདུག་ཟེར་བ་ཡོད་རེད། ཡེ་ཤུའི་ལུགས་འཛིན་ཚོས་འཛམ་གླིང་ན་མཁས་པ་གསུམ་བྱུང༌། གཅིག་སངས་རྒྱས་ཤཱཀྱ་མུ་ནི། གཅིག་ཧིན་དུའི་འཇུག་པ་བཅུའི་ནང་ཚན་དྲང་སྲོང་ཀྲྀཋ་ཎ་པ་སྟེ་ནག་པོ། གཅིག་ཡེ་ཤུ་ཡིན་ཟེར་བ་རེད། ཛྙཱར་མིན་ལུགས་ལ་མངའ་འོག་དེར་ཡོད་པའི་མི་ཤེས་རིག་གསལ་པོ་ཡོད་དོ་ཅོག སློབ་གྲྭ་ལ་ལོ་དགུ་ཉུང་མཐར་བསྡད་ནས། གཟོད་ཁྱིམ་འཛིན་པས། ཡུལ་དེར་བསླབ་ཤེས་མང་བའམ། བསླབ་ཤེས་ས་ཡན་སི་སོགས་རིག་གནས་ལ་མཁས་པར་བྱེད་ཟེར།
༈ ལ་ལས་དབྱིན་ཇི་རེད། ཁ་ཅིག་གིས་ཛྙཱར་མིན་ཟེར། རྔ་ཡབ་ལངྐར་བལྟ་བའི་མི་ཉི་ཤུ་རྩ་ལྔ་ལྕགས་གྲུའི་ནང་བཏང་བས། ངོ་དམར་པོ་མགོ་གསུམ་ཡོད་པའི་ཤིང་གཅོད་མཁན་མཐོང༌། ཕལ་ལས་ཉིས་འགྱུར་རིང༌། སྟ་རེ་རེའང་མི་བཞིས་འདེགས་དགོས་ཚོད་དུ་འདུག་སྐད། གྲུ་ནས་ཕྱིར་དོན་པ་རྣམས། དེས་ཁྱུར་མིད་དུ་ཟོས། གྲུ་ནང་ནས་བྲོས་པ་རྣམས་རྗེས་རི་མགོ་བཅད་ནས་འཕངས་པས་ལྕགས་གྲུ་དེའུ་བཤིགས་བྱས་པ་རེད་ཟེར་བའི་གཏམ་རྒྱུད་གཅིག་ལྷ་ས་ན་འདུག་ཀྱང་རིགས་འདྲས་མིན་ན་བདེན་བདེན་འདྲ་ཟེར། སྟ་རེ་ཀ་ལི་ཀ་ཏ་ན་ཡོད་ཟེར་བ་དང༌། བྷེ་ལད་ན་ཡོད། དེའང་རྒྱལ་པོའི་ལྟད་མོ་ཁང་དུ་ཡོད་ཟེར་བ་དང༌། དེ་འདྲ་བ་ཐོས་མཐོང་ཟེར་མཁན་སྣ་ཚོགས་འོང་འདུག
༈ གང་ལྟར་ཡང༌། ནུབ་ངོས་མཚོ་དབུས་འགྲོ་བའི་སར་རི་དམར་པོ་ཤིན་ཏུ་རྩུབ་པོ་མང་པོ་ཡོད་པ་རྒྱང་མཐོང་གིས་མཐོང་རྒྱུ་འདུག་ཟེར་བ་དང་མི་ཟ་མཁན་ངོ་དམར་པོ། མི་སྲུན་པ་ཡོ་རིང་ཞིག་གི་གླིང་འདུག་ཟེར་བ། དབྱིན་ཇི། ཨ་མྲྀཥ་སོགས་ལ་གྲགས་པ་ཞིག་གོ།
༈ ཡང་ཨ་མྲྀ་ཥས་ལྕགས་ཀྱི་གྲུ་ཆེན་པོ་ཁང་བཟང་དང༌། འབྲས་སོགས་ཀྱི་ཞིང་དང༌། སྤང་ལྗོངས་དང༌། ཤིང་ལྗོན་པའི་ཚལ་དང༌། སྐྱེད་མོའི་ཚལ་སོགས་མེ་ལི་ལྔ་དྲུག་གི་ལམ་ཙམ་ཡོད། འདི་ནས་མདུན་ཕ་རི་ཙམ་མཐོང་ཚོད་དུ་སླེབས་པ། དེ་ལྟ་བུ་དངུལ་སྒོར་འབུམ་ཐེར་མང་པོ་འགྲོ་བ་དེ་ལྟ་བུ་འབད་རྩོལ་ཆེན་པོས་བཅོས་ནས། རྒྱ་མཚོ་ཆེན་པོའི་ནང་དུ་འཁྱམས་ནས་ཟླ་བ་མང་པོར་ཕྱོགས་མཐའ་དག་ཏུ་རིང་པོར་སོང་སོང་བ་ན། རྒྱ་མཚོ་ནང་དུ་གངས་རི་འདྲ་བ་དཀར་པོ་ཞིག་མཐོང་བ་དེ་དང་ཉེ་བར་སོང་ནས་༼གྲ་༽འཁྱག་༼བྲམ་༽མི་ཟད་པ་ཞིག་རེད་འདུག་པས་དེ་ལ་རེག་པས། གྲུ་འཐོར་ནས་ཕྱེད་ཙམ་བརླགས། ནང་ནས་མི་འོངས་མང་པོ་ཤིན་ཏུ་མང་པོ་བརླགས་ཅེས་སོ། །ཡང་རྒྱ་མཚོའི་གླིང་བར་རེ་ན་ཡུལ་སྟོང་པ་ཡོད། དེ་ན་རྡོ་ཆུ་ཡོད་པའི་རྟགས་སུ་ཆུ་ཆེན་དྲག་ཏུ་ཁོལ་བ་རླངས་པ་འཕྱུར་བ་ལྟ་བུ་ཡོད་ཕྱོགས་སུ། རྒྱང་མཐོང་གིས་བལྟས་ནས་དེ་ཡོད་པའི་ཉེ་སྐོར་གཏན་འགྲོ་མི་ཕོད། སོང་ན་རྡོ་རུ་གནས་འགྱུར་ནས་འགྲོ། གྲུ་རྫིངས་ཀྱང་རྡོར་གནས་འགྱུར་ན་ཤིང་གི་སྤགས་པ་ཡང་རྡོར་གནས་འགྱུར་ན་གཞན་ལྟ་ཅི་སྨོས།
༈ ཡང་རི་རྩེར་ཤིང་སྡོང་ཆེན་པོའི་སྟེང༌། བྱ་ཤིན་ཏུ་མང་པོ་འདུག ལྕགས་ཀྱི་གྲུ་སྟེང་གླང་ཆེན་བཤས་པའི་རོ་བཞག་པས། དེ་ཟ་བའི་སླད་དུ་འོང༌། གྲུ་དང་ཤ་བཅས་ཁྱེར་ནས་འགྲོ། གླིང་སྟོང་པར་བསྐྱལ། དེར་མཚོ་དབུས་སུ་ནི། རི་རྩེར་མི་རྒན་གྱིས་ཆོས་ལྟ་བུ་བཤད་པར། ཉ་མང་པོ་འདུས། ཉ་པགས་ཕུད་པའི་མོད། བལྟ་བས་ཆོག་མི་ཤེས་པའི་བུ་དང་བུ་མོར་སོང་སྟེ་ཉན། མཐར་ཉ་པགས་གྱོན་ནས་ཆུ་སྟེང་དུ་འགྲོ་བ་དང༌། རི་དེ་ལ་འགྲོ་བར་བརྩམས་པ་ན། རི་མཐའ་ལས་མེ་འབར་ནས་འགྲོ་མ་ནུས། ཡང་གླང་པོ་བཤས་པའི་ཤ་དང༌། ཉ་ཆེན་གྱི་ཤ་བསགས་པས་བྱ་ཆེན་བྱུང་ནས། ཕྱི་གླིང་གི་རྒྱལ་ཁབ་གཞན་གྱི་སར་བསྐྱལ་བ། རིམ་གྱིས་རང་ཡུལ་དུ་བགྲོད་ཅེས་སོ། །བྱ་འདི་ཁྱུང་དང༌། ཉ་འདི་རྣམས་ཀླུ་ཡིན་ནམ། ཡང་རྒྱ་མཚོའི་ལྷོ་མཐའ་གླིང་ཆུང་ཞིག་དང་ཉེ་བར། མཚོ་དབུས་སུ་སངས་རྒྱས་ཀྱི་སྐུ་ཆེན་པོ། བྱ་མང་པོ་བབས་པས་བྲག་གོང་དུ་བྱ་ཐལ་གྱིས་དཀར་པོ་བྱས་པ། ཚེས་༡༥ཟླ་བ་འཆར་སྐབས་ཆུ་ཤེལ་གྱི་ཏོག་ལས་ཆུ་བབས་ནས། བྱ་ཐལ་དག་འགྲོ་བའང་འདུག་སྐད། འདི་ཕྱི་ཡི་རྒྱ་མཚོའི་གླིང་ན། ལྷ་ཁྱབ་འཇུག་གིས་བཞེངས་པའི་སངས་རྒྱས་ཀྱི་སྐུ་གཟུགས་རི་ཙམ་ཡོད་པར་བཤད་པ་དེ་ཡིན་པར་སྣང༌།
༈ ཡང་སྤྲེའུ་དང་ཆ་འདྲ་བ་ལུས་ཐམས་ཅད་སྤུས་ཁེབས་པ་མི་གདུག་པ་ཅན་མི་ཟ་བའི་གླིང་དང༌། ཤང་ཤང་ཏེའུའི་གླིང་དུ་སླེབས་སྐད་ཀྱང་འདུག དེ་རྣམས་མི་མི་ཐར་བའི་བྲག་རིའི་ནང་ན་འདུག་པ། གྲུང་བས་མགོ་བསྐོར་གྱིས་བཀོལ་དུ་མི་བཏུབ་པ། དེ་དག་གི་སྐད་དུ་ཚོང་བརྡ་སྦྱར་ན། ཉེ་བ་དེར་བཞག་ནས་ཚོང་ཟོང་བརྗེ་ཡ་ཁྱེར་ཏེ་བྲོས་འགྲོ་བ། མི་ཡི་དྲི་ང་བ་མི་བཟོད་ལ། འདི་ཚོ་ལ། མུ་ཏིག་དང་ཕ་ལམ་བྱ་དར་ཅན། ལི་ཡི་དཔྱད་པ་སྤུས་དག་པོ་ཙན་དན་བྱ་དར་ཅན་སོགས་ཡོད་ཅེས་ཟེར་རོ།།
༈ ཡང་ཀ་ལི་ཀ་ཏ་དང་ཉེ་བ་ནས་བྷར་མ་དང་ཉེ་བའི་ཡུལ་ལ་བོད་ཀྱི་རྒྱལ་པོ་སྲོང་བཙན་སྒམ་པོའི་རྡོ་སྐུ་ཆེན་པོ་འདུག་ཟེར།
༈ ཀ་ལི་ཀ་ཏ་ན་ལྟད་མོ་ཁང་དུ་ཉན་ཐོས་ཆེན་པོ་མོངྒལ་བུའི་གདུང་རྒྱུད་ཟེར་བའི་དགེ་སློང་གི་གདུང་སྐམ་ཆེན་པོ་འདུག་ཅེས་སྡེ་དགེ་ཚང་གི་སྲས་བ་བ་ལ་ཕེ་རེང་གི་དཔོན་པོ་ཞིག་གིས་ལབ་ནས་བསྟན་འདུག་ཀྱང་བདེན་མིན་སླར་བརྟག་པར་བྱའོ།།
༈ བོད་ཀྱི་ས་ནི་པགས་པ་རྒྱ་ཆེ་ཙམ་ཡོད་ཀྱང༌། གྲོང་འཐོར་བས་མི་ཤིན་ཏུ་ཉུང་ངུར་བརྩི། བལ་པོ་ནི་ས་རྒྱ་ཆུང་ངུ༌། མི་གྲངས་མང་པོར་བརྩི། གོར་ཥ་རྒྱལ་པོར་དམག་འབུམ་ཐེར་ཡོད་ལ་དམག་གི་སྤུས་དག་པའི་ཚད་དུ་བརྩི། ཁོ་ལ་ཞྭ་རིན་ཆེན་ཤེལ་སྔོན་པོའི་རྨོག་ལྟ་བུ་ཕ་ལམ་གྱི་ཕྲ་མང་པོ་ཡོད་པས་སྒོར་འབུམ་ཐེར་བཅུ་རི་བ་གོན་རྒྱུ་ཡོད་ཟེར། བལ་པོ་ཁོ་རང་ས་ཆར་མི་མ་ཤོངས་ནས་ཕྱི་ལ་ཐོན་པ་རྐྱང་པ་ས་ཡ་གཉིས་ཡོད་ཟེར་བ་དེ་རྣམས་རྒྱ་གར། འབྲུག གང་དུའང་མང་པོ་སྡོད་སྐད།
༈ ཕག་གལ་༼ཕོར་ཆུ་སྒལ་མིན་ནམ། སྒྲིག་མཁན་གྱི་མཆན།༽གྱི་ནང་ཆོས་སྤེལ་མི་ཨེ་ཌི་བི་ལིག་ཟེར་བའི་སྐྱེས་དམན་དེ་ནི། ཕ་ཕ་རན་སི། མ་ཟི་ལིང་བ་ཡིན་པ་རེད་ཟེར། དེ་དག་གིས་རྒྱ་གར་ན། རོལ་མོ་དཀྲོལ་བ་ལ་བྷ་ཅ་ཟེར། བྷ་ཅ་སངས་རྒྱས་ཀྱི་བསྟན་པ་ཡིན་ཟེར་བ་ལས། བོད་ན་སངས་རྒྱས་ཀྱི་རྗེས་འཇུག་སྤྱོད་པ་དག་པ་ཡེ་མི་འདུག་ཅེས་ཟེར་ནས་སོང་སྐད།
༈ སྤྱི་ཙམ་དུ་རྒྱ་གར་ན་བོད་ལ་ཆོས་ཐེག་པ་ཆེན་པོ་ཡོད་པས་དགའ་བོ་བྱེད་ཀྱང༌། ཕྱིས་ནས་བོད་ཀྱི་རྒྱུས་ཇེ་ལོན་དུ་སོང་སྟེ། གཙང་སྦྲ་སོགས་ཡེ་མེད་པ་དང༌། རིགས་ཀྱི་སྤྱོད་པ་དག་པོ་མེད་པ་དང༌། རུས་པ་ཆེན་པོ་མེད་པ་དང༌། རང་རེ་ཡུལ་ཕྲན་ན་སྤྱོད་པ་དག་རང་གི་མཐོང་བ་ལས། སྲིད་པའི་གནས་སུ་འདྲ་མིན་ཅིའང་སྲིད་པ། རྒྱུ་མེད་དང་བྱེད་པ་པོས་མ་བྱས་པར། རྟེན་འབྲེལ་གྱི་རྒྱུ་འབྲས་བསླུ་བ་མེད་པའི་སྣང་བ་སྣ་ཚོགས་པས། ཅི་དང་འཆར་ཡང་དོན་ལ་རྫུན་པའི་སྣང་བ་སྣ་ཚོགས་རྨི་ལམ་སྒྱུ་མ་ལྟ་བུ་སྣང་ཡང་བདེན་པར་མ་གྲུབ་པའི་དཔེར་བརྗོད་དུ་མ་རྟོགས་པ་རྣམས་ལ། བདེན་མེད་ཀྱི་དཔེར་བརྗོད་དུ་བཤད་པའོ། །
རང་རེ་གངས་རིའི་ཁྲོད་འདིར། རི་མཐོ་ས་གཙང་བསིལ་བའི་ཆུ་འབབས། ཁམས་རིག་དྭངས། འཕགས་པ་སྤྱན་རས་གཟིགས་ཀྱི་གདུལ་ཞིང་སྒོམ་ན་སྙིང་རྗེ་འཆར་སླ་བ། གཏན་ལ་དབབ་ན་སེམས་སྟོང་པ་ཉིད་དང༌། འོད་གསལ་བྱང་ཆུབ་ཀྱི་སེམས་པ་མྱུར་པོར་རྟོགས་པའི་གནས་སུ་བཟང་ལ། སྔོན་གྱི་རྒྱལ་བློན་ལོ་པཎ་ཐུགས་རྗེ་ཅན་རྣམས་ཀྱི་བཀའ་དྲིན་གྱིས། ཡོངས་སུ་རྫོགས་པའི་བསྟན་པ་རིན་པོ་ཆེ་རྒྱུ་འབྲས་ཀྱི་ཐེག་པ་ཆེ་ཆུང་ཐམས་ཅད་བཀའ་དང་བསྟན་བཅོས་འཆད་ཉན་བྱར་ཡོད་པ་དང༌། ཐར་པ་དང་ཐམས་ཅད་མཁྱེན་པའི་ལམ། ཉེ་ལམ་མྱུར་ལམ་གསུམ་ག་མངའ་བས། གངས་ཅན་འདི་ཁྱད་པར་འཕགས་པ་ཡིན་གྱི་ལོངས་སྤྱོད་དང་མི་གྲངས་ཉུང་བས་ཡུལ་ཆུང་ངུ་ཉིད་ཡིན་ཕྱིར། དམག་གི་གྲངས་བསགས་པ་དང༌། ལོངས་སྤྱོད་ཀྱི་འདུ་ལོང་ལྷུར་ལེན་པས་ནི། གཞན་དག་གི་རྗེས་སུ་སྟོབས་འགྲན་དུ་ཡོད་པ་མིན་མོད། ཡུལ་རྣམས་བགྲོད་ན་རྨི་ལམ་མཐའ་འདོད་འདྲ། །གཏམ་འདི་ལབ་ན་རྫུན་ཕུག་རྫུན་གྱིས་བརྡོལ། །རྣམ་རྟོག་མཐའ་མེད་གཤིས་ཀྱི་འཆར་སྒོ་ཡིན། །ད་དུང་ཞེན་པས་འཁོར་བའི་ནགས་སུ་འཁྱམས། །སྙིང་ནས་སྙིང་པོ་མེད་པའི་དོན་རྟོགས་ནས། །སྐྱེ་མེད་གནས་ལུགས་སྤྲོས་པ་ཀུན་སྤངས་ལས། །སྤྲོས་པའི་འདུ་འགོད་སྣ་ཚོགས་རང་གྲོལ་ཀློང༌། །ད་ནི་རྫོགས་ཆེན་དོན་གྱི་ལྟད་མོ་ལྟོས། །ཞེས་བར་སྐབས་ཀྱི་ཚིགས་བཅད་དོ། །འདི་འང་འབྲས་ལྗོངས་ལྷ་བཙུན་རིན་པོ་ཆེ་འཇིགས་བྲལ་འགྱུར་མེད་བསྟན་འཛིན་དཔའ་བོ་དང༌། ཁུ་ནུའི་ཡུལ་གྱི་ཀ་ཆ་ཏི་རིའི་རིགས། བླ་མ་བསྟན་འཛིན་རྒྱལ་མཚན་བྱ་བའི་ངག་ལམ་ནས་བྱུང་བ་ཡི་གེར་བཀོད་པ། སི་ཏུ་དྷཱརྨ་ས་ར་འོ། །
སྦར་མ་ཡུན་ནན་དང་ཐག་ཉེ་འདྲ་ཟེར་བ་ལྟར་བདེན་པར་ཐག་ཆོད།
ཡང་གོ་ཐོས་བྱུང་བ། སིང་ག་ལ། བྷར་མ། སི་ཡམ་གསུམ་དང༌། ཞྭ་ཕན་ནམ་སྦྱར་བིང་ངམ། ༼འཇར་པན། སྒྲིག་མཁན་གྱི་མཆན།༽རིཔིང་ནང་པ་ཁོ་ནའོ། །ཡང་སི་ཡམ་གྱི་རྒྱལ་ཁམས་ནི་གླིང་གཅིག་ཡིན། དེ་ན་གྲྭ་སྟོང་ཕྲག་སུམ་ཅུ་ཙམ། སི་ཡམ་རྒྱལ་པོ་སྟོབས་ཀྱང་ཆེ། ནང་པ་ཤ་སྟག་ལས་དེ་ན་ཧིན་དུ་མེད། ཡེ་ཤུའི་ལུགས་མེད། ས་ཡན་སིའི༼ཚན་རིག སྒྲིག་མཁན་གྱི་མཆན༽མཁས་པ་ཛྙཱར་མིན་དང༌། ཕ་རན་སི་པ་ཡིན། རྒྱ་གར་ན་རྒྱལ་པོ་ཆུ་བོ་གངྒཱའི་རྒྱུད་དུ་་གུ་རུ་ཝང༌། རྒྱ་གར་ཡུལ་ལྷོ་དབུས་སུ་ཊི་ཟ། མཎྚིར་རཱ་ཛ་ནི་ཟ་ཧོར་མཚོ་པདྨ་ཅན་དང་ཉེ་བར། བྷ་ཌགར་པའི་རྒྱལ་པོ་ཛྭོ་གི་རཱ་ཛ། གཞམ་བོད་སྟེ་ཟིང་པ་རྒྱལ་པོ། འབིགས་བྱེད་ཀྱི་ནི་ལ་བནྡ་པ། གརྴ་རྒྱལ་པོའི་སྲས། འཆི་མེད་ཟླ་བ། བཀྲིས་ཟླ་བ་ཟེར་བ་ཡོད། ཀ་ལི་ཀ་ཏ་ནས་བྷེ་ལད། དེ་ནས་ཤར་ཕ་རན་སི། དེ་ནས་ཤར་བྷེལ་ཇཾ། དེ་ནས་ཤར་ཛྙཱར་མིན། དེ་ནས་ཤར་ཨོ་ཌོལ། བྷེལ་ཇཾ་ནས་བྱང་དུ་མོན་ཊོའོ་ཉི་གུ་ཏུ། བྱང་སརྦིས་ཡ། བྱང་ལོ་རོ་པུ། ཀ་ལི་ཀ་ཏའི་ཕྱོགས་ཏིང་ལམ་པའི་འའཁྲུངས་གནས། ཙི་ཊ་གཾ ཅི་ཊ་གྷཾ ལྟ་བུར་ཀློག དེ་རུ་མི་སྐྱ་མཁས་པ་མང༌། ཤར་ཕྱོགས་བྷཾ་ག་ལའི་དབུས་ཤྲུར་ཝ་ཞེས་དཔོན་པོ་ཡིན། ཀ་ལི་ཀ་ཏ་ན་མཁས་པ་ཡོད།། དགེའོ། །ཕྱག་བྲིས་དངོས་ལས་བཤུས་ཏེ་ཞུས་དག་པར་བྱས་སོ།། །
Subscribe to:
Post Comments (Atom)
0 comments:
Post a Comment